Deuteronomio

28 »Teme ta smelelil ya awaʼiybeyik skʼop te Jehová te Dios awuʼunik sok teme ya apasik tulan yuʼun ya achʼuunik spasel spisil te mantaliletik te yak kalbelex ta ora ini, te Jehová te Dios awuʼunik yame stoyesbeyex akʼoplalik ta stojol te yantik nacionetik ta balumilal. 2 Yame xtal ta atojolik spisil te bendicionetik ini, yame staex teme spisil-ora ya awaʼiybeyik te skʼop te Jehová te Dios awuʼunik:

3 »Yame ataik bendición ta mukʼul lum sok yame ataik bendición ta kʼinal.

4 »Yame staik bendición te awal anichʼnabik, te sit awal tsʼunubil awuʼunik, te yalatak te wakaxetik sok te yalatak te tuminchijetik awuʼunik.

5 »Yame sta bendición te amochik sok yame sta bendición te yawil te banti ay bin ya awotsʼik.

6 »Yame ataik bendición ta spisil te bin ya apasike.

7 »Te Jehová ya yakʼ te ya atsalik te akontratakik te ya xtal ta atojolik. Ta jun-nax be ya x-ochik tal yuʼun ya skontrainex, pero ta jukeb beetik ya xlokʼik bael ta anel ta atojolik. 8 Te Jehová yame yal ta mantal te ya sta bendición te yawil biluketik awuʼunik sok ta stojol spisil te bin ya apasik, yananixme yakʼbeyex bendición-a te Jehová te Dios awuʼunik ta kʼinal te ya awichʼik akʼbeyel yuʼune. 9 Te Jehová yame yakʼ te chʼul lum ya xkʼoex yuʼun, jich te bitʼil la yalbeyex ta jamal, jaʼnax teme ya achʼuunik spasel te mantaliletik yuʼun te Jehová te Dios awuʼunik sok teme ya xbeenex ta beetik yuʼun. 10 Spisil te lumetik ta balumilal yame snaʼik te jaʼex awichʼojbeyik sbiil te Jehová, jichme ya xiʼex yuʼun.

11 »Te Jehová ya yakʼ te bayaluk awal anichʼnabik, achambalamik sok ya yakʼ te bayal bin ya xchʼi ta lumkʼinal tey ta kʼinal te jamal la yalbey Jehová te antiguo ameʼ atatik te ya yakʼbeyexe. 12 Te Jehová yame sjambeyex te yawil skʼulejal, jaʼ te chʼulchan, yuʼun ya yakʼ te ya xtal jaʼal ta akʼinalik ta yorail sok ya yakʼbey bendición spisil te bin ya apasike. Te jaʼexe ay bin ya awakʼbeyik sbetan bayal nacionetik, yan te jaʼexe maʼyuk bin ya akʼanbeyik ta bet. 13 Te Jehová ya yakʼ te mukʼ akʼoplalik ta stojol te yantik, maba ya yakʼ te ay machʼa ya spasex ta mantal, jaʼ toyolex-xan ta stojol te yantik, maba pekʼel akʼoplalik, jaʼnax teme ya achʼuunik spasel te mantaliletik yuʼun te Jehová te Dios awuʼunik te yak kalbelex ta ora ini te ya akʼotesik ta pasel. 14 Mame xa awijkitayik spasel spisil te bin yak kalbelex ta mantal ta ora ini —mame xbaex ta awaʼelik ni ta akʼexamik*— yuʼun ya atʼunik yantik diosetik ta yichʼel ta mukʼ.

15 »Pero, teme maba ya awaʼiybeyik skʼop te Jehová te Dios awuʼunik sok maba ya apasik tulan ta schʼuunel spisil te mantaliletik sok te bintik yaloj te yak kalbelex ta ora ini, yame xtal ta atojolik spisil te chopol* kʼoplalil ini sok yame staex:

16 »Chopolukme* akʼoplalik ta mukʼul lum sok chopolukme akʼoplalik ta kʼinal.

17 »Chopolukme skʼoplal te amochik sok chopolukme skʼoplal te yawil te banti ay bin ya awotsʼik.

18 »Chopolukme skʼoplal te awal anichʼnabik, te sit awal tsʼunubil awuʼunik, te yalatak te wakaxetik sok te yalatak te tuminchijetik awuʼunik.

19 »Chopolukme skʼoplal spisil te bin ya apasike.

