Deuteronomio

31 Te Moisés lokʼ skʼopon spisil te lum yuʼun Israel, jich la yaltiklanbey: 2 «Ta ora ini ayix 120 kaʼbilal, jaʼ yuʼun ma xjuʼix kuʼun te ya kikʼex bael, melel te Jehová jich la yalbon: ‹Maba ya xkʼaxat bael ta mukʼul jaʼ Jordán›. 3 Te Jehová te Dios awuʼunik jaʼ te machʼa ya xnailaj bael ta atojolik sok jaʼ ya slajin ta atojolik te nacionetik ini, jaʼex ya awichʼbeyik jilel te skʼinalik. Te Josué jaʼme te machʼa ya yikʼex kʼaxel ta yan jejch, jich te bitʼil yaloj te Jehová. 4 Te Jehová jichnix ya spasbey te nacionetik ini te bitʼil la spasbey te Sehón sok te Og, te ajwaliletik yuʼun te amorreoetik, te kʼalal la slajinlan sok te skʼinalike. 5 Te Jehová yame yakʼ ta akʼabik te nacionetik-abi, jaʼex ya skʼan ya apasbeyik spisil te bin kalojbeyex ta mantale. 6 Ayukme yip awoʼtanik sok mame xchebaj awoʼtanik, mame xnijk awoʼtanik sok mame xiwex ta stojolik, melel sjokinojex te Jehová te Dios awuʼunik. Maʼyuk bin-ora ya yijkitayex sok maʼyuk bin-ora ya spijtesex».

7 Jich te Moisés la yikʼ tal te Josué, jich la yalbey ta sit spisil te lum Israel: «Ayukme yip awoʼtan sok mame xchebaj awoʼtan, melel jaʼat ya awikʼtiklan bael te lum ini ta kʼinal te jamal la yalbey Jehová te antiguo ameʼ atatik te ya yichʼik akʼbeyel yuʼun, jaʼatme ya awakʼtiklanbey skʼinalinik. 8 Te Jehová jaʼ ya xnailaj bael ta atojol sok ya sjokinat. Maʼyuk bin-ora ya yijkitayat sok maʼyuk bin-ora ya spijtesat. Mame xnijk awoʼtan sok mame xiwat».

9 Te Moisés la stsʼibay te Ley ini sok la yakʼbey te levitaetik te jaʼik sacerdoteetik te skʼechojik bael te skaxaul chapbilkʼop yuʼun te Jehová, sok la yakʼbey spisil te jwolwanejetik yuʼun te lum Israel. 10 Te Moisés jich la yaltiklanbey ta mantal: «Ta jukjukeb jaʼbil, te jaʼ yorail te albil skʼoplal te ya yichʼ lajinbeyel skʼoplal te betiletik, kʼalal jaʼ te Kʼin yuʼun te axibal naetik,* 11 kʼalal spisil te lum yuʼun Israel ya stejkʼan sbaik ta stojol te Jehová te Dios awuʼunik ta lugar te ya stsae, yame skʼan ya akʼoponbey yaʼiyik te Ley ini spisil te lum yuʼun Israel. 12 Tsoba tal te lume, te winiketik, te antsetik, te alaletik sok te jyanlumetik te ayik ta nainel ta mukʼul lum awuʼunik yuʼun ya yaʼiybeyik skʼop, ya snopik ta stojol sok yuʼun ya xiʼik te Jehová te Dios awuʼunik sok yuʼun ya spasik tulan ta skʼotesel ta pasel spisil te bin ya yal te Ley ini. 13 Jich te yal snichʼnabik te maba yaʼiyojbeyik skʼoplal te Ley ini, yame yaʼiyik sok ya snopik xiʼel te Jehová te Dios awuʼunik te jayeb kʼajkʼal ya xkuxinex ta kʼinal te ya awochintayik te kʼalal kʼaxemexix bael ta mukʼul jaʼ Jordán».

14 Tey-abi, te Jehová jich la yalbey te Moisés: «Ilawil, nopolix* yorail te ya xlajate. Ikʼa tal te Josué sok baan tejkʼana abaik ta nailpakʼ ta swenta tsoblej swenta ya kakʼbey yaʼtel ta jwolwanej». Jich te Moisés sok te Josué bajt stejkʼan sbaik ta nailpakʼ ta swenta tsoblej. 15 Tey-abi, te Jehová chiknaj ta balal tokal tey ta nailpakʼ. Te balal tokal la yakʼ sba ta yochibal te nailpakʼ.

