Te lek yachʼil kʼop ya yal te Lucas

16 Te Jesús jich la yalbeyxan te jnopojeletik yuʼune: «Ay jtul jkʼulej winik te ay machʼa yakʼojbey swentain te snae. Jaʼ ini la yichʼ lebeyel smul te ya stojol lajinbey te bintik ay yuʼun te yajwale. 2 Jich te jkʼulej winik la yikʼ tal sok jich la yalbey: ‹¿Melelbal te bin yak ta alel ta atojole? Akʼa jilel ta naʼel te bin-utʼil la alajin te bintik awentainoje, melel ma xjuʼ ya awentainbonix te jnae›. 3 Jich yuʼun, te machʼa swentainoj te nae jich la yal ta yoʼtan: ‹¿Bin ya jpasix-a te ya slokʼesonix ta kaʼtel te kajwale? Maʼyukix kip ta sjokʼel lum sok ya xkʼexawon te ya x-ochon ta kʼanbajele. 4 ¡Aa! Ya jnaʼix te bin ya jpas swenta ya yikʼonik ta sna te ants winiketik te kʼalal maba ya jwentainbeyix sna-a te kajwale›. 5 La yikʼ tal ta jujuntul te machʼatik ay sbet yuʼun te yajwale. Jich la sjojkʼoybey te machʼa nail kʼote: ‹¿Jayeb abet yuʼun te kajwale?›. 6 ‹Ay jbetanojbey 2,200 litro* aceite yuʼun oliva›, xchi. Jich la yal te machʼa swentainoj te nae: ‹Liʼ ay te sjunil te abete. Najkana aba ta ora, tsʼibaya 1,100 litro›. 7 Jich la sjojkʼoybey te yane: ‹Jaxan te jaʼate, ¿jayeb abet?›. ‹Jbetanojbey 100 costal* trigo›, xchi. Jich la yal te machʼa swentainoj te nae: ‹Liʼ ay te sjunil te abete. Tsʼibaya 80 costal›. 8 Te ajwalile la yalbey lek skʼoplal te machʼa yakʼojbey swentain te snae, manchukme ma tojuk te bin la spase, la yakʼ ta ilel spʼijil yoʼtan, melel te machʼatik ayik ta swenta balumilal jaʼ ayxan spʼijilik ta spasel-abi te bitʼil machʼatik ayik ta sakal kʼinal.

9 »Jaʼnix jich ya kalbeyex: leaik te machʼatik lek ya awil abaik sok kʼalal ya atuuntesik te kʼulejalil yuʼun te balumilal, swenta yuʼun te kʼalal ya xlaj te kʼulejalile, ya x-ikʼotat ochel te banti ya x-ayinat sbajtelkʼinal. 10 Te machʼa jun yoʼtan ya swentain te bin jteb ya x-akʼbote jaʼnix jich jun yoʼtan ya swentain te bin bayal ya x-akʼbote, te machʼa ma junuk yoʼtan ya swentain te bin jteb ya x-akʼbote jaʼnix jich ma junuk yoʼtan ya swentain te bin bayal ya x-akʼbote. 11 Jich yuʼun, teme ma junuk awoʼtan awentainojik te kʼulejalil yuʼun te balumilale, ¿machʼa kʼan yakʼbeyex awentainik te smelelil kʼulejalile? 12 Teme ma junuk awoʼtan awentainojbey sbiluk te yane, ¿machʼa kʼan yakʼbat awentain te bin awuʼun ya xkʼote? 13 Maʼyuk jtuluk j-abat te ya xjuʼ ya yakʼ sba ta abatinel yuʼun cheb yajwal, melel ya spʼaj te jtule sok kʼux ta yoʼtan te yane, o jun yoʼtan ta stojol te jtule sok maʼyuk skʼoplal ta yoʼtan te yane. Ma xjuʼ te ya awakʼ abaik ta abatinel ta stojol te Diose soknix ta stojol te Kʼulejalile».

14 Te fariseoetik —te ay sbikʼtal yoʼtanik yuʼun te takʼine— jajch slabanik te Jesús te kʼalal la yaʼiyik stojol spisil te bin la yale. 15 Jich albotik yuʼun te Jesús: «Te jaʼexe toj ya akuy abaik ta stojol te ants winiketike, pero te Dios ya snaʼ stukel te bin ay ta awoʼtanike. Melel te bin bayal skʼoplal ya yil te ants winiketik, ilaybil yuʼun te Diose.

