2 Reyes

20 Ta yorail-abi, te Ezequías tsakot ta chamel sok jtebxanix kʼan lajuk yuʼun. Te j-alwanej Isaías snichʼan Amoz tal yil sok jich la yalbey: «Jich ya yal te Jehová: ‹Albeya te machʼatik ay awuʼun te bin ya skʼan ya spasik, melel ya xlajat. Maba ya xlekubat›». 2 Te kʼalal jich la yaʼiy stojol te Ezequías, la sut sit ta pajkʼ sok jajch skʼopon te Jehová: 3 «Awokoluk, Kajwal, Jehová, ya jkʼanbat te manchuk ya xchʼay ta awoʼtan te jun koʼtan jtʼunoj te beetik awuʼun sok te jaʼ jpasoj te bintik lek ta asite». Tey-abi jajch ta tulan okʼel te Ezequías.

4 Te kʼalal mato xkʼot-a te Isaías ta yamakʼul sna te ajwalil, jich jul ta stojol te skʼop te Jehová: 5 «Sujtan bael sok jich xa awalbey te Ezequías te jwolwanej yuʼun te lum kuʼun: ‹Jich ya yal te Jehová te Dios yuʼun te David te antiguo atat: «La kaʼiybatix te akʼope. La kilix te yaʼlel asit. Yame jlekubtesat. Ta yoxebal kʼajkʼal yame xmoat bael ta sna te Jehová. 6 Yame jnajtubtesbatxan 15 jaʼbil te akuxlejal, yame jkoltayat lokʼel ta skʼab te ajwalil yuʼun Asiria soknix-euk te mukʼul lum ini. Yame jkoltay te mukʼul lum ini ta swenta te jbiil sok ta swenta te David te j-abat kuʼune»›».

7 Jich la yal te Isaías: «Ichʼaik tal wotsʼbil tenbil takin higo». La yichʼbeyik tal sok la sjaxbeyik ta skʼaʼel chin* te Ezequías. Jich kʼunkʼun lekub bael te yejchene.

8 Te Ezequías jich sjojkʼoybeyojix-a te Isaías: «¿Bin señail ya yakʼbon te Jehová yuʼun ya jnaʼ te ya xlekubon sok te ya xmoon bael ta sna te Jehová ta yoxebal kʼajkʼal?». 9 Jich albot yuʼun te Isaías: «Jaʼme señail yuʼun Jehová ini swenta ya yakʼbat awil te ya skʼotes ta pasel te bin la yal te Jehová: ¿jaʼbal ya akʼan te ya xbeen koel lajunkaj te axinal ta escalerae,* o jaʼbal ya akʼan te ya sujt moel lajunkaje?». 10 Jich la yal te Ezequías: «Jaʼ ma wokol te ya xbeen koel lajunkaj te axinal ta escalera, jaʼ wokolxan te ya sujt moel lajunkaje». 11 Jich yuʼun, te j-alwanej Isaías la skʼanbey wokol te Jehová, jich yuʼun te Diose la yakʼ sujtuk lajunkaj te axinal ta escalera yuʼun Acaz.

12 Ta yorail-abi, te Berodac-Baladán snichʼan Baladán te ajwalil yuʼun Babilonia la stikunbey cartaetik sok majtaniletik te Ezequías, melel la snaʼ stojol te ay ta chamel-ae. 13 Te Ezequías sok sbujtsʼ yoʼtan la yikʼ ta stojol te winiketik te tikunbilik tal yuʼun te ajwalil sok la yakʼtiklanbey yil te sna te banti ay spisil te skʼulejale: te plata, oro, aceite te sumetnax yikʼ* sok yantikxan aceite te lekiknax, te yawil aʼtejibaletik yuʼun guerra sok spisil te bintik ay ta yawil skʼulejal. Spisil la yakʼ ta ilel te bintik ay ta sna* te Ezequías soknix te bantito kʼalal swentainoje.

14 Ta patil och bael te j-alwanej Isaías te banti ay te ajwalil Ezequías sok jich la sjojkʼoybey: «¿Bin la yalik te winiketike? ¿Banti talemik?». Jich la yal te Ezequías: «Kʼax namal* te banti talemik, talemik ta Babilonia». 15 Jich la sjojkʼoyxan te Isaías: «¿Bin la awakʼtiklanbey yil ta ana?». Jich la sjakʼ te Ezequías: «Spisil la yilik te bintik ay ta jnae. Spisil la kakʼbey yil te jkʼulejale».

16 Te Isaías jich la yalbey te Ezequías: «Aʼiya awaʼiy te bin ya yal te Jehová: 17 ‹¡Ilawil! Yakme ta noptsajel* te skʼajkʼalel te ya yichʼ ichʼel bael ta Babilonia spisil te bintik ay ta ana sok spisil te bintik stsoboj te antiguo ameʼ atat. Maʼyuk bin ya xjil —xchi te Jehová—. 18 Ayme chaʼoxtul ta atsʼumbal te ya x-ayinik* ta patil te ya yichʼik ikʼel baele. Yame yichʼ mukʼ yaʼtelik ta sna te ajwalil yuʼun Babilonia›».

19 Te kʼalal jich la yaʼiy stojol te Ezequías, jich la yalbey te Isaías: «Te skʼop te Jehová te la awale, kʼax lek». Jich la yalxan: «Kʼax lek, melel ya x-ayin lamalkʼinal te jayeb kʼajkʼal kuxulon sok jun koʼtantik ya xkuxinotik».

20 Te bintik la spas ta skuxlejal te Ezequías, spisil te bintik mukʼ skʼoplal la spas, te bitʼil la spas te estanque* sok te be jaʼ soknix te la yakʼ okinuk* bael kʼalalto ta mukʼul lum, tsʼibaybil jilel ta libro te ya scholbey skʼoplal te skuxlejal te ajwaliletik ta Judá. 21 Jich te Ezequías way sbakʼetal sok te antiguo smeʼ stat. Tey-abi, jaʼ och jilel ta ajwalil te Manasés, te snichʼane.