Génesis

27 Kʼalal mamalix-a te Isaac sok te ma xyilix kʼinal-ae, la yikʼ tal ta stojol te Esaú te sba snichʼan sok jich la yalbey: «¡Jnichʼan!». «¡Liʼ ayoni!», xchi te Esaú. 2 Te Isaac jich la yalbey: «Mamalonix sok ma jnaʼ jayebxan kʼajkʼal kuxulon. 3 Jaʼ yuʼun, awokoluk, tsaka te awaʼtejib yuʼun nutsojel, te flechaetik sok te atʼimalteʼ, baan ta jaʼmaleltik sok tsakbon tal tiʼbal jtiʼ. 4 Ta patil chajpana jun bujtsʼan weʼelil te ya jmulan sok ichʼbon tal yuʼun ya jweʼ. Tey-abi yame kakʼbat bendición te bitʼil kuxulontoe».

5 Kʼalal te Isaac yak ta kʼop* sok-a te Esaú, te snichʼane, te Rebeca yak ta yaʼiyel stojol-a. Jich te Esaú bajt ta nutsojel. 6 Te Rebeca jich la yalbey te Jacob: «Lajeltonax kaʼiybel stojol te jich albot te abankil Esaú yuʼun te atate: 7 ‹Tsakbon tal tiʼbal jtiʼ sok chajpanbon jun bujtsʼan weʼelil yuʼun ya jweʼ, jichme ya kakʼbat bendición ta stojol te Jehová te bitʼil kuxulontoe›. 8 Jaʼ yuʼun, Jacob, chʼama awaʼiy ta lek te bin ya kalbat sok pasame. 9 Awokoluk, baan te banti ay te chambalametik, tsakbon tal chaʼkojt lekil jkolel* tat tentsunetik yuʼun ya jchajpanbey bujtsʼan weʼelil te atate, jich te bitʼil ya smulane. 10 Ta patil ichʼa bael yuʼun ya sweʼ te atate swenta jaʼat ya yakʼbat bendición te bitʼil kuxultoe».

11 Pero, te Jacob jich la yalbey te Rebeca, te snane:* «Te jbankil Esaú bayal stsotsel stukel, yan te joʼone maʼyuk. 12 ¿Bin ya jpas teme ya spikon yaʼiy te jtate? Yaniwan skuy te yakon ta slabanele, jich ma xyakʼbon bendición jaʼnax ya sbolobtesbon jkʼoplal». 13 Kʼalal jich la yaʼiy te snane,* jich la yal: «Jaʼuk akʼa kichʼ bolobtesbeyel jkʼoplal. Pasa te bin ya kalbate. Baan, tsakbon tal te jkolel* tat tentsunetike». 14 Jaʼ yuʼun, te Jacob bajt stsak tal. Jich te snan* la schajpan bujtsʼan weʼelil, jich te bitʼil ya smulan te Isaac. 15 Tey-abi, te Rebeca la yichʼbey tal te lekil skʼuʼ te Esaú, te ba-alal yuʼun, te skʼejoj ta snae sok la yakʼbey slap te Jacob, te ijtsʼinale. 16 Jaʼnix jich la yakʼbey ta skʼab sok ta snukʼ te stsotsel te jkolel* tat tentsunetike. 17 Ta patil la yakʼbey te Jacob te bujtsʼan weʼelil sok te pan te la schajpane.

18 Tey-abi och bael te Jacob te banti ay te stat sok jich la yalbey: «¡Jtat!». Jich la yal te Isaac: «¡Liʼ ayoni, jnichʼan! ¿Machʼaat-a? ¿Jaʼatbal te Esaú o te Jacob?». 19 Te Jacob jich la yalbey te stat: «Joʼon te Esaú, te sba anichʼanon. La jpasix spisil te bin la awalbon. Awokoluk, naklan. Tiʼa jtebuk te tiʼbal la jtsakbat tal sok akʼbon te abendicion». 20 Pero, te Isaac jich la sjojkʼoybey: «¿Bin-utʼil ay-a te oranax la ata, jnichʼan?». Jich la yal te Jacob: «Jaʼ la yakʼbon ta jtojol te Jehová te Dios awuʼune». 21 Jaʼ yuʼun, te Isaac jich la yalbey te Jacob: «Awokoluk, noptsajan* tal, jnichʼan, ya jkʼan ya jpikat kaʼiy yuʼun ya jnaʼ teme jaʼat te jnichʼan Esaú o maʼuke». 22 Tey-abi, te Jacob noptsaj* bael ta stojol te stat. Jich te Isaac la spik yaʼiy sok jich la yal: «Jaʼ skʼop ya kaʼiy te Jacob, pero te skʼabe, jaʼ skʼab ya kaʼiy te Esaú». 23 Te Isaac maba la snaʼbey sba, melel bayal stsotsel skʼab jich te bitʼil te sbankil Esaú. Jich yuʼun la yakʼbey bendición.

