Proverbios
5 Jnichʼan, chʼama awaʼiy ta lek te spʼijil koʼtan,
tsʼechikintaya ta lek te bintik ya jnaʼ ta swenta te bintik ay ta naʼel stsajtayel,*
2 jichme ya akanantay te bitʼil ya anaʼ stuuntesel te snopojibal awuʼun
sok yame akoltaybey skʼoplal te bin ay ta naʼel ta swenta te bin ya awale.
3 Melel te skʼop te ants te maʼyuk ta tojil be* jich kʼoem te bin-utʼil chab te ya x-okin lokʼel tal ta sna
sok kʼax kʼunxan-a te skʼop jich te bin-utʼil te aceite.
4 Pero ta melel, jich kʼoem te bin-utʼil chʼaal jaʼmal*
sok ya xbojawan jich te bin-utʼil espada te schaʼjejchel ay ye.
5 Te yoke ya xko bael ta lajel.
Te sbee toj ya xbajt ta Mukenal.*
6 Maʼyuk skʼoplal ta yoʼtan te sbelal te kuxlejalil.
Jowijem ta be, ma snaʼ banti ya xbajt.
7 Jnichʼnab, aʼiya awaʼiyik te jkʼop
sok mame xnamajex* ta stojol te bin ya kalbeyex.
8 Namal* xa awakʼ aba ta stojol te antse,
mame xnoptsajat* ta yochibal sna,
9 swenta ma xchʼay te bitʼil ichʼbilat ta mukʼ yuʼun te yantik
sok te ya ata awokol bayal jaʼbil yu’une,
10 mame jaʼuk te yantik machʼa ya slajinbat te abiluk*
sok mame jaʼuk te ya xbajt ta sna jyanlum te bintik tulan aʼtejat yuʼune.
11 Teme ma jichuk ya apase, te kʼalal jtebxanix ya skʼan ya xlajat-ae,
te kʼalal maʼyukix awip-ae sok te maʼyukix yip-a te abakʼetale,
12 jichme ya awal: «¡¿Bin yuʼun te la jpʼaj te tojobtesel?!
¡¿Bin yuʼun te ma la jchʼuun te tsitsel?!*
13 Maba la jchʼam kaʼiy te skʼop te jnojpteswanejetik kuʼun
sok maba la jchʼam kaʼiy ta lek te skʼop te jpʼijubteswanejetik kuʼun.
14 Ta ora ini, jtebxanix ma jin te jkuxlejal
ta stojol spisil te lume».
15 Jaʼme xa awuchʼbey yaʼlel te jokʼbil yawil jaʼ awuʼun
sok te jaʼ te ya x-okin* ta pozo awuʼune.
16 ¿Lekbal te ya xmal lokʼel te yaʼlel te slokʼib jaʼ awuʼun?
¿Lekbal te ya xmal lokʼel ta plazaetik te jaʼ awuʼun?
17 Jaʼuknaxme awuʼun ya xkʼot,
mame ayuk yan machʼa xa awakʼbey.
18 Ayukme yutsil te slokʼib jaʼ awuʼun,
sok mulanbeya yutsilal te awinam te nujpunat sok te kʼalal keremat-to-a
19 te jich bin-utʼil lekil antsil chij sok te tʼujbil jaʼmal tentsun.
Spisilukme-ora ya amulanbey yutsilal te schuʼ.
Spisilukme-ora ya yuʼuninat te skʼuxul yoʼtan.
20 Jnichʼan, mame xa awakʼ smonbat awoʼtan te ants te maʼyuk ta tojil be*
o te ya awakʼ spetat te j-antsinel ants.*
21 Melel te Jehová ya yil te beetik yuʼun te ants winiketik
sok yak ta yilel spisil te banti ya xbeenike.
22 Te machʼa chopol* jaʼnix ya xpejtsʼuyot yuʼun te smul
sok jaʼnix ya xchukot jilel yuʼun te smule.
23 Yame xlaj ta skaj te maba la schʼuun te tojobtesel
sok yame xchʼay yuʼun ta skaj te jkʼaxel ma snaʼ kʼinal.