Deuteronomio
32 «Aʼiya awaʼiy, chʼulchan, yame xkʼopojon
sok akʼa yaʼiy te balumilal te bin ya kal.
2 Te nojptesel kuʼun jichme ya xyal koel te bin-utʼil jaʼal,
te kʼopetik kuʼun jichme ya xtʼulaj koel te bin-utʼil tsʼujul,
jich te bin-utʼil kʼunil jaʼal te ya xko tal ta sba akiltik,
jich te bin-utʼil tulan jaʼal te ya xko tal ta spisil te bin ya xchʼi ta lumkʼinal.
3 Melel ya jpuk ta alel sbiil te Jehová.
¡Akʼaik ta naʼel smukʼul te Dios kuʼuntik!
4 Jaʼ Mukʼul Ton stukel, kʼax lek spisil te bin ya spase,
melel toj spisil te beetik yuʼune.
Jaʼ jun Dios te jun yoʼtan te maʼyuk bin-ora ya spas te bin ma stojile.
Jaʼ toj sok jaʼ smelelil stukel.
5 Jaʼik te machʼatik boloben yoʼtanik.
Ma jaʼuk yal snichʼnab te Dios ta skaj te bin ma lek spasojike.
¡Jaʼ jkaj tsʼumbalil te kʼax ma lek stalelik sok chopol* yoʼtanik!
6 ¿Jichbal ya skʼan ya apasbeyik te Jehová,
jaʼex lumex te ma xa anaʼik kʼinal sok te maʼyuk spʼijil awoʼtanik?
¿Mabal jaʼuk aTatik te la yakʼ chiknajukex,
te la spasex sok la yakʼbeyex awiptajibik jich bitʼil nación?
7 Julukme ta awoʼtanik te bin kʼoem ta pasel ta atojolike,
nopilaname ta awoʼtanik te jayeb jaʼbil kʼaxem ta stojol te kajalkaj tsʼumbaliletik.
Jojkʼoybeya te atatik, jaʼ ya scholbeyex awaʼiyik;
jojkʼoybeya te machʼatik ayix yaʼbilalik, jaʼme ya yalbeyex awaʼiyik.
8 Kʼalal te Machʼa toyol ay la yakʼbey skʼinal te jujun nación,
kʼalal la xatiklan te yal snichʼnab te Adán,*
la yakʼbey smojonil* te jujunpam lumetik,
la yichʼ ta wenta te jayeb ta tul te yal snichʼnab te lum Israel.
9 Melel te bin jaʼ yuʼun te Jehová, jaʼ te lum yuʼun;
jaʼ te Jacob.
10 La sta ta jochol takin kʼinal,
ta jochol takin kʼinal te maʼyuk bin ay tey-a, te jaʼnax ya xchiknaj ta aʼiyel te yaw te chambalametik.
La sjoytay, la stojobtes bael,
sok la skanantay jich te bin-utʼil te yalalil sit.*
11 Jich te bin-utʼil águila te ya stij sba ta spechech,
te yak ta wilel ta sba te yalatak,
ya sjam te xikʼ, ya stsaktiklan
sok ya yikʼtiklan bael ta skʼukʼumal,
12 jaʼnax te Jehová ya stojobtes bael;
maʼyuk yan dios yuʼun te jyanlumetik te jokinbil yuʼun.
13 La yakʼ mouk bael ta toyol witsetik,
te jich la sweʼ te bin ya yakʼ te lumkʼinal.
La smakʼlin ta chab te lokʼesbil ta mukʼul ton
sok aceite te lokʼesbil ta tulan ton,
14 sok mantequilla* te pasbil ta schuʼ wakax sok leche yuʼun tuminchijetik,
te sjujpʼel* te lekil tuminchijetik,
te tentsunetik yuʼun Basán sok te tat tentsunetik,
jaʼnix jich te lekil trigo.
La awuchʼ vino te jaʼ yaʼlel te tsʼusube.
15 Kʼalal jujpʼ te Jesurún,* la stoy sba te jich jajch ta pujaw ta tekʼel.
Kʼax jujpʼat, mero mukʼubat sok mukʼub te achʼujte.
Jich yuʼun la yijkitay te Dios te pasot yuʼun,
la spʼaj te Mukʼul Ton yuʼun te skolele.
16 La sjachbeyik skʼajkʼal yoʼtan ta skaj te diosetik yuʼun te jyanlumetik;
la sjachbeyik yilinba sok te bintik ilobtik sba.