24 Ta patil, jich la sjojkʼoybey: «¿Jaʼatnixbal-a te jnichʼan Esaú?». «Joʼon», xchi te Jacob. 25 Jaʼ yuʼun, jich la yalbey: «Jnichʼan, ichʼbon tal jtiʼ te tiʼbal la atsak tale, ta patil ya kakʼbat bendición». Tey-abi, te Jacob la yichʼbey tal weʼelil sok vino, jich weʼ uchʼaj. 26 Ta patil, te Isaac jich la yalbey: «Jnichʼan, awokoluk, noptsajan* tal sok ujtsʼuyawon».* 27 Te Jacob noptsaj* ta stojol sok la yujtsʼuy,* jich te stat la yaʼiybey yikʼ te skʼuʼe. Jaʼ yuʼun la yakʼbey bendición sok jich la yal:

«Ilawil, te yikʼ te jnichʼan jaʼ jich te bin-utʼil yikʼ te jaʼmaleltik te yakʼojbey bendición te Jehová. 28 Akʼa yakʼbat tal te stsʼujulel chʼulchan te smelelil Dios, akʼa yakʼbat lekil lumkʼinal, sit awal tsʼunubiletik sok bayal yachʼil vino. 29 Akʼa abatinukik ta atojol te lumetik, akʼa snijan sbaik ta atojol te nacionetik. Akʼa abatinukik ta atojol te awermanotak, akʼa snijan sbaik ta atojol te yalatak te anane.* Akʼa bolobuk skʼoplal spisil te machʼa ya sbolobtesbat akʼoplal sok akʼa yichʼ bendición spisil te machʼa ya yakʼbat bendición».

30 Kʼalal lajeltonax yoʼtan-a te Isaac ta yakʼbeyel bendición te Jacob sok te lokʼeltonax bael-a te Jacob te banti ay te Isaac, te state, sujt tal ta nutsojel te sbankil Esaú. 31 Jaʼnix jich, te Esaú la schajpanbey bujtsʼan weʼelil te state, la yichʼbey bael sok jich la yalbey: «Jtat, jajchanme. Tiʼa jtebuk te tiʼbal la stsak tal te anichʼane sok akʼbon te abendicion». 32 Te Isaac jich la yal: «¿Machʼaat-a?». «Joʼon te anichʼan Esaú, te abanichʼan», xchi te Esaú. 33 Te Isaac tulan jajch ta nijkel sok jich la yal: «¿Machʼaix-a te bajt ta nutsojel sok la yichʼbon tal tiʼbal jtiʼ? Lajeltonax koʼtan ta weʼel-a te kʼalal julat tal sok la kakʼbeyix te bendición. ¡Jaʼme te machʼa ya sta bendición!».

34 Te kʼalal jich la yaʼiy stojol te Esaú, jajch ta tulan aw yuʼun mel-oʼtan sok jich la skʼanbey wokol te state: «¡Jtat, akʼbon bendición-euk!». 35 Pero, te Isaac jich la yalbey: «Tal sloʼlayon te awijtsʼin yuʼun ya kakʼbey te bendición te jaʼ ay ta awenta yichʼel-ae». 36 Te Esaú jich la yal: «Jaʼnix yuʼun-a te Jacob* sbiile, melel schebalix buelta te ay bin ya spojbone. La spojbonix te bitʼil ba-alalone. ¡Sok la spojbonix-euk te bendición ya kichʼ-ae!». Ta patil, jich la sjojkʼoybeyxan te state: «¿Mabal ayuk abendicion akʼejojbon ta jtojol?». 37 Pero, te Isaac jich la yalbey te Esaú: «La kakʼ te jaʼ awajwal ya xkʼot, la kakʼ te jaʼ j-abat ya xkʼotik ta stojol spisil te yermanotak sok te akʼa sta sit awal tsʼunubiletik sok yachʼil vino. ¿Binxan ya xjuʼ ya kakʼbat, jnichʼan?».

38 Pero, te Esaú jich la yal: «Jtat, ¿jaʼnaxbal jun bendición ya xjuʼ ya awakʼ? ¡Jtat, akʼbon bendición-euk!». Jich tulan awun ta okʼel te Esaú. 39 Te Isaac jich la yalbey:

«Ilawil, te banti ya xnainat namal* ya xjil awuʼun te lekil lumkʼinal sok te banti ya xko te stsʼujulel te chʼulchan. 40 Yame akoltay te akuxlejal ta swenta te espada awuʼun sok yame x-abatinat ta stojol te awijtsʼine. Pero, te kʼalal ma xjuʼix awuʼun-ae, yame akoltay aba lokʼel ta skʼab».*

41 Jaʼto tal-abi, te Esaú la skʼej bayal slab yoʼtan ta stojol te Jacob ta swenta te jaʼ akʼbot bendición yuʼun te state. Te Esaú jich ya yal ta yoʼtan-a: «Jtebxanix ya skʼan te ya xlaj te jtate. Te kʼalal kʼaxemix yorail-a te mel-oʼtan yuʼun te laj te jtate, ya jmil te kijtsʼin Jacob». 42 Kʼalal albot yaʼiy te Rebeca te bin yak ta schapel te Esaú, te ba-alal yuʼun, oranax la stikun ta ikʼel te Jacob, te ijtsʼinale, sok jich la yalbey: «¡Chʼama awaʼiy! Te abankil Esaú yak ta schapel te ya smilat swenta ya yakʼbat spakol te bin la apasbeye. 43 Jich yuʼun, jkerem-al, pasa te bin ya kalbate. Anan bael ta oranax ta Harán te banti ay te jbankil* Labán. 44 Jilan ta nainel tey-a jaʼto te kʼalal ya xkʼax te yilinba te abankile, 45 jaʼto te kʼalal ya xlamaj yoʼtan sok ya xchʼay ta yoʼtan te bin la apasbeye. Jaʼtome jich ya jtikunat ta ikʼel tal. Ma jkʼan te ya xlajex ta achebalik ta jun-nax kʼajkʼal».

46 Te Rebeca jich jajch yalbey te Isaac: «Ta skaj te yantsil nichʼnab te Het, ya jpʼaj te jkuxlejale. Teme ya xnujpun te Jacob sok jtul yantsil nichʼan te Het, jich bitʼil te achʼixetik te yakik ta nainel ta kʼinal ini, ¿bistukxan ya xkuxinon?».