16 »Te bin ya yal te Ley sok te J-alwanejetike smakojbey skʼoplal jaʼto ta skʼajkʼalel te Juane. Teyto tal-abi jajch ta alel te lek yachʼil kʼop yuʼun te Wentainel* yuʼun te Diose, spisil te ants winiketik te yanyantik stsʼumbalik yakik ta spasel tulan yuʼun ya x-ochik tey-a. 17 Ta melel, ya xjuʼ ya xlaj skʼoplal te chʼulchan sok te balumilal, pero ma xchʼay ni junuk jota sok ni junuk smajkʼalel jun letra yuʼun te Ley te ma xkʼot ta pasele.

18 »Spisil te machʼa ya yijkitay yinam sok ya xnujpun sok yan ants yakme ta antsiwej, sok machʼauk-a te ya yikʼ te ants te ijkitaybile yakme ta antsiwej.

19 »Ay jtul jkʼulej winik te ya slap kuxul morado lino-pakʼ sok tseʼelnax yoʼtan ya smulanbey yutsilal te skuxlejal ta jujun kʼajkʼal. 20 Pero, ta stiʼ sna ya xkʼot ta ijkitayel jtul jkʼanbajel winik te Lázaro sbiil te nojel ta kʼaʼel chin te sbakʼetale, 21 yoʼtanuk ya sweʼ te xejtʼelul weʼelil te ya xchʼay koel ta yeʼtal smesa te jkʼulej winike, jaʼnix jich ya xtal te tsʼiʼetik ta lekʼbeyel yuʼun te skʼaʼel chine. 22 Kʼot yorail te laj te jkʼanbajel winike sok ikʼot bael yuʼun te chʼul-abatetik ta stsʼeel te Abrahane.

»Jaʼnix jich laj-euk te jkʼulej winike sok la yichʼ mukel. 23 Te kʼalal ayix ta wokol ta Mukenal-ae,* la stoy moel sit, la yil ta namal* te Abrahán sok te Lázaro te ay ta stsʼeele. 24 Jaʼ yuʼun, jich la yal: ‹Jtatik Abrahán, naʼbon yoʼbolil jba, tikunbon tal te Lázaro, akʼa yajchʼes tal sniʼ yal skʼab ta jaʼ yuʼun ya sikubtesbon te kakʼe, melel bayal yakon ta wokol yuʼun te kʼajkʼ liʼi›. 25 Jich albot yuʼun te Abrahán: ‹Jnichʼan, julukme ta awoʼtan te la amulanbey yutsilal te bintik lek la ata ta akuxlejale, yan stukel te Lázaro maʼyuk bin lek la sta stukel, pero ta ora ini yakix ta yichʼel smukʼul yoʼtan liʼi, yan te jaʼate ayat ta wokol. 26 Jaʼnix jich ay mukʼul xaab akʼbil ta koliltik, jaʼ yuʼun te machʼatik ya skʼan ya xkʼax bael te banti ayexe ma xjuʼ yuʼunik, jaʼnix jich te machʼatik ya skʼan ya xkʼaxik tal liʼi ma xjuʼ yuʼunik›. 27 Jaʼ yuʼun, jich la yal te jkʼulej winike: ‹Jtat, jich bitʼil te ma xjuʼe, tikuna bael te Lázaro ta sna te jtate, 28 melel ay joʼtul jbankil kijtsʼinab, akʼa bajt scholbey yaʼiyik ta lek te skʼop Diose yuʼun maba ya xtalik liʼ te banti ay tulan wokol›. 29 Jich albot yuʼun te Abrahán: ‹Yichʼojik te bin la stsʼibay jilel te Moisés sok te J-alwanejetike; jaʼ akʼa yaʼiybeyik te skʼope›. 30 Jich la yal te jkʼulej winike: ‹¡Maʼuk, maʼuk, jtatik Abrahán! Teme ay machʼa chaʼkuxajemix ta yolil te machʼatik lajemik te ya xbajt ta stojolike, yame sujtes yoʼtanik›. 31 Pero, jich la yal te Abrahán: ‹Teme ma skʼan ya yaʼiybeyik skʼop te Moisés sok te J-alwanejetik, ¿jaʼuktobal ya skʼan ya yaʼiybeyik skʼop teme ay machʼa ya xchaʼkuxaj tal ta yolil te machʼatik lajemike?›».