Deuteronomio
10 »Ta yorail-abi, te Jehová jich la yalbon: ‹Pasa chaʼpejch tonetik jich te bin-utʼil la apas ta nailal sok moan tal ta wits te banti ayone. Jaʼnix jich pasa jun kaxa te pasbil ta teʼ. 2 Ya jtsʼibay tey-a te bin la jtsʼibay ta sbabial tonetik te la awuytiklane, jaʼatnix ya awotses ta kaxa›. 3 Jaʼ yuʼun la jpas jun kaxa ta acacia-teʼ sok chaʼpejch tonetik jich te bitʼil ta nailal. Ta patil moon bael ta wits, jtsakoj moel te chaʼpejch tonetik. 4 Jich yuʼun la stsʼibay ta pejchel tonetik te kʼopetik te la stsʼibay ta nailale, te Lajuneb Mantaliletik,* te yakʼojbeyexix-a te Jehová ta wits, ta yolil te kʼajkʼ, ta yorail te la jtsob jbatike. Ta patil la yakʼbon te Jehová. 5 Tey-abi sujton koel tal ta wits sok la kotses te pejchel tonetik ta yutil te kaxa te joʼon-nix la jpase, te teyto ayik ta ora ini jich te bitʼil la yalbon ta mantal te Jehová.
6 »Ta patil lokʼikxan bael te israeletik ta Beerot Bene-Jaacán, bajtik ta Moserá. Jaʼ te banti laj te Aarón sok tey la yichʼ mukel-a, jaʼ la sjelolin ochel ta sacerdoteil te Eleazar, te snichʼane. 7 Tey-abi lokʼik bael, bajtik ta Gudgoda; lokʼik bael ta Gudgoda, bajtik ta Jotbatá te jaʼ jpam kʼinal te ya x-okin* bayal jaʼetik tey-a.
8 »Ta yorail-abi, te Jehová parte la yakʼ te stsʼumbal te Leví yuʼun jaʼ ya skuchik bael te skaxaul te chapbilkʼop yuʼun te Jehová sok yuʼun ya x-ayinik ta stojol te Jehová swenta ya x-abatinik ta stojol sok yuʼun ya yakʼbeyik bendición te lum ta sbiil te Dios, jich te bitʼil yakik ta spasel ta ora ini. 9 Jaʼ yuʼun, te Leví maba la yichʼ akʼbeyel skʼinal te banti skʼinal te yermanotak. Te Jehová ya yakʼbey te bin ya xtuun yuʼun, jich te bin-utʼil albot ta jamal yuʼun Jehová te Dios yuʼune. 10 Jich te bin-utʼil nail jpasojix-ae jilon ta wits 40 kʼajkʼal sok 40 ajkʼabal, jaʼnix jich ta yorail-abi te Jehová la yaʼiybon jkʼop. Te Jehová maba la skʼan slajinex. 11 Tey-abi, te Jehová jich la yalbon: ‹Nailajan bael ta stojol te lume yuʼun ya achajpan aba te ya xlokʼat bael liʼi, yuʼun ya x-och yochintayik te kʼinal te jamal la kalbey te antiguo smeʼ statik te ya kakʼbeyike›.
12 »Ta ora ini, lum yuʼun Israel, ¿bin yak skʼanbelex te Jehová te Dios awuʼunike? Jaʼnax te ya axiʼik te Jehová te Dios awuʼunik, te ya atʼunik spisil te beetik yuʼun, te kʼuxuk ta awoʼtanik sok te yakuk awakʼ abaik ta abatinel ta stojol te Jehová te Dios awuʼunik ta spisil awoʼtanik sok ta spisil akuxlejalik 13 sok te ya achʼuunik spasel te mantaliletik yuʼun sok te bintik yaloj te Jehová te yak kalbelex ta mantal ta ora ini. 14 Ilawilik, te Jehová te Dios awuʼunik jaʼ yuʼun te chʼulchan, jaʼnix jich te chʼulchan te toyolxan aye, sok te balumilal sok spisil te bintik ay tey-ae. 15 Pero, te Jehová jaʼnax noptsaj* ta stojol te antiguo ameʼ atatik sok la yakʼtiklanbey yil te skʼuxul yoʼtan. Jaʼex te stsʼumbalex, la awichʼik tsael ta spisil te yantik lumetik jich te bitʼil ya awilik ta ora ini. 16 Ta ora ini yame skʼan ya alekubtes* awoʼtanik sok mame xa atoyix abaik. 17 Melel te Jehová te Dios awuʼunik jaʼ te Dios yuʼun yantik diosetik sok jaʼ Ajwalil yuʼun yantik ajwaliletik, jaʼ mukʼul Dios, ay yuʼel sok kʼaxtoxan ya skʼan xiʼel stukel, te maʼyuk machʼa tsabilnax yuʼun sok te ma stsak majtanil te kʼalal ya xchajpanwane. 18 Ya spasbey te bin stojil te alaletik te lajem statik sok te meʼba antsetik, kʼux ta yoʼtan te jyanlumetik, ya yakʼbey sweʼelik sok skʼuʼ spakʼik. 19 Jichme ya skʼan te kʼux ta awoʼtanik-euk te jyanlumetik, melel jyanlum kʼoex ta skʼinal Egipto.
20 «Yame skʼan ya axiʼik te Jehová te Dios awuʼunik. Jaʼnaxme ya skʼan ya x-abatinex ta stojol sok jaʼnax ya awakʼ abaik ta stojol, sok jaʼnaxme ta swenta sbiil te ay bin ya awalik ta jamal. 21 Jaʼnax te machʼa ya skʼan ya awalbey yutsil skʼoplal. Jaʼ te Dios awuʼunik te la spas ta atojolik spisil te bintik mukʼ sok te bintik yan-nax awilojike. 22 70 ta tul te antiguo ameʼ atatik te kʼalal koik bael ta Egipto, pero ta ora ini te Jehová te Dios awuʼunik la yakʼ te kʼax bayalexix ta tul jich bin-utʼil te ekʼetik ta chʼulchan.