Levítico
17 Te Jehová jich la yalbeyxan te Moisés: 2 «Kʼopojan sok te Aarón, te snichʼnab sok spisil te israeletik. Jich xa awaltiklanbey: ‹Jaʼ ini jaʼ te bin la yal ta mantal te Jehová:
3 »›«Teme ay jtul winik ta sna Israel te ya smil jkojt toro, jkojt jkolel* tat tuminchij o jkojt tentsun ta yutil o ta fuera yuʼun te campamento 4 te maba ya yikʼ bael ta yochibal nailpakʼ ta swenta tsoblej yuʼun ya yakʼ jich bitʼil majtanil ta stojol te Jehová ta yelaw te nailpakʼ templo yuʼun te Jehová, yame smulin smalel chʼichʼ. Yame skʼan ya yichʼ milel te winik-abi ta skaj te la smal chʼichʼ. 5 Jaʼ ini jaʼ ta swenta te ya skʼan ya yichʼik bael te israeletik te milbil majtaniletik —te yakik ta yakʼel ta jamalal ta ora ini— ta stojol te Jehová ta yochibal te nailpakʼ ta swenta tsoblej, ta stojol te sacerdote. Jichme ya yakʼik te bitʼil milbil majtaniletik ta swenta lamalkʼinal ta stojol te Jehová. 6 Te sacerdote yame stsijtsin ta chʼichʼ te kajtajibal yuʼun te Jehová te ay ta yochibal te nailpakʼ ta swenta tsoblej, sok yame yakʼ te xtomet schʼailel te sjujpʼel* jich bitʼil jun majtanil te kʼax sumetnax yikʼ* ta stojol te Jehová. 7 Jich yuʼun mame skʼan ya yakʼikix milbil majtaniletik ta stojol pukujetik te pajal yilelik sok te tentsun te jaʼ yak yakʼbel sbaik ta antsinel sok. Jaʼ ini jaʼ jun mantalil te ma xlaj skʼoplal ta kajalkaj atsʼumbalik»›.
8 »Jaʼnix jich yame skʼan ya awaltiklanbey: ‹Teme ay jtul israel o jtul jyanlum te yak ta nainel ta awolilik te ya yakʼ chikʼbil majtanil o milbil majtanil 9 te maba ya yichʼ bael ta yochibal te nailpakʼ ta swenta tsoblej yuʼun ya yakʼbey te Jehová, yame skʼan ya yichʼ milel.
10 »›Teme ay jtul israel o jtul jyanlum te yak ta nainel ta awolilik te ya sweʼ chʼichʼ, yananixme kil jba sok-a te machʼa ya sweʼ te chʼichʼ sok yame jmil. 11 Melel te skuxlejal te bintik kuxajtik ay ta schʼichʼel, joʼon-nix kakʼoj ta sba te kajtajibal ta atojolik yuʼun ya yakʼ te ya ataik perdón yuʼun te amulik, melel te chʼichʼ jaʼ ya yakʼ te ya yichʼ tael perdón yuʼun mulil ta swenta te tey ay-a te kuxlejalil. 12 Jaʼ yuʼun, jich kalojbey te israeletik: «Mame ayuk jtulukex te ya aweʼik chʼichʼ ni jtuluk jyanlum te yak ta nainel ta awolilik te ya xjuʼ ya sweʼ te chʼichʼe».
13 »›Teme ay jtul israel o jtul jyanlum te yak ta nainel ta awolilik te ya snuts sok ya stsak jkojt chambalam o jkojt jaʼmal mut te ya xjuʼ ta weʼel, yame skʼan ya smalbey te schʼichʼel sok ya smuk ta lum. 14 Melel te skuxlejal te bintik kuxajtike jaʼ te schʼichʼel, tey ay-a te skuxlejale. Jaʼ yuʼun jich la kalbey te israeletike: «Mame xa aweʼbeyik schʼichʼel te bintik kuxajtik, melel te skuxlejal te bintik kuxajtik ay ta schʼichʼel. Machʼauk-a te ya sweʼ yame yichʼ milel». 15 Teme ay jtul israel o jtul jyanlum te ya sweʼ jkojt chambalam te lajemix la yichʼ tael o la yichʼ tiʼel yuʼun jtiʼawal chambalam, yame skʼan ya sakʼ skʼuʼ sok ya yatintes sba, bolobenme skʼoplal ya xkʼot jaʼto ta xmal kʼajkʼal. Ta patil lekme skʼoplal ya xkʼot. 16 Pero, teme maba ya skʼan ya sakʼ te skʼuʼ sok maba ya yatintes sba, yame skʼan ya stoj te smule›».