Proverbios
20 Te vino ya xlabanwan; te trago ma snaʼ skomel sba;
te machʼa ya x-akʼot ta chʼayel yuʼune maʼyuk spʼijil yoʼtan.
2 Te xiwel ya yakʼ te ajwalil jaʼ jich te bin-utʼil yaw te león-choj;*
te machʼa ya sjachbey yilinba ya xjuʼ ya sta lajel yuʼun.
3 Te ants winik te ma skʼan ya sjach kʼop ichʼbil ta mukʼ yuʼun,
pero te machʼa ma snaʼ kʼinal ya schʼik sba ta kʼop.
4 Te chʼajil ants winik ma skʼan ya sjokʼ lum ta yorail sik;
jaʼ yuʼun ya xlokʼ ta kʼanbajel ta yorail stsobeyel sit awal tsʼunubil
ta skaj te maʼyuk bin ayix yuʼun.*
5 Te bin ay ta yoʼtan te ants winik jaʼ jich kʼoem te bin-utʼil skʼubulil jaʼetik,
pero te machʼa ay spʼijil yoʼtan ya snaʼ slokʼesel tal.
6 Bayal ants winiketik ya yalik te ay yuʼunik te kʼuxul oʼtanil te ma x-ijkitaywan,
pero wokol ta tael te ants winik te jun yoʼtan.
7 Te machʼa toj yoʼtan jun yoʼtan ta stojol te Dios.
¡Tseʼelnaxme yoʼtan te snichʼnab te yakik ta talel ta spate!
8 Te kʼalal ya xnajkaj ta smukʼul naktajib te ajwalil yuʼun ya x-ichʼawan ta kʼop,
ta sitnax ya sta ta ilel spisil te bintik chopol.*
9 ¿Machʼa jich ya xjuʼ ya yal «Jpokojix koʼtan,
la jpokix lokʼel te jmule»?
10 Te chʼin tonetik te ya xloʼlaywanik* sok te spʼisojibal biluk te ma tsʼakaluk ya spʼis
ilaybilik yuʼun te Jehová.
11 Hasta te chʼin kerem* ya yakʼ ta ilel ta swenta te bintik ya spas
teme lek sok teme toj te stalele.
12 Te chikinil te ya yaʼiy kʼop sok te sitil te ya yil kʼinal,
ta schebal jaʼ spastiklanoj te Jehová.
13 Mame xa amulan te wayel, melel yame yakʼat ta pobre.
Wikʼa asit, jichme ya xnoj achʼujt ta pan.
14 «¡Ma lek! ¡Ma lek!», xchi te machʼa ya xmanbaj;
te kʼalal bajtix-ae, ya stoy sba yuʼun te bin la smane.
15 Ay bayal oro, jaʼnix jich ay bayal tʼujbil tonetik yuʼun mar;*
pero te machʼa ya xlokʼ ta ye te bin ay ta naʼel jaʼ kʼax tʼujbilxan.
16 Ichʼbeya jilel te snajtil kʼuʼ teme ay machʼa la stejkʼan sba ta stojbeyel sbet te machʼa ma snaʼbey sba,
sok ayme bin xa akʼanbey jilel te machʼa jich la spas ta stojol jtul ants* te yan slumale.
17 Te ants winik kʼax bujtsʼan ya yaʼiy te pan te staoj ta swenta loʼlaywanej,
pero ta patil ya xnoj ta jiʼ* te yee.
18 Te kʼalal ya yichʼ albeyel skʼoplal* te bin ya yichʼ pasel, lek ya xkʼot ta lokʼel;
te kʼalal ya awakʼ guerra, lea lekil tojobtesel.*
19 Te jleaw ta kʼop ya spukbey skʼoplal te bintik snaʼoj te ma xjuʼ ta alel;
mame xa ajokin te machʼatik ya smulanik spukbeyel skʼoplal te yantik.*
20 Machʼauk-a te ya schopolkʼoptay te stat sok te snan*
yame xtupʼ te tsumbil kʼajkʼ yuʼun te kʼalal ya x-ijkʼub te kʼinal.
21 Te machʼa ay bin ya skʼan ya yichʼ jilel ta swenta sbikʼtal yoʼtan
ma sta bendición yuʼun.
22 Mame jichuk xa awal: «¡Ya kakʼbey spakol te bin chopol* la spasbone!».
Akʼa smukʼulin awoʼtan te Jehová, jaʼme ya skoltayat.
23 Te chʼin tonetik te ya xloʼlaywanik* ilaybil yuʼun te Jehová,
te balanzaetik te ya xloʼlaywanik ma lekuk.
24 Te kʼalal ya xbeen te ants winik jaʼ ya xtojobtesbot yuʼun te Jehová.
¿Machʼa ya xjuʼ ya snaʼ te bin beil ya stʼun?
25 Jaʼ jun pejtsʼ ya xkʼot ta stojol te machʼa oranax jich ya yal ta aw «¡Chʼultesbil!»,
pero patil ya snop teme ya xjuʼ o ma xjuʼ yuʼun skʼotesel ta pasel te bin jamal la yale.
26 Te ajwalil te ay spʼijil yoʼtan parte ya yakʼ te machʼatik chopolik,*
yame stsel kʼaxel ta sbaik te swuyojibal sit awal tsʼunubil.
27 Te bin ya xlokʼ ta ye te ants winik jaʼ tsumbil kʼajkʼ ta sit te Jehová
te ya yakʼ ta ilel ta lek te bin-nix ay ta skʼubulil yoʼtan-ae.
28 Te kʼuxul oʼtanil te ma x-ijkitaywan sok te jun-oʼtanil jaʼ ya xkanantayot yuʼun te ajwalil;
ta swenta te kʼuxul oʼtanil te ma x-ijkitaywan ya yakʼbey stsak yip te mukʼul naktajibal yuʼun.
29 Te yutsilal te jchʼieletik jaʼ te yipik,
te stʼujbilal te machʼatik ayix yaʼbilalik jaʼ te sakal sjolik.
30 Te ants winik te yaxuben sbakʼetal sok te ay yejchen jaʼ ya xkoltayot ta yijkitayel te bin chopol,*
te majel jaʼ ya xkoltayot yuʼun kʼalalto ta skʼubulil yoʼtan.