Proverbios
23 Te kʼalal ya anajkan aba ta weʼel sok jtul ajwalil,
ilawil ta lek te bin ay ta atojol;
2 akʼa cuchillo ta anukʼ*
teme kʼax bayal te awiʼnal.*
3 Mame xbikʼetuk awoʼtan yuʼun te lekil weʼelil yuʼun te ajwalil,
melel jaʼ weʼelil te ya xloʼlaywan.
4 Mame xa amil aba ta sleel kʼulejalil.
Koma aba sok akʼa ta ilel te ay spʼijil awoʼtan.*
5 Te kʼalal ya awakʼ asit ta stojol te kʼulejalil, ya xchʼay bael,
melel yame xlokʼ xikʼ jich te bin-utʼil xikʼ te águila sok yame xwil bael ta chʼulchan.
6 Mame xa aweʼ te bin ya sjapbat te machʼa ay stʼutʼil yoʼtan,
mame xbikʼetuk awoʼtan yuʼun te lekil weʼelil yuʼune.
7 Melel yak ta yilel te jayebto ya xweʼat.
Jichme ya yalbat: «Weʼ uchʼajan», pero mame sokuk spisil yoʼtan te jich ya yalbate.
8 Yame axejtay lokʼel te bin jteb la aweʼ
sok maʼyuk skʼoplal ya xkʼot te bintik tʼujbil la awale.
9 Mame xa akʼopon ta schikin te machʼa maʼyuk spʼijil yoʼtan,
melel yame spʼaj te pʼijil kʼopetik ya awalbey.
11 melel ay yip stukel te Jkoltaywanej yuʼun;
jaʼme ya stejkʼan sba ta skoltayel, yan te jaʼate yame skontrainat.
12 Akʼa ta tojobtesel te awoʼtan
sok akʼa te achikin ta yaʼiyel te bin ay ta naʼel.
13 Mame xa akom aba ta stojobtesel te kerem,*
melel maba ya xlaj yuʼun teme ya amaj ta xul o wajchʼ.
14 Maja sok te xul o wajchʼ
yuʼunme jich ya akoltay lokʼel ta Mukenal.*
15 Jnichʼan, teme ya ata spʼijil awoʼtan,
tseʼelme koʼtan yuʼun.
16 Te kʼalal jaʼ ya xlokʼ ta awe te bintik toj ta pasel,
kʼax tseʼel koʼtan yuʼun.
17 Mame ayuk sbikʼtal awoʼtan ta stojol te jmulawiletik,
jaʼ lek te axiʼojuk te Jehová ta sjunal kʼajkʼal,
18 jichme lek ya xkʼoat ta lokʼel ta pajel chaʼbej
sok maʼyuk bin-ora ya xlaj skʼoplal te bin yakat ta smaliyele.
19 Jnichʼan, chʼama awaʼiy te kʼope sok ichʼa spʼijil awoʼtan
sok tojobtesa bael te awoʼtan ta tojil be.
20 Mame xa ajokin te machʼatik ya yuchʼik bayal vino
ni jaʼuk te machʼatik kʼax bayal ya sweʼik tiʼbal,
21 melel te jyakubel sok te machʼa kʼax bayal ya xweʼ, ya xjilik ta pobre yuʼun,
sok ta skaj te wayeltik sba kʼinal ya yaʼiyik, kʼax ma lekix te skʼuʼ ya slapike.
22 Chʼama awaʼiy te skʼop te atat te la yakʼat ta kʼinal,
sok ma xa apʼaj te anan* ta skajnax te meʼelubixe.
23 Mana* te bin smelelil sok mame ayuk bin-ora xa achon,
jaʼnixme jich xa apas sok te pʼijil oʼtanil, te tojobtesel sok te bintik ay ta ichʼbeyel swentail.
24 Te stat te machʼa toj yoʼtan aynanix stseʼelil yoʼtan-a;
te tatil te ay spʼijil yoʼtan te snichʼane yame x-akʼbot stseʼelil yoʼtan yuʼun.
26 Jnichʼan, akʼbon te awoʼtane,
sok tʼujbiluk ya xkʼot ta asit te beetik kuʼun.
27 Melel te ants te ya schon sba jaʼ kʼubul chʼen,
te j-antsinel ants* jaʼ pozo te chʼin-nax stiʼil.
28 Ya snakʼ sba jich te bin-utʼil j-elekʼ,
ya yakʼ te bayal ta tul winiketik te maba jun-nix yoʼtanik.
29 ¿Machʼa-a te ay ta ajkan yuʼun wokol? ¿Machʼa-a te ay ta mel-oʼtan?
¿Machʼa-a te ya sjach kʼop? ¿Machʼa-a te ay ta kʼop yuʼun te swokol?
¿Machʼa-a te maʼyuk swentail te bitʼil la sta yejchen? ¿Machʼa-a te tsajuben sit?
30 Jaʼ te machʼatik ya skʼasesik bayal tiempo ta yuchʼel vino,
te machʼatik yakik ta sleel* te kapbil vino.
31 Mame xa atʼojan asit ta yilel te stsajal te vino
te bujtsʼan-nax ta ilel te kʼalal ay ta copa sok te kʼun-nax ya xko ta uchʼele,
32 melel ya xtiʼawan jich te bin-utʼil chan,
ya slokʼes svenenoil jich te bin-utʼil jtiʼawal chan.
33 Ay bintik chajpiknax ya yil te asit
sok chopol* te bintik ya x-och yal te awoʼtane.
34 Jichme ya xkʼoat te bin-utʼil te machʼa metsel ta yolil mar,
jich te bin-utʼil te machʼa wayal ta mero sniʼil te steʼel te barco te banti ya yichʼ chukel te spakʼul.
35 Jich ya awal: «La smajonik, pero ma kʼux la kaʼiy.
La kichʼ tulan majel, pero ma la jnaʼ.
¿Bin-ora ya xkux koʼtan?
Ya xbajt jlexan kuchʼ».