Deuteronomio

14 »Jaʼex yal snichʼnabex te Jehová te Dios awuʼunik. Mame xa aboj abakʼetalik sok mame xa ajoxik* te atiʼbaik* ta skaj te ay machʼa laje. 2 Melel te jaʼexe chʼul lumex yuʼun te Jehová te Dios awuʼunik, jaʼ la stsaex te Jehová ta yolil spisil te lumetik te ay ta swolol balumilal yuʼun jaʼ lum ya xkʼoex yuʼun te mukʼ akʼoplalike.

3 »Mame xa aweʼik te bintik boloben skʼoplalik. 4 Jaʼik ini te chambalametik te ya xjuʼ ya aweʼik: te toro, tuminchij, tentsun, 5 ciervo-chij, gacela-chij, corzo-chij, jaʼmal tentsun, antílope-chij, jaʼmal tuminchij sok te tuminchij te ay ta witstikil. 6 Ya xjuʼ ya aweʼik spisil te chambalametik te jatem yejkʼachik sok te ya schaʼjachʼxan sweʼelik. 7 Pero ma xjuʼ ya aweʼik te chambalametik te jaʼnax ya schaʼjachʼxan sweʼelik o te jaʼnax jatem yejkʼachik: te camello, liebre* sok te damán,* melel ya schaʼjachʼxan sweʼelik, pero maba jatem yejkʼachik. Bolobenme skʼoplal ya skʼan ya awilik. 8 Jaʼnix jich mame xa aweʼik te chitam, melel jatem yejkʼach pero maba ya schaʼjachʼxan sweʼel. Bolobenme skʼoplal ya skʼan ya awilik. Mame xa aweʼbeyik stiʼbalul te chambalametik-abi sok mame xa apikbeyik te schamen bakʼetal.

9 »Te bintik kuxajtik ta jaʼ te ya xjuʼ ya aweʼik jaʼik spisil te bintik ay xikʼik sok ay sulilik. 10 Pero mame xa aweʼik te bintik maʼyuk xikʼik sok te maʼyuk sulilik. Bolobenme skʼoplal ya skʼan ya awilik.

11 »Ya xjuʼ ya aweʼik spisil jaʼmal mutetik te lek skʼoplalik. 12 Pero jaʼik ini te jaʼmal mutetik te ma xjuʼ ya aweʼik: te águila, águila te ya stsak chay, ijkʼal xulem, 13 tsajal milano-mut, ijkʼal milano-mut ni chajpuk milano-mutetik 14 ni chajpuk jojetik,* 15 avestruz-mut, xkuj, sakal spechul jaʼ ni chajpuk xik, 16 chʼin xkuj, xkuj te najtik schikin, cisne-mut, 17 pelícano-mut, xulem, sjoj-mutil jaʼ,* 18 cigüeña-mut ni chajpuk garza-mut, abubilla-mut ni jaʼuk te sotsʼe. 19 Spisil chʼin chambalametik te ya xwilik te jtsojbnax ya yakʼ sbaik ta lumkʼinal jaʼnix jich bolobenme skʼoplal ya skʼan ya awilik. Mame xa aweʼik. 20 Ya xjuʼ ya aweʼik spisil jaʼmal mut te ya xwilik te lek skʼoplalik.

21 »Mame xa aweʼik te chambalam te lajemix la yichʼ tael. Ya xjuʼ ya awakʼbeyik te jyanlumetik te yakik ta nainel ta mukʼul lumetik awuʼunik, ya xjuʼ ya sweʼik stukel, o ya xjuʼ ya achonbeyik te jyanlumetik te kʼaxelnax ayike. Melel te jaʼex chʼul lumex yuʼun te Jehová te Dios awuʼunik.

»Mame xa apayik te alal tentsun ta yaʼlel schuʼ te smeʼe.

22 »Yananixme skʼan ya awakʼik jun ta slajunebal yuʼun spisil te bin ya xlokʼ sit awuʼunik ta jujun jaʼbil. 23 Ya xjuʼ ya aweʼik ta stojol te Jehová te Dios awuʼunik te jun ta slajunebal te sit awal tsʼunubiletik awuʼunik, te yachʼil vino, te aceite awuʼunik, te sba yalatak te wakaxetik, tuminchijetik o tentsunetik awuʼunik ta lugar te banti ya stsa yuʼun tey ya yichʼ ichʼel ta mukʼ te sbiil, yuʼun jich ya anopik te bitʼil ya skʼan ya axiʼik spisil-ora te Jehová te Dios awuʼunik.

24 »Teme namal* ya xbaex te jich ma xjuʼ ya awichʼik bael spisil ini ta lugar te tsabil yuʼun te Jehová te Dios awuʼunik te banti ya yichʼ ichʼel ta mukʼ te sbiil ta skaj te namal ya xjil awuʼunik te lugar-abi, (melel jich ya yakʼbeyex bendición te Jehová te Dios awuʼunik), 25 ya xjuʼ ya achonik. Te takʼin-abi ya awichʼik bael ta lugar te banti ya stsa te Jehová te Dios awuʼunik. 26 Sok te takʼin-abi ya xjuʼ ya amanik te bintik ya skʼan awoʼtanik: wakaxetik, tuminchijetik, tentsunetik, vino sok yantikxan uchʼbalil te ya xyakubteswan, sok yantikxan te bin ya skʼan awoʼtanike. Teyme ya xweʼex ta stojol te Jehová te Dios awuʼunik, tseʼelnaxme awoʼtanik te jaʼex sok te machʼatik ay awuʼunik. 27 Mame xa apijtesik te levitaetik te yakik ta nainel ta awolilik, melel maba la yichʼik akʼbeyel skʼinalik jich te bin-utʼil te jaʼexe.

28 »Ta ox-oxeb jaʼbil yame awichʼik bael jun ta slajunebal te bintik ya xlokʼ awuʼunik ta jaʼbil-abi, yame akʼejik ta yutil te mukʼul lumetik awuʼunik. 29 Jich te levitaetik —te maba la yichʼik akʼbeyel skʼinalik jich te bin-utʼil te jaʼexe—, te jyanlumetik, te alaletik te lajem statik sok te meʼba antsetik te yakik ta nainel ta awolilik yame xtalik ta weʼ uchʼajel jaʼto te kʼalal ya xnoj schʼujtik, yuʼun jich te Jehová te Dios awuʼunik ya yakʼbeyex bendición ta spisil te bin ya apasike.