20 »Te Jehová ya stikun tal ta atojolik chopol* kʼoplalil te ma xa anaʼik bin ya apasik yuʼun sok ya stikun tal wokolil ta spisil te bin ya apasik jaʼto te kʼalal jkʼaxel ya awichʼik lajinel te jich oranax ya xchʼayex bael ta skaj te bin chopol* kʼayemex ta spasel sok te la awijkitayonike. 21 Te Jehová ya stikun tal tulan chamel ta atojolik jaʼto te kʼalal ya slajinex tey ta kʼinal te ya xbajt awochintayike. 22 Te Jehová ya stikun tal te castigoetik ini: sak obal, tulan kʼajkʼ, sijtʼel, skʼuxul kʼajkʼal, guerra, tulan kʼixin ikʼ sok ya x-och schamel te awal tsʼunubiletik awuʼunik. Spisil ini ya snutsex jaʼto te kʼalal ya xlajex. 23 Te chʼulchan te ay ta ajol jaʼ cobre ya xkʼot; te balumilal te ay ta yeʼtal awok jaʼ hierro ya xkʼot. 24 Te jaʼal te ya xko tal ta chʼulchan te ya yakʼ ta akʼinalik te Jehová, ya skʼatpʼun ta tsʼubil lum sok ta jiʼ jaʼto te kʼalal ya slajinex. 25 Te Jehová yame yakʼ te ya awichʼik tsalel yuʼun te akontratakik. Ta jun-nax be ya x-ochex bael yuʼun ya akontrainik, pero ta jukeb beetik ya xlokʼex bael ta anel ta stojolik, spisil te ajwaliletik ta balumilal jkʼaxel ya xiwik te kʼalal ya yilex. 26 Te abakʼetalik yame xtuun jich bitʼil sweʼel spisil te jaʼmal mutetik te ya xwilik ta chʼulchan sok spisil te jtiʼawal chambalametik ta kʼinal te maʼyuk machʼa ya xtijotik lokʼel yuʼun.

27 »Te Jehová yame yakʼbeyex awokolik ta swenta kʼaʼel chin* yuʼun Egipto, hemorroide* sok yantik chameletik ta nujkulel te maʼyuk spoxil. 28 Te Jehová yame yakʼ sojkuk ajolik, te ma xa awilik kʼinal sok ma xa anaʼik te bin ya apasik. 29 Xmaxlajanex ta beel ta olil kʼajkʼal jich te bin-utʼil ya xbeen ta ijkʼal kʼinal te machʼa ma xyil kʼinal, chikan te bin ya apasik maba lek ya xkʼot ta lokʼel awuʼunik. Yame awichʼik loʼlayel sok yame yichʼ elkʼanel spisil-ora te bintik ay awuʼunik, mame ayuk machʼa ya skoltayex. 30 Yame amak jtul achʼix yuʼun ya xnujpunat sok, pero yan winik ya stsak yutsʼin. Yame apas anaik, pero maba ya xnainex tey-a. Yame atsʼunik tsʼusubiltik, pero maba ya aloʼbeyik te site. 31 Yame awilik te ya yichʼ milel te atoroik, pero maba ya aweʼbeyik stiʼbalul. Yame awilik te ya spojbeyex bael te aburroik, pero maba ya awichʼik sutbeyel. Yame yichʼ akʼbeyel te akontratakik te atuminchijik, pero maʼyuk machʼa ya skoltayex. 32 Yame awilik te ya yichʼik akʼel ta skʼab yantik lumetik te akerem nichʼnabik sok te awantsil nichʼnabik, spisil-ora yame anaʼulanik, pero maʼyuk bin ya xjuʼ awuʼunik spasel. 33 Te sit te awal tsʼunubiletik awuʼunik sok spisil te bintik ya xchʼi ta akʼinalik yame xtal sweʼik te jyanlumetik te ma xa anaʼbeyik sba. Spisil-ora ya awichʼik loʼlayel sok yame awichʼik pejkʼanbeyel akʼoplalik. 34 Yame sojk ajolik ta skaj te bin ya awilik.

35 »Te Jehová yame yakʼbeyex castigo ta swenta kʼaʼel chin te ya yakʼbeyex awokolik ta sjol awakanik sok ta awaʼik, sok ta skojtol abakʼetalik, kʼalalto ta stan awokik* jaʼto kʼalal ta ajolik. Mame ayuk spoxil. 36 Te jaʼex sok te ajwalil te la atsaik yuʼun ya swentainex ya awichʼik ikʼel bael yuʼun te Jehová ta jun nación te maba anaʼojbeyik sba ni jaʼuk te antiguo ameʼ atatik la snaʼbeyik sba. Teyme ya x-abatinex ta stojol yantik diosetik te pasbilik ta teʼ sok ta ton. 37 Xiweltik aba ya awichʼik ilel sok labanel sok ya awichʼik pʼajel ta yolil spisil te lumetik te banti ya yikʼex bael te Jehová.