16 Te Jehová jich la yalbey te Moisés: «Ilawil, jich bitʼil te nopol* ya xlajatix, te lum ini ya xjajch yakʼ sbaik ta antsinel kʼoem sok te diosetik yuʼun te jyanlumetik te ayik ta sjoyobal te kʼinal te banti ya xbajtike. Yame yijkitayonik sok ya slajinbeyik skʼoplal te chapbilkʼop te la jpas ta stojolike. 17 Ta yorail-abi ya x-ilinon ta stojolik, ya kijkitayik sok ya jwalakʼpatiyik jaʼto te kʼalal ya yichʼik lajinel. Jich yuʼun, te kʼalal ya xtal swokolik sok ya smel yoʼtanik, jich ya yalik: ‹¿Mabal jaʼuk yak ta kʼaxel ta jtojoltik te wokoliletik ini ta skaj te maba sjokinojotikix te Diose?›. 18 Pero, te joʼone yananix jwalakʼpatiyex ta kʼajkʼal-abi, ta skaj spisil te bin chopol* ya apasik te kʼalal ya atʼunik yantik diosetik.

19 »Ta ora ini tsʼibayaik te kʼayoj ini sok akʼbeya snop te israeletik. Akʼaik te ya yakʼ ta sjolik te kʼayojil ini yuʼun ya xtuun kuʼun jich bitʼil testigo ta stojol te lum yuʼun Israel. 20 Te kʼalal ya kikʼtiklan ochel ta kʼinal te la kalbey ta jamal te ya kakʼbey te antiguo smeʼ statik —ta kʼinal te banti ya yakʼ bayal leche sok chab— yame xweʼ x-uchʼajik jaʼto te kʼalal ya xnoj schʼujtik sok ya xpʼol te bintik ay yuʼunik,* jich ya stʼunik yantik diosetik swenta ya yakʼ sbaik ta abatinel ta stojolik, maba ya yichʼonik ta mukʼ sok ya slajinbeyik skʼoplal te chapbilkʼop kuʼun. 21 Te kʼalal ya xtal swokolik sok mel-oʼtan, te kʼayojil ini yame xtuun yuʼunik jich bitʼil testigo, (melel ma skʼan ya xchʼay ta sjolik te stsʼumbalik), ta skaj te jnaʼojix-a te bin ya snop ta yoʼtanik, manchukme mato kikʼtiklanoj ochel ta kʼinal te jamal la kal ya kakʼbeyike.

22 Jich te Moisés la stsʼibay te kʼayojil ta kʼajkʼal-abi sok la yakʼbey snop te israeletike.

23 Jich yuʼun la yakʼ* te ya yichʼ yaʼtel ta jwolwanej te Josué snichʼan Nun, jich la yalbey: «Ayukme yip awoʼtan sok mame xchebaj awoʼtan, melel jaʼat ya awikʼtiklan bael te israeletik ta kʼinal te jamal la kal ya kakʼbeyike, joʼonme ya jokinat».

24 Kʼalal te Moisés laj yoʼtan ta stsʼibayel ta libro spisil te bin ya yal te Ley ini, 25 te Moisés jich la yalbey ta mantal te levitaetik te skʼechojik bael te skaxaul te chapbilkʼop yuʼun te Jehová: 26 «Ichʼaik bael te libro yuʼun te Ley ini sok akʼaik ta stsʼeel te skaxaul te chapbilkʼop yuʼun te Jehová te Dios awuʼunik, jichme ya xtuun ta testigo ta atojolik. 27 Melel ya jnaʼ ta lek te atoybailik sok te tulan awoʼtanik. Teme jkʼaxel ya atoy abaik ta stojol te Jehová te bitʼil kuxulontoe, ¡¿jaʼuktobalix-a te kʼalal lajemonix-ae?! 28 Ikʼbonik tal ta jtojol spisil te jwolwanejetik yuʼun te jujunchajp atsʼumbalik sok te machʼatik yichʼoj mukʼ yaʼtelik awuʼunik yuʼun ya kalbey yaʼiyik spisil te kʼopetik ini, yame kakʼ ta testigo ta stojolik te chʼulchan sok te balumilal. 29 Melel jnaʼoj ta lek te ya xjajch apasik te bintik chopol* te kʼalal lajemonix-ae sok yame awijkitayik te be te kalojbeyex ta mantal te ya atʼunike. Yame xtal te wokoliletik ta atojolik ta patil bael, melel ya apasik te bintik chopol ta sit te Jehová sok ya ajachbeyik te yilinba ta swenta te bin ya apasike».

30 Jaʼ yuʼun, te Moisés la yalbey yaʼiyik spisil te lum yuʼun Israel te bin ya yal te kʼayoj ini ta sjajchibal kʼalalto ta slajibal: