Deuteronomio
30 »Kʼalal ya xkʼot ta pasel ta atojolik spisil te kʼopiletik ini —te bendición sok te chopol* kʼoplalil te kakʼoj ta atojolik— sok ya xjul ta awoʼtanik ta spisil te nacionetik te banti ya spukex bael te Jehová te Dios awuʼunik, 2 te ya sujtex tal sok te awal anichʼnabik ta stojol te Jehová te Dios awuʼunik sok te ya awaʼiybeyik skʼop ta spisil awoʼtanik sok ta spisil akuxlejalik jich te bitʼil spisil te bintik yakon ta yalbelex ta mantal ta ora ini, 3 jich te Jehová te Dios awuʼunik yame yikʼex sujtel tal te banti ikʼbilex bael ta chukel-ae, ya snaʼbeyex yoʼbolil abaik, ya schaʼtsobex tal ta yolil te lumetik te banti la spukex bael te Jehová te Dios awuʼunik. 4 Manchukme namalto* pujkemex bael kʼalalto ta yeʼtal chʼulchan, teyto-a te Jehová te Dios awuʼunik yame schaʼtsobex tal sok teyto ya yikʼex tal-a. 5 Te Jehová te Dios awuʼunik yame yikʼex bael ta kʼinal te la yochintayik te ameʼ atatik, jaʼme awuʼunik ya xkʼot, yame yakʼ xpʼol te bintik ay awuʼunik sok ya yakʼ te kʼax bayal ya xkʼoex kʼaxtoxan-a te bin-utʼil te ameʼ atatik. 6 Te Jehová te Dios awuʼunik yame slekubtesbeyex awoʼtanik sok te yoʼtan te atsʼumbalik yuʼun jich kʼux ya awaʼiy ta awoʼtanik te Jehová te Dios awuʼunik ta spisil awoʼtanik sok ta spisil akuxlejalik yuʼun jich ya ataxan akuxlejalik. 7 Jich te Jehová te Dios awuʼunik yame stikun spisil te chopol* kʼoplalil ini ta stojol te akontratakik te la spʼajex sok te la snutsex.
8 »Jich yame sujtex tal, ya awaʼiybeyik skʼop te Jehová sok ya achʼuunik spasel spisil te mantaliletik yuʼun te yak kalbelex ta ora ini. 9 Te Jehová te Dios awuʼunik yame yakʼ te bayal ya xpʼol spisil te bintik ya apasike, ya yakʼ te kʼax bayal ya xkʼot te awal anichʼnabik, te achambalamik sok te sit awal tsʼunubiletik awuʼunik, melel te Jehová lek ya xbajt yil yan buelta te ya xpʼol te bintik ay awuʼunik jich te bitʼil lek la yil te pʼol te bintik ay yuʼun te antiguo ameʼ atatik. 10 Jich ya xkʼot ta pasel ta atojolik, melel ya xbajt awaʼiybeyik te skʼop te Jehová te Dios awuʼunik sok ya xbajt achʼuunik spasel te mantaliletik yuʼun sok te bintik yaloj, te tsʼibaybil jilel ta libro yuʼun te Ley ini, jich yame sujtex tal ta stojol te Jehová te Dios awuʼunik ta spisil awoʼtanik sok ta spisil akuxlejalik.
11 »Te mantaliletik te yak kalbelex ta ora ini ma wokoluk ta chʼuunel awuʼunik sok maba namal* ay ta atojolik. 12 Maba ay ta chʼulchan te jich ya awalik yuʼun: ‹¿Machʼa ya xmo bael ta chʼulchan swenta ya yichʼbotik tal yuʼun ya kaʼiytik sok ya jchʼuuntik spasel?›. 13 Jaʼnix jich maba ay ta jejch mar te jich ya awalik yuʼun: ‹¿Machʼa ya xkʼax bael ta jejch mar swenta ya yichʼbotik tal yuʼun ya kaʼiytik sok ya jchʼuuntik spasel?›. 14 Melel mero nopol* ay ta atojolik te jkʼope, ay ta aweʼik sok ta awoʼtanik yuʼun jich ya akʼotesik ta pasel.
15 »Ilawilik, ta ora ini ya kakʼ ta atojolik te kuxlejalil sok te bin lek, te lajel sok te bin chopol.* 16 Teme ya awaʼiybeyik te mantaliletik yuʼun te Jehová te Dios awuʼunik te yak kalbelex ta ora ini, te kʼalal kʼux ta awoʼtanik te Jehová te Dios awuʼunik, te ya xbeenex ta beetik yuʼun sok te kʼalal ya achʼuunik spasel te mantaliletik yuʼun, te bintik yaloj sok te bintik schapoj, jichme ya ataxan akuxlejalik sok ya xpʼolex, jich te Jehová te Dios awuʼunik yame yakʼbeyex bendición ta kʼinal te ya xbajt awochintayike.
17 »Pero, teme ya xnamaj* te awoʼtanik te jich maba ya awaʼiybeyikix skʼop, ya awakʼ abaik ta loʼlayel, ya akejan abaik ta stojol yantik diosetik sok ya awakʼ abaik ta abatinel ta stojolik, 18 ta ora ini ya kalbeyex te yananix xlajex-ae. Maba jal ya xkuxinex ta kʼinal te ya xbajt awuʼuninik te kʼalal ya xkʼaxex bael ta mukʼul jaʼ Jordán. 19 Ta ora ini ya kakʼ ta testigo ta atojolik te chʼulchan sok te balumilal te la kakʼ ta atojolik te kuxlejal sok te lajel, te bendición sok te chopol* kʼoplalil. Yame skʼan ya atsaik te kuxlejalil teme jaʼex sok te atsʼumbalik ya akʼan ya xkuxinex, 20 jaʼ yuʼun kʼuxuk ta awoʼtanik te Jehová te Dios awuʼunik, aʼiybeyaik te skʼop sok junuk awoʼtan tʼunaik, melel jaʼ kuxlejal awuʼunik sok jaʼ ta swenta te jal ya xkuxinex ta kʼinal te jamal la yalbey Jehová te antiguo atatik Abrahán, Isaac sok Jacob».