Proverbios
31 Te kʼopetik te la yal te ajwalil Lemuel, jaʼ te kʼopetik te mukʼ skʼoplal te albot yuʼun te snan* swenta ya xtojobtesot yuʼun.
2 Jkerem, ¿bin ya xjuʼ ya kalbat?
¿Bin ya xjuʼ ya kalbat jaʼat te la kikʼat ta jchʼujte?
¿Bin ya xjuʼ ya kalbat te jaʼat ta awenta te ay bin jamal la kal te ya jpase?
3 Mame xa alajin awip ta stojol te antsetik,
mame jaʼuk xa atʼun te beetik te ya x-ikʼot bael ta lajel te ajwaliletik.
4 Ma jaʼuk yuʼun ajwaliletik, Lemuel,
ma jaʼuk yuʼun ajwaliletik te ya yuchʼik vino
ni jaʼuk yuʼun ajwaliletik te jich ya yalik «¿Banti ay te jcopa?».
5 Melel te kʼalal ya yuchʼik vino ya xjuʼ ya xchʼay ta yoʼtanik te mantalil yichʼoj akʼel
sok te ma xyichʼik ta wenta te sderechoik te machʼatik maʼyuk bin ay yuʼunik.
6 Akʼbeya trago te machʼatik jtebxanix ya skʼan ya xlajik
sok akʼbeya vino te machʼatik pichʼil yoʼtanik.
7 Akʼa yuchʼik yuʼun jich ya xchʼay ta yoʼtanik te pobreik
sok yuʼun jich ma xjulix ta yoʼtanik te swokolik.
8 Kʼopojan ta stojol te machʼatik ma x-ichʼbot ta wenta te skʼopik;
koltaybeya skʼoplal te sderecho spisil te machʼatik jtebxanix ya skʼan ya xlajike.
9 Kʼopojan sok stojiluk ya xchajpanwanat;
koltaybeya skʼoplal te sderecho te machʼatik maʼyuk bin ay yuʼunik soknix te pobreetik.
א [álef]
10 ¿Machʼa ya xjuʼ ya sta jun lekil inamil?
Jaʼ kʼax mukʼxan skʼoplal-a te bitʼil te tʼujbil tonetik yuʼun mar.*
ב [bet]
11 Te smamalal mero ay smukʼul yoʼtan ta stojol;
maʼyuk bin ya xpasbot falta yuʼun te mukʼ skʼoplale.
ג [guímel]
12 Te antse ay bin lek ya spas ta stojol te smamalal, ma jaʼuk te bin chopol,*
jich ya spas te jayeb kʼajkʼal kuxule.
ד [dálet]
13 Ya sle stsotsel tuminchij sok lino;
mero ya smulan ya x-aʼtej sok te skʼabe.
ה [he]
14 Jaʼ jich te bin-utʼil te barcoetik yuʼun te machʼa ya xmanbaj:
namalto* ya skuch tal te sweʼele.
ו [waw]
15 Jaʼnix jich, ijkʼto ya xjajch;
ya yakʼbey sweʼel te machʼatik ay yuʼun ta sna
sok ya yakʼbey sweʼel-euk te j-abat antsetik yuʼune.
ז [zayin]
16 Ya snop te ya sman skʼinal sok ya sman;
ya stsʼun stsʼusub sok te sganar staoj ta swenta yaʼtel skʼab.
ח [jet]
17 Ya schajpan sba yuʼun ya x-och ta tulan aʼtel*
sok ya yakʼbey yichʼ yip te skʼabe.
ט [tet]
18 Ya yil te ya spas ganar sok te bin ya schon;
ta ajkʼabal ma xtupʼ te tsumbil kʼajkʼ yuʼun.
י [yod]
19 Ya stsak te rueca
sok ya sututin te huso.*
כ [kaf]
20 Ya sjam skʼab ta stojol te machʼa maʼyuk bin ay yuʼun;
ya sjam skʼab ta stojol te pobre.
ל [lámed]
21 Manchukme ya xko te meʼsik o toyiw, maba ya smel yoʼtan ta stojol te machʼatik ay yuʼun ta sna,
melel ta spisilik pim te skʼuʼike.
מ [mem]
22 Jaʼnix ya spas te stsots.*
Te skʼuʼ pasbil ta lino sok ta kuxul morado pakʼ te pasbil ta stsotsel tuminchij.
נ [nun]
23 Te smamalal mero naʼbil sba ta yochibal te mukʼul lum,
jaʼ te banti ya snajkan sba ta yolil te jwolwanejetik yuʼun te lum.
ס [sámekh]
24 Ya spas kʼuʼul pakʼal te pasbil ta lino sok ya schon;
jaʼnix jich ya schonbey chujkil chʼujtul te jchonbajeletik.
ע [ayin]
25 Jaʼ skʼuʼinoj te yip sok te ichʼel ta mukʼ;
maba ya smel yoʼtan yuʼun te bin ya xkʼot ta pasel ta pajel chaʼbej.
פ [pe]
26 Ay spʼijil yoʼtan te kʼalal ya xkʼopoj;
ya yakʼ ta ilel slekil yoʼtan te kʼalal ya xnojpteswan.
צ [sadé]
27 Ya yil ta lek te bintik ya skʼan pasel ta yutil sna;
jkʼaxel ma chʼajuk.*
ק [qof]
28 Te yalatak ya stejkʼan sbaik yuʼun ya x-utsilkʼoptayotik yuʼun;
te smamalal ya stejkʼan sba yuʼun ya x-utsilkʼoptayot yuʼun.
ר [resh]
29 Ay bayal lekil antsetik,
pero te jaʼate..., jaʼ kʼax lekatxan ta spisilik.
ש [shin]
30 Te bin mulantik sba ya xjuʼ ya xloʼlaywan, te bin tʼujbil ta ilel jkʼaxelnax ay;*
pero te ants te xiʼoj te Jehová yame yichʼ albeyel yutsil skʼoplal.
ת [taw]
31 Majtantesaik ta swenta spisil te bintik ya spase;
akʼa yichʼ albeyel yutsil skʼoplal ta yochibal te mukʼul lum ta swenta te yaʼtel skʼabe.