Génesis

22 Ta patil-abi, te smelelil Dios la spas ta prueba te Abrahán. Te Dios jich la yal: «¡Abrahán!». «¡Liʼ ayoni!», xchi te Abrahán. 2 Tey-abi, te Dios jich la yal: «Awokoluk, ikʼa tal te anichʼan, te jip jtul anichʼan te mero kʼux ta awoʼtan, jaʼ te Isaac, baan sok ta skʼinal Moria. Teyme ya awakʼ ta chikʼbil majtanil-a te anichʼan ta wits te banti ya kalbate».

3 Jaʼ yuʼun buen sabto jajch te Abrahán, la schajpan te sburro sok la yikʼ tal chaʼtul j-abatetik yuʼun, swenta ya xjokinot bael sok te Isaac, te snichʼane. Sok la stopʼ siʼ yuʼun te chikʼbil majtanile. Ta patil bajt te banti albot yuʼun te smelelil Diose. 4 Ta yoxebal kʼajkʼal, te Abrahán la stoy sit, namalto* la yil te lugar-abi. 5 Jaʼ yuʼun, te Abrahán jich la yalbey te j-abatetik yuʼun: «Maliyawonik liʼi sok ikʼaik jilel te burro, te joʼon sok te jnichʼane ya xbootik ta yichʼel ta mukʼ te Dios. Ta patil ya sujtonkotik tal».

6 Jich te Abrahán la yichʼ tal te siʼul te chikʼbil majtanil yuʼun ya yakʼbey skuch bael te Isaac. Yan te Abrahán jaʼ la yichʼ bael te kʼajkʼ sok te cuchillo, jich bajt ta schebalik. 7 Tey-abi, te Isaac jich la yalbey te Abrahán: «¡Jtat!». «¿Bin-a, jnichʼan?», xchi te Abrahán. Te Isaac jich la sjojkʼoy: «Kichʼojtik tal te kʼajkʼ sok te siʼe, pero ¿banti ay te tuminchij te ya kakʼtik ta chikʼbil majtanile?». 8 Te Abrahán jich la yal: «Jnichʼan, jaʼnix te Dios te ya yakʼbotik te tuminchij ta swenta te chikʼbil majtanile». Jich beenikxan bael.

9 Te kʼalal kʼotik ta lugar te banti albot yuʼun te smelelil Diose, te Abrahán la spas jun skajtajib chikʼbil majtanil sok la yakʼbey siʼ ta sba. Ta patil la schukbey yok skʼab te Isaac, la sjawan ta sba te skajtajib chikʼbil majtanil te ayix siʼule. 10 Te Abrahán la stsak tal te cuchillo yuʼun ya smil te snichʼane. 11 Pero, te chʼul-abat yuʼun te Jehová kʼoponot tal kʼalalto ta chʼulchan sok jich albot yuʼun: «¡Abrahán! ¡Abrahán!». «¡Liʼ ayoni!», xchi te Abrahán. 12 Te chʼul-abat jich la yal: «Maʼyuk bin xa apasbey te kereme. Ta ora ini jnaʼojix te axiʼoj te Diose, melel maba la akom aba yuʼun ya awakʼ ta jtojol te anichʼan, te jip jtul anichʼane». 13 Tey-abi, te Abrahán la stoy sit, la yil te nopol* ay jkojt tat tuminchij te tsʼotol jilel xulub ta chʼixtikil. Jich bajt stsak tal te tat tuminchij sok jaʼ la yakʼ ta chikʼbil majtanil, ma jaʼuk la yakʼ te snichʼane. 14 Te Abrahán la yakʼbey sbiilin Jehová-Yiré* te lugar-abi. Jaʼ yuʼun, jichtonix ya yichʼ alel ta ora ini «Ta wits yuʼun Jehová ya yichʼ akʼel te bin ya xtuune».

15 Ta schebal buelta te chʼul-abat yuʼun te Jehová la skʼopon te Abrahán kʼalalto ta chʼulchan, 16 jich la yal: «Ya kal ta jamal ta jwenta —xchi te Jehová— te bitʼil jich la apas te maba la akom aba yuʼun la awakʼ ta jtojol te anichʼan, te jip jtul anichʼan, 17 ya kakʼbat bendición sok ya kakʼ te ya xpʼol te atsʼumbal jich te bin-utʼil te ekʼetik ta chʼulchan sok te jiʼ te ay ta stiʼil mar. Jaʼnix jich, te atsʼumbale yame yuʼunin te mukʼul lumetik yuʼun te skontratake. 18 Sok spisil te nacionetik ta balumilal yame staik bendición ta swenta te atsʼumbale, melel la achʼam awaʼiy te bin la kalbate».

19 Ta patil-abi, te Abrahán sujt bael te banti jil te j-abatetik yuʼun, jich ta spisilik sujtik bael ta Beer-Seba. Te Abrahán kuxinxan ta Beer-Seba.

20 Ta patil bael, jich la scholbeyik te Abrahán: «Te Milcá la yakʼbey snichʼnab te abankil Nacor. 21 Te sba snichʼane Uz sbiil, te yane Buz sbiil, ta patil tal te Quemuel —te stat te Aram—, 22 Késed, Hazó, Pildás, Jidlaf sok te Betuel». 23 Te snichʼan te Betuel jaʼ te Rebeca. Jaʼik-abi te waxaktul yalatak te Milcá te la yakʼbey te Nacor, te sbankil te Abrahán. 24 Te yan yinam,* te Reumá sbiil, akʼbot yantik snichʼnab jaʼik te Tébah, Gaham, Tahas sok te Maacá.