2 Crónicas

21 Jich te Jehosafat way sbakʼetal sok te antiguo smeʼ stat sok la yichʼ mukel ta Mukʼul lum yuʼun David. Tey-abi, jaʼ och jilel ta ajwalil te Jehoram, te snichʼane. 2 Te yijtsʼinab te Jehoram —jaʼ te snichʼnab te Jehosafat— jaʼik te Azarías, Jehiel, Zacarías, Azarías, Miguel sok te Sefatías; jaʼik spisil-abi te snichʼnab te Jehosafat te ajwalil yuʼun Israel. 3 Te Jehosafat la yakʼbey bayal plata sok oro te snichʼnab jich bitʼil majtanil sok la yakʼbey te bintik bayal stojol, jaʼnix jich la yakʼtiklanbey mukʼul lumetik ta Judá te joytaybilik ta tsʼajkʼetik te yichʼoj lek yip; pero jaʼ la yotses ta ajwalil te Jehoram, melel jaʼ sba snichʼan.

4 Jaʼnax te kʼalal och ta skʼab te Jehoram te wentainel te akʼbot yuʼun te state, la smiltiklan ta espada spisil te yijtsʼinab sok te machʼatik yichʼoj mukʼ yaʼtelik ta Israel swenta jich la yakʼbeyxan yichʼ yip te wentainel yuʼune. 5 Te Jehoram ay 32 yaʼbilal-a te kʼalal och ta ajwalil sok wentainwan waxakeb jaʼbil ta Jerusalén. 6 Jaʼnix jich la spas-euk te bintik la spasik te ajwaliletik yuʼun Israel, jich te bitʼil la spas te machʼatik ay yuʼun te Acab, melel la yikʼ yinamin te yantsil nichʼan Acab. Jaʼ la spas te bintik ma lek ya yil te Jehová. 7 Pero, te Jehová maba la skʼan la slajin te machʼatik ay yuʼun te David ta swenta te chapbilkʼop la spas sok te David, melel la yalbey ta jamal te spisil-ora ya yakʼ tsumbil kʼajkʼ ta stojol sok ta stojol te snichʼnab.

8 Ta skʼajkʼalel te Jehoram, te Edom la stoy sba ta stojol te Judá, jich la yotsesik jtul ajwalil yuʼunik. 9 Jich yuʼun, te Jehoram bajt ta Edom sok te comandanteetik yuʼun soknix spisil te carretaetik yuʼune. Ta ajkʼabal bajt yakʼbey guerra sok la stsal te edomitaetik te joytaybil yuʼun sok te capitán yuʼun te carretaetik. 10 Pero, te Edom la stoy sba ta stojol te Judá jaʼto ta ora ini. Ta yorail-abi, te Libná jaʼnix jich la stoy sba ta stojol te Jehoram, melel la yijkitay te Jehová te Dios yuʼun te antiguo smeʼ state. 11 Te Jehoram jaʼnix jich la spas toyol awilaletik ta witstikil yuʼun Judá swenta ya yakʼ sbaik ta antsinel* kʼoem tey-a te machʼatik nainemik ta Jerusalén te jich la yakʼ chʼayuk te yajwalul Judá.

12 Tey-abi jul ta stojol te bin la stsʼibay tal te j-alwanej Elías te jich la yal: «Jich ya yal te Jehová te Dios yuʼun te David te antiguo atat: ‹Ma jaʼuk la apas te bintik la spas te Jehosafat te atate ni jaʼuk la apas te bintik la spas te Asá te ajwalil yuʼun Judá. 13 Jaʼ ya apas te bintik ya spas te ajwaliletik yuʼun Israel sok ya awakʼ te ya yakʼ sbaik ta antsinel* kʼoem te yajwalul Judá sok te machʼatik nainemik ta Jerusalén, jich te bitʼil la spasik te machʼatik ay yuʼun te Acab. Sok la amiltiklan te awijtsʼinab sok te machʼatik ay yuʼun te atat te jaʼ lekikxan-a te bitʼil te jaʼate. 14 Jich yuʼun, te Jehová yame yakʼbey tulan wokolil te lum awuʼun, te anichʼnab, te awinamtak sok spisil te bintik ay awuʼune. 15 Yame stsakat bayal ta chajp chamel, jaʼnix jich yame stsakat chamel ta abikil, kʼunkʼunme ya xbatsʼej jaʼto te kʼalal ya xlokʼ te abikil ta skaj te chamel-abi›».

16 Jich yuʼun, te Jehová la yakʼ te ya xkontrainot te Jehoram yuʼun te filisteoetik sok te arabeetik te nopol* ayik ta stojol te etiopeetik. 17 Jich la sten sbaik ochel ta jkʼaxel ta Judá sok la yuʼuninik. La yichʼik bael spisil te bintik la staik ta sna* te ajwalil, jaʼnix jich la yikʼbeyik bael te snichʼnab sok te yinamtak; jaʼnax ma la yikʼik bael te Jehoacaz* te xutil snichʼane. 18 Te kʼalal kʼot ta pasel spisil-abi, te Jehová la yakʼ te tsakot ta chamel ta sbikil te Jehoram te maʼyuk spoxile. 19 Te kʼalal kʼax bael te kʼajkʼale, mero cheb jaʼbil ta patil, lokʼ te sbikil ta skaj te schamele, kʼax bayal swokol laj bael ta skaj te chamel-abi. Te lum yuʼune maba la spasik mukʼul kʼajkʼ ta stojol jich te bitʼil la spasik ta stojol te antiguo smeʼ statike. 20 Te Jehoram ay 32 yaʼbilal-a te kʼalal och ta ajwalil sok wentainwan waxakeb jaʼbil ta Jerusalén. Te kʼalal laje, maʼyuk machʼa la smel yoʼtan ta stojol. La smukik ta Mukʼul lum yuʼun David, pero maba ta smukenal te ajwaliletike.