Proverbios
22 Jaʼ lekxan te machʼa lek skʼoplal, ma jaʼuk te kʼax bayal skʼulejal;
jaʼ lekxan te ichʼel ta mukʼ, ma jaʼuk te plata sok te oro.
2 Te jkʼulej sok te pobre pajalik:
ta schebalik pasbilik yuʼun te Jehová.
3 Te machʼa ay spʼijil yoʼtan ya snakʼ sba te kʼalal ya yil te yak ta talel te wokolil,
pero te machʼa maʼyuk bin ya snaʼ tojnax ya xkʼax bael, jich ya sta swokol.*
4 Te bin ya xlokʼ-a te pekʼel oʼtanil sok te xiʼel te Jehová
jaʼ kʼulejalil, utsilal sok kuxlejalil.
5 Te sbe te machʼa ma toj yoʼtan nojel ta chʼix sok ta pejtsʼetik,
pero te machʼa ay skʼoplal ta yoʼtan te skuxlejal namalto* ya yakʼ sba stukel.
6 Nojptesa te chʼin kerem* ta be te banti ya skʼan ya stʼun,
jich maba ya yijkitay te be ni jaʼuk te kʼalal ya xmamalub.
7 Te jkʼulej ya swentain te pobre,
te machʼa ay bin ya smajan jaʼme ya xmosoinot yuʼun te machʼa ay bin la skʼanbey ta majanele.
8 Te machʼa ya stsʼun te bin ma stojiluk ta pasel jaʼme ya stsobey sit te wokolil,
sok yame xlaj skʼoplal te sbaston yuʼun yilinba.
9 Te machʼa ay bin ya yakʼ yame yichʼ bendición,
melel te bin ya sweʼe jaʼnix jich ya yakʼbey-euk te pobre.
10 Lokʼesa bael te jlabanwanej,
jichme ya xlaj skʼoplal te kʼop;
yame xlaj skʼoplal te sjachel kʼop* sok te bolkʼoptayel.
11 Te machʼa jaʼ ya smulan te maʼyuk sbolil yoʼtan sok te ya stuuntes kʼopetik te tʼujbiliknax ta aʼiyel
yame yamigoin te ajwalile.
12 Te sit te Jehová jaʼ ya skanantay te bin ay ta naʼel,
pero yame sjinbey skʼop te jloʼlaywanej.
13 Te chʼajil ants winik jich ya yal: «¡Ay león-choj ta fuera!
¡Ya skʼan ya smilon ta yolil plaza!».
14 Te skʼop te ants te maba ay ta tojil be* jaʼ kʼubul chʼen.
Tey ya xchʼay ochel-a te machʼa maba lek ilbil yuʼun te Jehová.
15 Te kerem* spisil-ora ya yakʼ ta ilel te ma snaʼ kʼinal,
pero te xul o wajchʼ yuʼun tojobtesel jaʼme ya xkoltayot yuʼun.
16 Te machʼa ya yelkʼan te pobre yuʼun ya yakʼ xpʼol te skʼulejal
sok te machʼa ya yakʼbey smajtan te jkʼulej
yame x-akʼotik ta pobre yuʼun.
17 Tsʼechikintaya sok chʼama awaʼiy te bintik ya yalik te machʼatik ay spʼijil yoʼtanik
yuʼun ya awakʼ awoʼtan-a te bin ay ta naʼel kuʼun,
18 melel ya yakʼ tseʼel oʼtanil te kʼalal ya akʼej ta skʼubulil awoʼtan
te jich ya awalbey skʼoplal ta spisil-ora.
19 Ta ora ini yame kakʼbat te bin ay ta naʼel
yuʼun jich ya awakʼ smukʼul awoʼtan ta stojol te Jehová.
20 ¿Yuʼunbal ma la jtsʼibaybat tojobtesel sok te bin ay ta naʼel
21 swenta ya yakʼbat anop smelelil kʼopetik sok te ya xjuʼ ya schʼuun awoʼtan,
sok yuʼun jich smelelil te bin ya awalbey yaʼiy te ants winik te kʼalal ay bin ya sjojkʼoybate?
22 Ma xa awelkʼan te pobre ta skajnax te pobre
sok ma xa awutsʼin* te pobre ta yochibal te mukʼul lum,
23 melel te Jehová yame skoltay te pobreetik yuʼun toj ya yichʼik chajpanel
sok yame smiltiklan te machʼatik ya x-elkʼanotik yuʼune.
24 Ma xa ajokin te machʼa ya x-ilin
sok mame xa ajokin te machʼa oranax ya x-ilin,
25 mame jaʼuk te ya anop stʼunel te beetik yuʼun
te jaʼatnix ya awakʼbey aba apejtsʼul.
26 Mame jichukat te bitʼil machʼa ya yakʼ skʼab yuʼun ya spas trato,
jaʼ te machʼatik ya stejkʼan sbaik ta stojel betil.
27 Teme maʼyuk bin ya atoj-a te abete,
¡hasta te awayib te banti wayalat yame awichʼ pojbeyel bael!
28 Mame xa ajelbey yawil te antiguo smojonil* kʼinal
te la yakʼ jilel te antiguo ameʼ atat.
29 ¿Aybal machʼa awiloj te ya snaʼ spasel ta lek te yaʼtele?
Yame xkʼot stejkʼan sba ta stojol ajwaliletik,
ma jaʼuk ta stojol joch ants winiketiknax.*