17 La yakʼbeyik milbil majtaniletik te pukujetik, ma jaʼuk te Diose,
diosetik te maba snaʼojbeyik sba-ae,
diosetik te achʼtonax chiknajik,
diosetik te maba snaʼojbeyik sba te antiguo ameʼ atatik.
18 Chʼay ta awoʼtanik te Mukʼul Ton te la spasat
sok chʼay ta awoʼtanik te Dios te la yakʼ chiknajukat.
19 Kʼalal te Jehová la yil ini, la spʼajtiklan,
melel jachbot yilinba yuʼun te skerem nichʼnabik sok te yantsil nichʼnabik.
20 Jich la yal: ‹Ya jwalakʼpatiyik
sok ya kil te bin ya xkʼot ta stojolik.
Melel jaʼ jkaj tsʼumbalil te kʼax chopolik,*
jaʼ alnichʼanetik te ma junuk yoʼtanik.
21 La sjachbonik kilinba ta skaj jun dios te ma diosuk;
la stijbonik skʼajkʼal koʼtan ta skaj te lokʼombaetik yuʼunik te ma xtuunik.
Ya jachbey slab yoʼtanik ta swenta te machʼatik ma lumuke;
ya kakʼ ilinukik ta swenta jpam nación te maʼyuk spʼijil yoʼtanike.
22 Melel tilix te kilinba
te ya schikʼ kʼalalto ta skʼubulil te Mukenal,*
ya slajin te balumilal sok spisil te bintik ya sitin tey-a
sok yame schikʼ te witstikil.
23 Yame jtoyesbey swokolik,
yame jtʼimuy bael ta stojolik te flechaetik kuʼun.
24 Yame xlajinbotik yipik yuʼun te wiʼnale,
yame xlajinotik yuʼun tulan kʼajkʼ sok tulan wokoliletik te ya xlajinwan.
Yame jtikun bael ta stojolik jtiʼawal chambalametik
sok svenenoil chambalametik te staslajan ya xbeenik ta lum.
25 Yame yichʼik milel ta espada te yal snichʼnabik ta fuera,
yame yaʼiyik tulan xiwel ta yutil naetik
te keremetik, te achʼixetik,
te chʼin alaletik sok te machʼatik sakix sjolik.
26 Jichniwan la kal: «Ya jpuktiklan bael sok
ya kakʼ te ya xchʼay skʼoplalik ta stojol te ants winiketik».
27 Pero maba la jkʼan te ya xbajt stoy sbaik te skontratakik,
melel ya xjuʼ te yan bin ya xkʼot ta yoʼtanik te skontratakik.
Jichniwan ya yalik: «Juʼ kuʼuntik ta swenta kiptik;
ma jaʼuk la spas te Jehová spisil ini».
28 Melel jaʼik jun nación te maʼyuk spʼijil yoʼtanik*
sok maʼyuk bin ya yichʼbeyik swentail.
29 ¡Lek te ayuk spʼijilike! Yaniwan snopbeyik skʼoplal spisil ini te jichuke.
Yaniwan snopik te bin-utʼil ya xkʼotik ta lokʼel.
30 ¿Bin-utʼil ay-a te jtulnax winik ya xjuʼ ya snuts bael jmil ta tul?
Sok ¿bin-utʼil ay-a te chaʼtulnax winiketik ya xjuʼ ya yakʼ anukik bael 10 mil ta tul?
Ma xjuʼ, jaʼnax ya xjuʼ te lajuk yichʼik chonel yuʼun te Mukʼul Ton yuʼunik
sok te lajuk yichʼik akʼel yuʼun te Jehová ta skʼab te skontratakik.
31 Melel te mukʼul ton yuʼunik ma pajaluk sok te Mukʼul Ton kuʼuntik,
hasta te jkontrataktik snaʼojik-abi.
32 Melel te tsʼusubiltik talem ta Sodoma
sok ta skʼinal Gomorra.
Te sit tsʼusubiltik yuʼunik ay svenenoil
sok chʼa te chejpelchejp site.
33 Te svinoil jaʼ svenenoil jtiʼawal chanetik,
te svenenoil cobra-chanetik te ya xmilawane.
34 ¿Mabal jkʼejoj spisil te bintik spasojik
sok kakʼojbey selloil?
35 Joʼonme ya jsutbey spakol, joʼonme ya kakʼbey castigo
ta yorail te albil skʼoplal te ya xjaxpʼuj te yoke,
melel nopolix* yorail te ya sta swokolike
sok nopolix ya xtal swokolik te ay ta stojolike›.
