Carta ta stojol te Romanoetik
8 Jich yuʼun, te machʼatik jun-nax ayik sok te Cristoe maʼyukix smul ya xkʼotik. 2 Melel te ley yuʼun te chʼul espíritu* te ya yakʼ kuxlejalil ta swenta te jun ayat sok te Cristo Jesús la yakʼat ta libre yuʼun te ley yuʼun te mulil sok te lajele. 3 Te Dios ay bin la spas te ma juʼ yuʼun spasel te Leye, melel maʼyuk yip kʼot ta swenta te chʼichʼbakʼete. Te Dios la stikun tal te sNichʼan te jich yilel sbakʼetal te bin-utʼil te jmulawiletike yuʼun jich ya slajin te mulile. Jich la yakʼ ta lajel te mulil te ay ta jbakʼetaltike, 4 yuʼun jich ya xkʼot ta pasel ta jtojoltik te bin toj ya yal te Leye, joʼotik te maba ya jpastik te bin ya skʼan te bakʼet, te jaʼ ya jpastik te bin ya skʼan te chʼul espiritue.* 5 Melel te machʼatik jaʼ ya spasik te bin ya skʼan te sbakʼetalik jaʼ ya xbajt ta yoʼtanik spasel te bin ya skʼan te bakʼete, pero te machʼatik jaʼ ya spasik te bin ya skʼan te chʼul espiritue* jaʼ ya xbajt ta yoʼtanik spasel te bin ya skʼan te chʼul espiritue. 6 Teme jaʼ ya xbajt ta koʼtantik spasel te bin ya skʼan te bakʼete yame yakʼotik ta lajel, yan teme jaʼ ya xbajt ta koʼtantik spasel te bin ya skʼan te chʼul espíritu* yame yakʼbotik kuxlejalil sok lamalkʼinal. 7 Teme jaʼ ya xbajt ta koʼtantik spasel te bin ya skʼan te bakʼete, ya yakʼ jkontraintik te Diose, melel te bakʼete maba ya schʼuun te ley yuʼun te Diose sok maʼyuk bin-ora ya schʼuun. 8 Jich yuʼun, te machʼatik jaʼ ya spasik te bin ya skʼan te sbakʼetalike ma xjuʼ yuʼunik te lek ya x-ilotik yuʼun te Diose.
9 Pero, teme awichʼojik ta smelelil te chʼul espíritu* yuʼun te Diose, maba jaʼ ya apasik te bin ya skʼan te abakʼetalike, jaʼ ya apasik te bin ya skʼan te chʼul espiritue. Pero, teme ay machʼa maba yichʼojbey te snopojibal yuʼun te Cristoe, ma yuʼunuk Cristo-abi. 10 Pero, teme jun ayex sok te Cristoe, lajem te abakʼetalik ta swenta te mulile, yan stukel te chʼul espíritu* ya yakʼbeyex akuxlejalik ta swenta te bin toj ta pasel. 11 Jich yuʼun, teme awichʼojik te chʼul espíritu* yuʼun te machʼa la schaʼkuxajtes te Jesús ta yolil te machʼatik lajemik, jaʼ te machʼa la schaʼkuxajtes te Cristo Jesús ta yolil te machʼatik lajemik, yame yakʼbeyex akuxlejalik te maʼyuk bin-ora ya xlaj ta swenta te chʼul espíritu te awichʼojike.
12 Jich yuʼun, kermanotak, ayme bin ya skʼan ya jpastik, pero mame jaʼuk ya jpastik te bin ya smulan te jbakʼetaltike. 13 Teme jaʼ ya apasik te bin ya skʼan te abakʼetalike, yananix xlajex-a. Yan teme ta swenta chʼul espíritu* ya amilik te bintik chopol* ya smulan spasel te abakʼetalike, yame xkuxinex. 14 Melel spisil te machʼatik jaʼ ya spasik te bin ya skʼan te chʼul espíritu* yuʼun te Dios jaʼ yal snichʼnab te Diose. 15 Melel te jaʼexe ma jaʼuk la awichʼik chʼul espíritu* yuʼun te ya awichʼik mosoinel sok te ya xiwex yan bueltae, jaʼ la awichʼik chʼul espíritu yuʼun te ya awichʼik ikʼel jich bitʼil yal snichʼnab te Diose, te chʼul espíritu ini jaʼ ya stijbotik koʼtantik ta yalel: «¡Abba,* jTat!». 16 Jaʼnix te chʼul espíritu* te ya yalbey te koʼtantik te yal snichʼnabotik te Diose. 17 Jaʼ yuʼun, teme yal snichʼnabotike, ya skʼan ya yal te ay bin ya kichʼtik akʼbeyel yuʼun te Diose sok te pajal ya kichʼtik akʼbeyel sok te Cristoe, jaʼnax teme pajal ya xkʼax jwokoltik sok te Cristo, yuʼun jich pajal ya kichʼtik kutsilaltik sok.
