2 Crónicas

26 Ta patil, spisil te lum yuʼun Judá la yotsesik ta ajwalil te Uzías te 16 yaʼbilal-a yuʼun jaʼ ya sjelolin jilel ta ajwalil te Amasías te state. 2 Te Uzías la schaʼpas te Elot sok la sujtesbey te Judá te kʼalal wayemix sbakʼetal-a te ajwalil* sok te antiguo smeʼ stat. 3 Ay 16 yaʼbilal-a te Uzías te kʼalal och ta ajwalil sok wentainwan 52 jaʼbil ta Jerusalén. Jecolías sbiil te snan* te talem ta Jerusalén. 4 Te Uzías jaʼ la spas te bintik lek ya yil te Jehová, jich te bitʼil la spas te Amasías te state. 5 La sle te Dios te jayeb kʼajkʼal kuxul ta kʼinal te Zacarías, jaʼ te machʼa nojptesot yuʼun ta xiʼel te smelelil Diose. Te kʼalal la sle te Jehová, te smelelil Dios la yakʼ te lek kʼot ta lokʼel te bintik la spase.

6 Bajt yakʼbey guerra te filisteoetik sok la stʼom ochel te mukʼul tsʼajkʼ yuʼun Gat, te Jabné sok te mukʼul tsʼajkʼ yuʼun Asdod. Ta patil la spas mukʼul lumetik ta skʼinal Asdod sok ta skʼinal te filisteoetik. 7 Te Uzías koltayotxan yuʼun te smelelil Dios ta yakʼbeyel guerra te filisteoetik, te meunimetik sok te arabeetik te nainemik ta Gurbaal. 8 Te ammonitaetik jajch stoj spatanik ta stojol te Uzías. La stsakxan bayal yip te wentainel yuʼun te Uzías te jich pujk bael skʼoplal kʼalalto ta Egipto. 9 Jaʼnix jich la spas tsʼajkʼetik yuʼun yilojibal kʼinal ta Jerusalén ta stsʼeel te Puerta yuʼun Xujk te jich sbiil, ta stsʼeel te Puerta yuʼun Spamlej sok ta stsʼeel te Yiptajib Tsʼajkʼ, jaʼnix jich la yakʼtiklanbeyxan yip. 10 Soknix la spas tsʼajkʼetik yuʼun yilojibal kʼinal ta jochol takin kʼinal sok la sjokʼ* bayal pozoetik (melel bayal schambalam); jaʼnix jich la spastiklan-euk ta Sefelá sok ta spamlej kʼinal. Sok ay swiniktak te ya yaʼiyik tsʼunbajel ta skʼinal sok ay swiniktak te ya x-aʼtejik ta tsʼusubiltik yuʼun te ayik ta witstikil sok ta Carmelo, melel kʼaxto ya smulan te tsʼunbajele.

11 Jaʼnix jich, te Uzías ayin bayal soldadoetik yuʼun te chapalik ta lek sok yaʼtejibik ta yakʼel guerra. Chajpanbilik ta lek ta jujuntsojb te soldadoetik te kʼalal ya xlokʼik ta yakʼel guerra. La yichʼik ajtayel sok najkanbeyel sbiilik yuʼun te secretario Jeiel sok te Maaseya te yichʼoj mukʼ yaʼtel, te jaʼ wentainbilik yuʼun te Hananías te yichʼojxan mukʼ yaʼtel ta stojol te ajwalile. 12 Ay 2 mil 600 ta tul te jolaletik yuʼun te jujunchajp stsʼumbal te antiguo smeʼ statik te swentainojik te soldadoetik-abi te ay yipik ta yakʼel guerra. 13 Jaʼnix jich swentainojik 307 mil 500 ta tul soldadoetik te chapalik ta lek sok yaʼtejibik soknix te chapalik ta yakʼel guerra. Jaʼ soldadoetik te ay yipik ta yakʼel guerra yuʼun ya skoltayik te ajwalil ta stsalel te skontratake. 14 Te Uzías la schajpan ta lek spisil te soldadoetik yuʼun, la yakʼbey smajkilik, slanzaik, smajkil sjolik, smajkil yoʼtanik, stʼimalteʼik sok stonil sjimochʼik. 15 Jaʼnix jich la spas mukʼul maquinaetik yuʼun guerra ta Jerusalén, jaʼ la spasik te pʼijil winiketik; la yakʼik ta toyol tsʼajkʼetik sok ta jujunxujk yuʼun te tsʼajkʼetike, ya xjuʼ ya stʼimuyik flechaetik sok ya xjuʼ ya schʼojik mukʼul tonetik. Jich pujk bael skʼoplal ta bayuk, melel kʼax bayal la yichʼ koltayel sok la stsakxan yip te wentainel yuʼune.

16 Pero, jaʼnax te kʼalal la stsakxan yip te Uzías, la stoy sba, jich la sle swokol sok maba jun yoʼtan la yakʼ sba ta stojol te Jehová te Dios yuʼun, melel och bael ta templo yuʼun te Jehová ta schikʼel pom ta skajtajib schikʼojibal pom. 17 Te sacerdote Azarías sok 80 ta tul sacerdoteetik yuʼun Jehová te ma xiw yoʼtanik snutsojik ochel te ajwalile. 18 La skomik te ajwalil Uzías sok jich la yalbeyik: «¡Uzías, ma jaʼuk ay ta awenta schikʼel pom ta stojol te Jehová! Jaʼnax te sacerdoteetik ya xjuʼ ya schikʼik pom, melel jaʼ stsʼumbalik te Aarón, jaʼik te machʼatik chʼultesbilike. Lokʼan bael ta chʼul awilal, melel maba jun awoʼtan la awakʼ aba sok ta swenta te bin la apase maba ya yakʼbat awutsilal te Jehová Diose».

19 Pero, te Uzías te stsakoj-a te yawil schikʼojibal pom yuʼun ya schikʼ pom, kʼax bayal ilin. Te kʼalal kʼax bayal ilinem ta stojol-a te sacerdoteetik, lokʼ tal kʼaʼel chamel ta stiʼba, tekʼel ta stojol-a te sacerdoteetik ta sna te Jehová ta stsʼeel te skajtajib schikʼojibal pom. 20 Kʼalal te Azarías te jwolwanej yuʼun te sacerdoteetik sok spisil te sacerdoteetik la yilik te Uzías, ¡lokʼemix kʼaʼel chamel ta stiʼba-a! Jich yuʼun la slokʼesik bael ta oranax, jaʼnix jich ora lokʼ bael-euk, melel ejchentesot yuʼun te Jehová.

21 Te ajwalil Uzías yichʼoj kʼaʼel chamel jaʼto te kʼalal laj baele. Ta swenta te yichʼoj kʼaʼel chamel parte bajt ta nainel, melel ma xjuʼ ya x-ochix ta sna te Jehová. Te Jotán te snichʼane jaʼ jajch ta swentainbeyel te sna* te ajwalil sok jaʼ la schajpan te ants winiketik yuʼun te lume.

22 Te bintik la spas ta skuxlejal te Uzías jaʼ la stsʼibay jilel ta sjajchibal kʼalalto ta slajibal te j-alwanej Isaías snichʼan Amoz. 23 Jich te Uzías way sbakʼetal sok te antiguo smeʼ stat sok la smukik te banti mukul te antiguo smeʼ stat, pero la smukik ta mukenal te nopol* ay te banti mukajtik te ajwaliletik, melel jich la yalik: «Yichʼoj kʼaʼel chamel». Tey-abi, jaʼ och jilel ta ajwalil te Jotán, te snichʼane.