Éxodo

18 Te Jetró, te sacerdote yuʼun Madián sok te jaʼ snial mamal* te Moisés, la snaʼ stojol spisil te bin la spas te Dios ta stojol te Moisés sok te lum yuʼun Israel. La snaʼ stojol bitʼil te Jehová la slokʼes tal te israeletik ta skʼinal Egipto. 2 Te Moisés stikunoj bael-a te yinam, te Ziporá sbiil, ta sna te Jetró te jaʼ snial mamal.* Te Jetró jaʼ yak swentainbel-a te Ziporá 3 sok te chaʼtul yalatake. Te Moisés la yakʼbey sbiil Guersom* te jtule, melel jich la yal: «Kʼoemon ta jyanlum ta kʼinal ini». 4 Te yane Eliezer* la yakʼbey sbiilin, melel jich la yal: «Jaʼ jkoltaywanej kuʼun te Dios yuʼun te jtate, la skoltayon lokʼel ta espada yuʼun te faraón».

5 Te Jetró la yikʼbey bael te snichʼnab te Moisés sok te yinam, bajt yilik ta jochol takin kʼinal. Tey spasoj scampamento-a te Moisés ta nopol* te wits yuʼun te smelelil Diose. 6 Jaʼ yuʼun, jich la stikun ta albeyel te Moisés: «Joʼon, te Jetró te anial mamalon,* ayon tal ta be sok te awinam sok te chaʼtul anichʼnab yuʼun tal kilatkotik». 7 Ta oranax, te Moisés lokʼ sta te snial mamal,* la skejan sba sok la yujtsʼuy,* talel kʼaxel la sjojkʼoybey sbaik te bin yilelike. Ta patil ochik ta yutil te nailpakʼ.

8 Te Moisés la scholbey yaʼiy te snial mamal* spisil te bin la spas te Jehová ta stojol te faraón sok te Egipto yuʼun ya skoltay te lum yuʼun Israel. Jaʼnix jich la scholbey yaʼiy spisil te wokoliletik la staik ta be sok te bitʼil koltayotik yuʼun te Jehová. 9 Bin-nax yoʼtan yuʼun te Jetró ta swenta spisil te bintik lek la spas te Jehová ta stojol te lum yuʼun Israel te kʼalal la skoltay lokʼel ta skʼab te egipcioetike. 10 Tey-abi, te Jetró jich la yal: «Akʼa yichʼ albeyel yutsil skʼoplal te Jehová te la skoltayex lokʼel ta skʼab te egipcioetik sok ta skʼab te faraón sok te la yakʼ ta libre te lum yuʼun ta skaj te yak ta mosoinel-a ta skʼinal Egipto. 11 Ta ora ini la jnaʼix te toyol ay te Jehová ta stojol te yantik diosetike. Jich ya jnaʼ ta swenta te bin la spasbey te machʼatik la yutsʼinik* te lum yuʼune». 12 Jaʼ yuʼun, te Jetró, te snial mamal* te Moisés, la yichʼ bael chikʼbil majtanil sok milbil majtanil ta stojol te Diose. Te Aarón sok spisil te jwolwanejetik yuʼun Israel bajtik ta weʼel sok te snial mamal te Moisés ta stojol te smelelil Diose.

13 Ta yan kʼajkʼal, te Moisés la snajkan sba jich bitʼil jchajpanwanej jichnix te bitʼil ya spas-ae. Ta sab jaʼto kʼalal ta mal kʼajkʼal, te lum maba la skom sba ta kʼoel ta stojol te Moisés. 14 Kʼalal te snial mamal* te Moisés la yil spisil te bin yak ta spasel ta stojol te lume, jich la sjojkʼoybey: «¿Bin-a te yakat ta spasel ta stojol te lume? ¿Bin yuʼun te atukel ya anajkan aba liʼi sok te ma skom sba te ants winiketik te ya xtalik ta atojol ta sab jaʼto kʼalal ta xmal kʼajkʼal?». 15 Te Moisés jich la yalbey te snial mamal:* «Yuʼun yak ta talel ta jtojol te lum ta sleel te tojobtesel yuʼun te Diose. 16 Kʼalal ya xjajch kʼop yuʼun chaʼtul ants winik, ya xtal yalbonik kaʼiy. Joʼon ya jchajpan te kʼop jajchem sok ya kakʼbey snaʼik te mantaliletik yuʼun te smelelil Dios sok te leyetik yuʼune».

17 Jich albot te Moisés yuʼun te snial mamal:* «Ma lek te bin yakat ta spasele. 18 Yame xlujbat yuʼun, jaʼnix jich ya xlujb-euk te lume. Kʼax mukʼ te aʼtelil awichʼoj te ma xjuʼ awuʼun spasel ta atukele. 19 Chʼama awaʼiy te tojobtesel ya kakʼbate. Jichme ya sjokinat te Diose. Jich te bitʼil jaʼat ya atejkʼan aba ta stojol te smelelil Dios ta swenta te lum sok te jaʼat ya awakʼbey snaʼ te smelelil Dios te kʼopetik yuʼunik, 20 akʼbeya snopik te mantaliletik sok te leyetik, te bin be ya skʼan ya stʼunik sok te bintik ya skʼan ya spasike. 21 Pero yame skʼan ya atsa winiketik ta yolil te lume te ayuk spʼijilik, te ya xiʼik te Dios, te ay smukʼul yoʼtan te ants winiketik ta stojolik sok te ya yilayik te loʼlaywanej ta swenta takʼin. Akʼbeya yaʼtelik ta stojol te lum yuʼun ya x-ochik ta jolaletik yuʼun jmil, yuʼun 100, yuʼun 50 sok yuʼun 10 ta tul. 22 Jaʼikme ya schajpanik te kʼopetik yuʼun te ants winiketik ta spisil-ora. Te banti tulan te kʼope jaʼme ya xtalik ta atojol; te banti ma tulanik jaʼme ya schajpanik. Jich ya xpejkʼaj te awaʼtele sok maba tulan ya awaʼiyix-a. 23 Teme jich ya apas sok teme jich ya spas ta mantal te Dios, ya xjuʼ awuʼun spasel te awaʼtel sok jun-nax yoʼtan ya sujt bael ta sna te ants winiketike».

24 Ta oranax, te Moisés la schʼuun te tojobtesel akʼbot yuʼun te snial mamal* sok la spas spisil te bin albot yuʼune. 25 La stsa ta yolil te lum yuʼun Israel winiketik te ay spʼijilik sok la yakʼbey yaʼtel ta jolaletik ta stojol te lum: jolaletik yuʼun jmil, yuʼun 100, yuʼun 50 sok yuʼun 10 ta tul. 26 Jaʼme ya schajpanik te kʼopetik yuʼun te ants winiketik te kʼalal ya xtalik ta stojolike. Te banti tulan te kʼope jaʼ ya xtalik ta stojol te Moisés; te banti ma tulanike jaʼnix ya schajpanik. 27 Ta patil, te Moisés la spatbey bael yoʼtan te snial mamale,* jich sujt bael ta slumal.