Eclesiastés

8 ¿Machʼa pajal sok te machʼa ay spʼijil yoʼtan? ¿Machʼa ya snaʼ schajpanel jun wokolil? Te spʼijil yoʼtan te winik ya slekubtesbey sit yelaw sok ya skʼunubtesbey te tulan sit yelawe.

2 Jich ya kal: «Chʼuunbeya te mantaliletik yuʼun te ajwalil ta skaj te ay bin jamal awaloj ta stojol te Diose. 3 Mame orauk ya xlokʼat ta anel ta stojol. Mame xa akoltaybey skʼoplal te bin ma lek ta pasel, te ajwalil ya xjuʼ ya spas te bin ya skʼan yoʼtan, 4 melel te skʼop te ajwalil yananix skʼan ya yichʼ pasel-a. Maʼyuk machʼa jich ya xjuʼ ya sjojkʼoybey ‹¿Bin yakat ta spasel?›».

5 Te machʼa ya schʼuun spasel te mantaliletik maba ya yil swokol, te machʼa ay spʼijil yoʼtan ya snaʼbey lek yorail sok te bin-utʼil lek ta chajpanel. 6 Te bin jujunchajp ya yichʼ pasel ay yorail sok ay bin-utʼil ya yichʼ pasel, melel te wokoliletik yuʼun te ants winiketik mero kʼax bayal. 7 Ta skaj te maʼyuk machʼa ya snaʼ te bin ya xkʼot ta pasele, ¿machʼa ya xjuʼ ya yal te bitʼil ya xkʼot ta pasele?

8 Maʼyuk jtuluk ants winik ya xjuʼ ya swentain te yip te kuxlejalil o ya yakʼ te ya xjalaj te kuxlejalil, jaʼnix jich maʼyuk machʼa ya xjuʼ ya swentain te skʼajkʼalel te lajele. Jich bitʼil jtul soldado maba ya yichʼ akʼel bael ta yorail guerra, jaʼnix jich maba libre ya xjilik te machʼatik ya spasik te bin chopole.*

9 La kil spisil-abi sok jajch jnopbey skʼoplal spisil te bintik ya yichʼ pasel ta balumilal te jayeb tiempo te winik swentainoj te yan winik yuʼun ya yakʼbey swokol. 10 La kil te bitʼil ya yichʼ mukel te machʼatik chopolik,* jaʼik te machʼatik ya x-ochik sok ya xlokʼik tal ta chʼul awilal, pero ta oranax ya yichʼik chʼayel ta oʼtanil ta mukʼul lum te banti la spasik te bintik chopole. Jaʼ-abi tojolnax-euk.

11 Te bitʼil maba ya yichʼ alel ta oranax te bin castigo ya yichʼ akʼel ta swenta te ay bin chopol* ya yichʼ pasel, maʼyukix xiwel ta yoʼtan te ants winiketik ta spasel te bin chopole. 12 Manchukme 100 buelta ya spas te bin chopol* jtul jmulawil sok te jal ya xkuxin, ya jnaʼ te lek ya xkʼotik ta lokʼel te machʼatik ya xiʼik te smelelil Dios, melel yananix xiʼik-a. 13 Melel te machʼa chopole* maba lek ya xkʼot ta lokʼel sok maba ya xnajtub te skuxlejale, te jich kʼoem bin-utʼil axinal, melel maba ya xiʼ te Diose.

14 Ay bin ya yichʼ pasel ta balumilal te maʼyuk swentail: ay machʼatik te toj yoʼtanik te ya yichʼik pasbeyel te bin ay ta swenta te machʼatik ya spasik te bin chopole,* sok ay machʼatik te chopol yoʼtanik te ya yichʼik pasbeyel te bin ay ta swenta te machʼatik ya spasik te bin stojile. Jaʼnix jich ya kal te tojolnax-euk.

15 Jaʼ yuʼun la kal te jaʼ lekxan te tseʼel oʼtanil, melel ta balumilal jaʼ lekxan ta stojol te winik te ya xweʼ x-uchʼaj sok te bujtsʼanuk kʼinal ya yaʼiy, jich ya skʼan ya x-ayin te kʼalal ya x-aʼtej te jayeb kʼajkʼal ya x-akʼbot skuxlejal yuʼun te smelelil Dios ta balumilal.

16 La kakʼ ta koʼtan sleel pʼijil oʼtanil sok ta yilel spisil te aʼteliletik te ya yichʼ pasel ta balumilal, hasta maba wayon ta kʼajkʼal ajkʼabal.* 17 Tey-abi la jnopbey skʼoplal spisil te yaʼtel te smelelil Dios, la kil te ma xjuʼ yuʼun te ants winiketik yichʼbeyel swentail te bin ya xkʼot ta pasel ta balumilal. Manchukme ya spas tulan te ants winik ta yichʼbeyel swentail, ma xjuʼ yuʼun. Manchukme ya yalik te ay bayal spʼijilik ta snaʼel, mananix ya xjuʼ yuʼunik yichʼbeyel swentail-a.