36 Melel te Jehová yame yichʼ ta kʼop te lum yuʼun
sok ya snaʼbey yoʼbolil sba te j-abatetik yuʼun
te kʼalal ya yil te lajemix yipik
sok te jaʼnax jilemik te machʼatik ma xjuʼ skoltaybel sbaik sok te machʼatik pekʼel skʼoplalik.
37 Jichme ya yal: ‹¿Banti ay te diosetik yuʼunik
te mukʼul ton te jaʼ anibal yuʼunik,
38 te ya sweʼbeyik sjujpʼel* te milbil majtaniletik yuʼunik
sok te ya yuchʼik te vino yuʼun te malbil majtaniletik yuʼunik?
Akʼa talukik sok akʼa skoltayex.
Akʼa kʼotuk jich bitʼil anibal awuʼunik.
39 Ilawil ta ora ini te joʼon, joʼon-nax Dioson,
maʼyuk yantik diosetik jich te bin-utʼil te joʼone.
Joʼon ya kakʼ lajel, sok joʼon ya kakʼ kuxlejal.
Joʼon ya x-ejchenteswanon, sok joʼon ya xpoxtaywanon,
maʼyuk machʼa ya xjuʼ ya skoltay lokʼel yan ta jkʼab.
40 Ya jtoy moel jkʼab ta chʼulchan
sok jamal ya kal te «kuxulon ta sbajtelkʼinal»,
41 te kʼalal ya juxbey yeʼ te espada kuʼun te xlemetnaxe
sok ya jchajpan jkʼab yuʼun ya jpas te bin stojil,
yame kakʼbey spakol te jkontratak,
sok yame kakʼbey castigo te machʼatik ya spʼajonike.
42 Yame jyakubtes ta chʼichʼ te flechaetik kuʼun
sok yame sweʼ tiʼbal te espada kuʼun:
te schʼichʼel te machʼatik lajemik sok te jchukeletik,
sok te sjolik te jwolwanejetik yuʼun te jkontratak›.
43 Nacionetik, tseʼelukme awoʼtanik sok te lum yuʼune,
melel yame yakʼbey spakol te schʼichʼel te j-abatetik yuʼun,
yame yakʼbey spakol te skontratak
sok yame slekubtesbey skʼoplal te kʼinal yuʼun te lum yuʼune».
44 Jich te Moisés bajt ta stojol te lum swenta ya yalbey spisil te kʼopetik yuʼun te kʼayoj ini, jokinbil bael yuʼun te Hosea* snichʼan Nun. 45 Kʼalal laj yoʼtan te Moisés ta yalbeyel te lum yuʼun Israel spisil te kʼopetik-abi, 46 jich la yal: «Ichʼaik ta mukʼ spisil te jultesel oʼtanil te yak kalbelex ta ora ini sok albeyaik ta mantal te awal anichʼnabik te yakuk spasik tulan ta schʼuunel spisil te bin ya yal te Ley ini. 47 Melel ma tojol kʼopetiknax ta atojolik, jaʼme ya xkuxinex yuʼun. Ta swenta te bin ya yal te Ley ini ya xjuʼ te jal ya xkuxinex ta kʼinal te ya awochintayik te kʼalal ya xkʼaxex bael ta yan jejch yuʼun te mukʼul jaʼ Jordán».
48 Ta kʼajkʼalnix-abi te Jehová kʼopoj sok te Moisés, jich la yalbey: 49 «Moan bael ta witstikil Abarim, ta wits Nebo —te ay ta skʼinal Moab, ta stojol bael Jericó—, yuʼun ya awil te skʼinal Canaán te ya kakʼbey skʼinalinik te israeletik. 50 Ta wits te banti ya xmoat bael, teyme ya xlajat-a, jich ya awichʼ mukel sok te antiguo ameʼ atat, jich te bitʼil laj te abankil Aarón ta wits Hor te la yichʼ mukel sok te antiguo smeʼ state, 51 melel ma junuk awoʼtanik la awakʼ abaik ta achebalik ta yolil te israeletik ta nopol* slokʼib jaʼ Meribá te ay ta Cadés, ta jochol takin kʼinal Zin, kʼalal maba la awakʼik ta ilel ta stojol te lum yuʼun Israel te chʼul Dioson. 52 Namal* ya awil te kʼinale, pero maba ya x-ochat ta kʼinal-abi te ya kakʼbey te lum yuʼun Israel».