18 Jaʼ yuʼun ya jnop ta swenta te jwokoltik ta ora ini jkʼaxel maʼyuk bin ya spaj te utsilal te ya xbajt chiknajuk ta jtojoltike. 19 Melel te bintik pastiklanbil yoʼtanuk te yakuk xchiknajix te yal snichʼnab te Diose. 20 Melel te bintik pastiklanbil ma la skʼan te ya yichʼik pojbeyel yuʼun Dios te bintik ya smaliyik ta pajel chaʼbej, pero jich la yakʼ kʼotuk ta pasel te Diose. Te kʼalal jich la yal te Dios te bin ya xkʼot ta stojole, jaʼnix jich ay bin la yakʼ jmaliytik. 21 Jaʼnix jich snaʼoj te ya yichʼik koltayel lokʼel ta mosoinel yuʼun te mulil sok te lajel te bintik pastiklanbil soknix te ya smulanbeyik yutsilal te libre ya xjilik te yal snichʼnab te Diose. 22 Jnaʼojtik te spisil te bintik pastiklanbil jun-nax yakik ta ajkan sok ta wokol kʼalalto ta ora ini. 23 Ma jaʼuknax te bintik pastiklanbile, jaʼnix jichotik-euk, joʼotik te la kichʼtik te sba sit awal tsʼunubil —jaʼ te chʼul espiritue—,* yak ta ajkan te koʼtantik te kʼalal yakotik ta smaliyel sok spisil koʼtantik te ya kichʼtik ikʼel jich bitʼil yal snichʼnab Dios, jaʼ te kolel yuʼun te jbakʼetaltike. 24 Melel la kichʼtik koltayel ta swenta te bin ya jmaliytik ta pajel chaʼbeje. Pero, teme yakotikix ta yilel te bin yakotik ta smaliyele, maʼyuk bin yakotikix ta smaliyel-abi. ¿Bin-utʼil ay-a te ay machʼa ay bin ya smaliy teme yakix ta yilele? 25 Pero, teme maba ya kiltik te bin yakotik ta smaliyele, jun koʼtantik ya jmaliytik sok spisil koʼtantik.
26 Jaʼnix jich, te chʼul espíritu* ya skoltayotik te kʼalal maʼyuk kiptik ya kaʼiy jbatike. Melel ay baeltik te ma jnaʼtik te bin ya jkʼantik ta oracione, pero te chʼul espíritu jaʼ ya xkʼopoj ta jtojoltik manchukme maba ya xwejt kuʼuntik te bin-utʼil ya kaltik te jwokoltike. 27 Pero, te machʼa ya yil te bin ay ta koʼtantik ya snaʼ te bin ya skʼan ya yal te chʼul espiritue,* melel jaʼ ya xkʼopoj ta stojol te machʼatik chʼultesbilik, jaʼ chikan te bin-utʼil skʼanojel yoʼtan te Diose.
28 Jnaʼojtik te jun-nax ya x-aʼtej te bintik spasoj te Dios ta swenta slekilal te machʼatik kʼux ta yoʼtanik te Diose, jaʼ te machʼatik ikʼbilik yuʼun ya spasik te skʼanojel yoʼtan te Diose. 29 Melel te machʼatik nail la snaʼbey sbae jaʼnix te machʼatik nail la yichʼik tsael swenta jich ya xkʼotik te bin yilel te sNichʼane, yuʼun jaʼ banichʼanil ya xkʼot ta yolil bayal yijtsʼinab. 30 Te machʼatik nail la stsae jaʼnix jich la yikʼtiklan; te machʼatik la yikʼtiklane jaʼnix jich toj la yiltiklan. Ta slajibal, te machʼatik toj la yiltiklane jaʼnix jich la yakʼtiklanbey yutsilal.
31 Jich yuʼun, ¿bin ya kaltik yuʼun ini? Teme ay ta jtojoltik te Diose, ¿machʼa ya xjuʼ ya skontrainotik? 32 Jich bitʼil te maba la snaʼbey yoʼbolil sba te sNichʼan te la yakʼ ta lajel ta jtojoltike, ¿mabal yakuk yakʼbotik ta swenta slekil yoʼtan sok te sNichʼan spisil te bintik ay yuʼune? 33 ¿Machʼawan ya xjuʼ yuʼun slebeyel smul te machʼatik tsabilik yuʼun te Diose? Melel jaʼnix te Dios te toj ya yiltiklan stukele. 34 ¿Machʼa ya x-akʼbot stoj smulik yuʼun? Maʼyuk, melel jaʼ la stojix te Cristo Jesús te kʼalal laje, ma jaʼuknax te laje, la yichʼ chaʼkuxajtesel; jaʼ te machʼa ay ta swaʼel kʼab te Dios sok jaʼnix te machʼa ya xkʼopoj ta jtojoltike.
35 ¿Machʼa ya xjuʼ ya slokʼesotik ta stojol te skʼuxul yoʼtan te Cristoe? ¿Jaʼbal te wokoliletik, te mel-oʼtan, te kontrainel, te wiʼnal, te maʼyuk jkʼuʼ jpakʼtik, te bintik xiʼbantik sba o te ya kichʼtik milele? 36 Jich te bin-utʼil tsʼibaybile: «Jaʼ ta atojol te spisil-ora ay machʼa ya skʼan ya smilotike. Jichotik ta yoʼtanik te bin-utʼil tuminchijetik te ya yichʼik milele». 37 Pero, wokolayal te machʼa kʼux la yaʼiyotik ta yoʼtane, ya xjuʼ kuʼuntik stsalel* spisil ini. 38 Melel schʼuunoj koʼtan te ni jaʼuk te lajel ni jaʼuk te kuxlejalil, ni jaʼuk te chʼul-abatetik ni jaʼuk te ajwaliletik, ni jaʼuk te bintik yak ta kʼoel ta pasel ta ora ini ni jaʼuk te bin ya xkʼot ta pasel ta pajel chaʼbej, ni jaʼuk te bintik ay yuʼele, 39 ni jaʼuk te bin toyol aye ni jaʼuk te bin kʼubul aye, ni ayukxan yan te bintik pastiklanbil te ya xjuʼ ya slokʼesotik ta stojol te skʼuxul yoʼtan te Dios te ay ta swenta te Kajwaltik Cristo Jesús.