Carta ta stojol te Romanoetik

4 Jich yuʼun, ¿bin ya kaltik yuʼun te bin la sta te Abrahán, te antiguo jtatik? 2 Te jaʼuk toj la yichʼ ilel yuʼun Dios te Abrahán ta swenta te yaʼtele, ay bin la stoy sba yuʼun te jichuke, pero maba ta stojol te Diose. 3 Ta melel, ¿bin ya yal te sJun Diose? «Te Abrahán la yakʼ schʼuunel yoʼtan ta stojol te Jehová,* jich toj ilot yuʼun». 4 Te machʼa ya x-aʼteje ma smajtanuk te stojol ya yichʼe; melel yananix skʼan-a te stojole. 5 Yan stukel te machʼa ma x-aʼtej, pero ya yakʼ schʼuunel yoʼtan ta stojol te Dios te ya yal te jaʼ toj te machʼa chopole,* toj ya x-ilot yuʼun ta swenta te schʼuunel yoʼtane. 6 Jaʼnix jich, te David la yalbey skʼoplal te stseʼelil yoʼtan ya sta te winik te toj ya x-ilot yuʼun te Dios, pero ma jaʼuk ta swenta te yaʼtele: 7 «Tseʼelnax yoʼtanik te machʼatik la yichʼik pasbeyel perdón yuʼun te bintik chopol* la spasike sok te machʼatik la yichʼik pasbeyel perdón te smulike; 8 tseʼelnax yoʼtan te machʼa ma x-ichʼbot ta wenta yuʼun Jehová* te smule».

9 Jich yuʼun, ¿jaʼnaxbal ay stseʼelil yoʼtanik te machʼatik yichʼojik circuncisión,* o jaʼnix jich te machʼatik maba yichʼojik circuncisión? Melel la kaltikix: «Te Abrahán toj la yichʼ ilel yuʼun Dios ta swenta te schʼuunel yoʼtane». 10 ¿Bin-ora te toj ilot yuʼun te Diose? ¿Jaʼbal te kʼalal yichʼojix circuncisión-ae,* o jaʼbal te kʼalal mato yichʼoj-ae? Mato yichʼoj circuncisión-a te kʼalal toj ilot yuʼun te Diose. 11 La yichʼ akʼbeyel jun señail —jaʼ te circuncisión—* te jich kʼot te bin-utʼil sello te toj ilot yuʼun Dios ta swenta te schʼuunel yoʼtan te kʼalal mato yichʼoj circuncisión-ae. Jich kʼot ta pasel ini yuʼun jaʼ tatil kʼot yuʼunik spisil te machʼatik ay schʼuunel yoʼtanik manchukme maba yichʼojik circuncisión, yuʼun jich toj ya x-ilotik yuʼun te Diose, 12 soknix jaʼ tatil ya xkʼot yuʼunik te machʼatik yichʼojik circuncisión,* ma jaʼuknax ta stojol te machʼatik mukʼ skʼoplal ta yoʼtanik te circuncisión, jaʼnix jich-euk ta stojol te machʼatik ya stʼunbeyik te schʼuunel yoʼtan te la yakʼ ta ilel te jtatik Abrahán te kʼalal mato yichʼoj circuncisión-ae.

13 Ta melel, ma jaʼuk ta swenta te ley te la yichʼ albeyel te Abrahán o te stsʼumbal te ya x-akʼbot yichʼik te balumilal, jaʼ ta swenta te toj la yichʼ ilel yuʼun Dios ta skaj te schʼuunel yoʼtane. 14 Melel te jaʼuk ya yichʼik jilel te balumilal te machʼatik mukʼ skʼoplal ta yoʼtanik te ley, tojol ya xkʼot te chʼuunel oʼtanile sok ya xlaj skʼoplal te bin jamal yaloj Dios te jichuke. 15 Ta melel, te Ley ya yakʼ ilinba, pero te banti maʼyuk ley maʼyuk bin ya yichʼ kʼaxuntayel tey-a.

16 Jaʼ yuʼun, te bin jamal yaloj te Diose ya kichʼtik ta swenta te schʼuunel koʼtantik, melel jaʼ jun majtanil te yakʼojbotik te Diose, jich spisil te stsʼumbal Abrahán ya xjuʼ ya staik spisil te bin yaloj te Diose, ma jaʼuknax ta stojol te machʼatik mukʼ skʼoplal ta yoʼtanik te Ley, jaʼnix jich-euk ta stojol te machʼatik ya stʼunbeyik te schʼuunel yoʼtan te la yakʼ ta ilel te Abrahán, te jaʼ tatil kuʼuntik ta jpisiltik. 17 (Jich te bin-utʼil tsʼibaybile: «La kakʼ te tatil ya xkʼoat yuʼun bayal ta pam nacionetik»). Te Abrahán la yakʼ schʼuunel yoʼtan ta swenta te bin albot yuʼun te Diose. Jaʼ te machʼa ya xjuʼ ya yakʼbey skuxlejal te machʼatik lajemike sok te ya yalbey skʼoplal te bintik mato kʼoemuk ta pasel te kʼoemikix ta pasel yilele.* 18 Manchukme jich yilel te tojolnax te ay bin yak ta smaliyele, aynanix bin la smaliy-a sok la yakʼ schʼuunel yoʼtan te tatil ya xkʼot yuʼun bayal ta pam nacionetik, jich te bin-utʼil albil skʼoplale: «Jichme kʼax bayal ya xkʼot te atsʼumbale». 19 Manchukme maba pejkʼaj te schʼuunel yoʼtane, la sta ta ilel te maʼyukix yip te sbakʼetale (melel, ayniwanix 100 yaʼbilal-a) soknix la sta ta ilel te ma xjuʼ ya x-alajix te Sarae. 20 Maʼyuk bin-ora xchebet yoʼtan la schʼuun te bin albot yuʼun te Diose, kʼaxemtoxan la yichʼ yip ta swenta te schʼuunel yoʼtan. Jich la yalbey yutsil skʼoplal te Diose 21 sok la schʼuun yoʼtan ta jkʼaxel te ya skʼotes ta pasel te Dios te bin jamal albot yuʼune. 22 Jich yuʼun, «toj ilot yuʼun te Diose».

23 Pero, te kʼalal la yichʼ alel «toj la yichʼ ilel yuʼun te Dios», te xchie, ma jaʼuknax la yichʼ tsʼibayel ta stojol; 24 jaʼnix jich la yichʼ tsʼibayel ta jtojoltik-euk, te toj ya kichʼtik ilel, melel ay schʼuunel koʼtantik ta stojol te machʼa la schaʼkuxajtes tal te Kajwaltik Jesús ta yolil te machʼatik lajemike. 25 Jaʼ la yichʼ akʼel ta lajel ta swenta te jmultike sok la yichʼ chaʼkuxajtesel yuʼun jich toj ya kichʼtik ilel yuʼun te Diose.