Proverbios

18 Te machʼa stukel ya skʼan ya x-ayin jaʼ ya sle te bin ya skʼan yoʼtan stukel

sok ya spʼaj spisil pʼijil oʼtanil.

 2 Te machʼa maʼyuk spʼijil yoʼtan ma smulan te bintik ay ta ichʼbeyel swentail;

jaʼ ya smulan yakʼel ta naʼel te bin ay ta yoʼtan.

 3 Te machʼa ya spas te bintik chopol* ya sta pʼajel,

te machʼa ya spas te bin ma stojiluk ta pasel ya sta kʼexlal.

 5 Ma lekuk te jaʼ lek ya kiltik te machʼa chopol*

sok te ma xkakʼtik te toj ya yichʼ chajpanel te machʼa toj yoʼtan.

 6 Te bintik ya yal te machʼa maʼyuk spʼijil yoʼtan ya sjach kʼop

sok ta swenta te bin ya yal ya yakʼ te ya yichʼ majel yuʼun.

 7 Te bintik ya yal te machʼa maʼyuk spʼijil yoʼtan ya x-akʼot ta wokol yuʼun

sok te bin ya xlokʼ ta ye jaʼ pejtsʼ ya xkʼot ta stojol.

 8 Te bintik ya yal te jleaw ta kʼop jaʼ jich kʼoem te bin-utʼil bujtsʼan weʼelil,*

te jaʼnax ya yichʼ bikʼel sok te toj ya xbajt ta jchʼujtik.

 9 Te machʼa chʼaj ta yaʼtel

jaʼ sjoy te machʼa ya xjinawan.

11 Te skʼulejal te jkʼulej jich ya yil te bin-utʼil te mukʼul lum te joytaybil ta tsʼajkʼetik te yichʼoj lek yip;

jich ya skuy te bin-utʼil tsʼajkʼ te ya xkanantayot yuʼun.

12 Te machʼa mukʼ ya skuy sba yame sta jinel,

pero teme pekʼel ya yakʼ sba ya yichʼ albeyel yutsil skʼoplal.

13 Te machʼa ay bin ya sut te kʼalal mato yaʼiyojbey skʼoplal ta lek te bin kʼot ta pasel

yuʼun ma snaʼ kʼinal sok ya sta kʼexlal.

14 Te machʼa ay yip yoʼtan jaʼme ya xkoltayot ta yorail chamel,

pero ¿machʼa ya xkujch yuʼun te tulan mel-oʼtan?

15 Te machʼa ay bintik ya yichʼbey swentail ay binxan ya snaʼ,

te machʼa pʼij yoʼtan ya spas tulan ta staelxan te bin ay ta naʼel.

16 Te majtanil ya yakʼ jtul ants winik ay bintik lek ya xlokʼ yuʼun-a,

yame xkʼot stejkʼan sba ta stojol te machʼatik mukʼ skʼoplalik.

17 Te machʼa nail ya xkʼot scholbey skʼoplal te kʼop jajcheme jich yilel te ay razón yuʼun,

jaʼto ya yichʼ naʼel-a te bin smelelil te kʼalal ya xkʼot ta ichʼel ta kʼop* yuʼun te skontra.

18 Ta swenta spasel suerte ya xchajpaj te kʼop

sok jich ya yichʼ naʼel machʼa ay razón yuʼun te kʼalal ay machʼatik ya skontrain sbaik te mukʼ skʼoplalik.

19 Jaʼ kʼax wokolxan ta lamantesbeyel yoʼtan jtul amigo te ilinem,

jaʼ kʼunxan ta ochintayel te jpam mukʼul lum te joytaybil ta tsʼajkʼetik te yichʼoj lek yip,

sok ay ya xjajch kʼop te jich kʼoem te bin-utʼil skʼatal teʼel te mukʼul lum.

20 Te sit te bintik ya yal te ants winik, jaʼme ya snojes schʼujt-a;

ya xnoj schʼujt ta swenta te sit te bintik ya xlokʼ ta ye.

21 Te bin ya xlokʼ ta ketik ya xjuʼ ya yakʼ lajel o kuxlejalil;

te machʼa ya smulan ya xkʼopoj yame sweʼbey te site.

22 Te machʼa lek yinam ya sta, jich kʼoem te la sta kʼulejalil

sok lek ya x-ilot yuʼun te Jehová.

23 Te pobre pekʼel yoʼtan ya xkʼopoj,

pero te jkʼulej tulan ya sut te kʼop.

24 Ay amigoetik te chapalik yuʼun talel kʼaxel ya slajin sbaik,

pero ay jun amigo te jun yoʼtan te kʼaxto jich ya xkʼot-a te bin-utʼil bankilal.