Éxodo
1 Jich ay te snichʼnab Israel te kʼotik sok ta Egipto. Ta jujuntul ochik bael sok te machʼatik ay yuʼunik ta sna: 2 jaʼ te Rubén, Simeón, Leví sok te Judá; 3 te Isacar, Zabulón sok te Benjamín; 4 te Dan sok te Neftalí, te Gad sok te Aser. 5 Ta spisil jaʼ 70 ta tul te stsʼumbal te Jacob. Te José ayix ta Egipto-a. 6 La sta yorail te laj te José sok lajik-euk spisil te sbankil yijtsʼinab soknix te machʼatik kuxinik ta yorail-abi. 7 Ayin* bayal snichʼnab te israeletik, jich jajch spʼol sbaik. Kʼax bayal kʼotik sok kʼax bayal yipik te jich noj yuʼunik te kʼinale.
8 Ta patil bael och yachʼil ajwalil ta Egipto te ma la snaʼbey sba te José. 9 Jich la yalbey te ants winiketik ta slumale: «¡Ilawilik! Te lum yuʼun Israel jaʼ kʼax bayalikxan sok jaʼ bayalxan yipik-a te bitʼil te joʼotike. 10 Yame skʼan ya jnoptik te bin ya jpastik yuʼun maba ya xpʼolikxan-a. Teme maʼyuk bin ya jpastike, te kʼalal ya xtal te guerra yame sjokinik te jkontrataktik ta skontrainbelotik, jich ya yijkitayik te kʼinale».
11 Jaʼ yuʼun la yakʼ jolaletik te tulan ya spasik ta mantal te israeletik yuʼun ya sujik ta tulan aʼtel sok ya stenik ta spasel te mukʼul lumetik jaʼ te Pitom sok Raamsés te la stuuntes te faraón ta skʼejojibal weʼelil. 12 Pero, te kʼalal bayalxan la yichʼik utsʼinele,* bayalxan ya spʼol sbaik sok ya spuk sbaik. Ta swenta-abi, te egipcioetik kʼax bayalxan la xiʼik te israeletik. 13 Jaʼ yuʼun, te egipcioetik mero la smosoinik te israeletik. 14 La yakʼbeyik bayal swokolik te kʼalal la sujik ta tulan aʼtel: la yakʼbeyik yaʼtel ta swotsʼel ajchʼal, spasel ladrilloetik sok ta spasel biluk ta chajp aʼtelil ta lumkʼinal. Yuʼun-nix jich-a, kʼaxto la yutsʼinik* sok kʼaxto la smosoinik te la sujik ta spasel biluk ta chajp aʼtelil.
15 Te ajwalil yuʼun Egipto la skʼopon chaʼtul jtam-alaletik te Sifrá sok Pua sbiilik, te jaʼ hebrea-antsetik. 16 Jich la yaltiklanbey: «Te kʼalal ya akoltayik te hebrea-antsetik ta swenta te nopol* ya x-ayinix-a* te yalike, yame skʼan ya apasik ini: teme jaʼ chʼin kerem, milaik, yan teme jaʼ chʼin achʼix, kuxuluk ya xjil awuʼunik». 17 Pero, te jtam-alaletik xiʼojik* te smelelil Diose.* Jaʼ yuʼun maba la spasik te bin albotik ta mantal yuʼun te ajwalil yuʼun Egipto, melel la yakʼ te kuxul ya xjilik te chʼin keremetik. 18 Ta patil bael, te ajwalil yuʼun Egipto la stikun ta ikʼel te jtam-alaletik sok jich la yaltiklanbey: «¿Bin yuʼun la awakʼ kuxul jil awuʼunik te keremetike?». 19 Te jtam-alaletik jich la yalbeyik te faraón: «Te hebrea-antsetik ma jichuk te bitʼil te egipcia-antsetike. Ay yipik stukelik, ayinemix* yalik-a te kʼalal ya xkʼot te jtam-alale».
20 Jaʼ yuʼun, te Dios la yakʼbey bendición te jtam-alaletike, jich pʼolikxan bael te israeletik sok la stsakxan yipik. 21 Te bitʼil la xiʼik te smelelil Dios te jtam-alaletik, akʼbotik yalatakik yuʼun. 22 Ta patil, te faraón jich la spas ta mantal spisil te slumale: «Chʼojaik ochel ta mukʼul jaʼ Nilo spisil te keremetik te ayinelikto,* pero kuxuluk ya xjil awuʼunik te chʼin achʼixetike».