38 »Yame atsʼunik bayal sit awal tsʼunubiletik, pero jtebnax ya atsobik, melel yame yichʼik lajinel yuʼun te kʼulubetik. 39 Yame atsʼunik tsʼusubiltik sok ya achajpanik, pero maba ya awuchʼik vino sok maba ya atulbeyik sit, melel yame xlajik ta chʼin chanetik. 40 Yame xchʼi olivoetik awuʼun ta spamal te akʼinalik, pero maba ya ajax abaik ta yaceiteul, melel ya xlubaj koel te site. 41 Yame x-ayin akerem nichʼnabik sok awantsil nichʼnabik, pero maba awuʼunik ya xkʼotik, melel yame yichʼik chukel bael. 42 Spisil te teʼetik awuʼunik sok te sit atsʼunubik te ya yakʼ te lumkʼinal awuʼunik yame xlajik ta chʼin chambalametik te jtsojbnax ya xwilik. 43 Te jyanlumetik te yak ta nainel ta awolilik bejbe* ya xtoyxan skʼoplalik ta atojolik, yan te jaʼexe bejbe ya xpejkʼajxan akʼoplalik. 44 Ayme bin ya yakʼbeyex ta majanel, yan te jaʼexe maʼyuk bin ya awakʼbeyik ta majanel stukel. Jaʼ mukʼ skʼoplalik ta stojol yantik, yan te jaʼexe ya awichʼik pasel ta mantal.

45 »Spisil te chopol* kʼoplalil-abi yame xtal ta atojolik, yame awichʼik nutsel yuʼun sok yame staex jaʼto te kʼalal ya awichʼik lajinel, melel maba la awaʼiybeyik skʼop te Jehová te Dios awuʼunik sok maba la achʼuunik spasel te mantaliletik yuʼun sok te bin la yalbeyex ta mantal. 46 Spisilme-ora ay ta atojolik sok ta stojol atsʼumbalik jich bitʼil señail sok jultesel oʼtanil, 47 melel maba abatinex ta stojol te Jehová te Dios awuʼunik sok stseʼelil awoʼtanik sok yutsil awoʼtanik te kʼalal bayal bintik ayin awuʼunik. 48 Te Jehová ya stikun tal ta atojolik te akontratakik yuʼun ya yakʼbeyex guerra, ayme awiʼnalik sok ya awaʼiyik takintiʼil te kʼalal ya x-abatinex ta stojol, maʼyuk bayal akʼuʼ apakʼik sok maʼyuk bin ay awuʼunik. Jaʼme ya skajanbeyex ta anukʼik jun yugo te pasbil ta hierro jaʼto te kʼalal ya slajinex ta jkʼaxel.

49 »Te Jehová yame stikun tal ta atojolik jun nación te namal* ay yuʼun ya skontrainex, te ay ta yan jejch stiʼil te balumilal. Yame xwil tal jich te bin-utʼil águila ta atojolik, jun nación te ma xa anaʼbeyik skʼope, 50 xiweltik sba te sit yelawik te ants winiketik yuʼun te nación-abi, te maba ya yichʼik ta mukʼ te meʼel mamaletik sok te maba ya snaʼbeyik yoʼbolil sba te jchʼieletike. 51 Jaʼme ya sweʼbeyik te yalatak te chambalametik awuʼunik sok te sit awal tsʼunubil te ya yakʼ ta lumkʼinal awuʼunik jaʼto te kʼalal ya awichʼik lajinele. Maba ya yijkitaybeyex jilel awal tsʼunubiletik, yachʼil vino, aceite ni jaʼuk te yalatak te wakaxetik sok te yalatak te tuminchijetik awuʼunik jaʼto te kʼalal ya awichʼik lajinel. 52 Yame yichʼik joytayel spisil te mukʼul lumetik awuʼunik jaʼto te kʼalal ya xjemtsʼuj koel te toyol tsʼajkʼetik te jaʼ smukʼulinoj awoʼtanik. Jich, yame yichʼik joytayel spisil te mukʼul lumetik awuʼunik te ayik ta kʼinal te la yakʼbeyex te Jehová te Dios awuʼunik. 53 Te kʼalal jich ya xkʼot ta pasele, yame aweʼbeyik stiʼbalul te awal anichʼnabik sok te stiʼbalul te awantsil anichʼnabik te la yakʼbeyex te Jehová te Dios awuʼunik, ta skaj te la awichʼik joytayel yuʼun ya awichʼik akʼbeyel guerra sok te wokolil ya yakʼbeyex te akontratakik.

54 »Hasta te winik te lek yoʼtan sok te kʼun yoʼtan te ay ta awolilik maba ya snaʼbey yoʼbolil sba te yermano ni jaʼuk te yinam te kʼux ta yoʼtan ni jaʼuk te snichʼnab te ayto jilem yuʼun, 55 sok maba ya yakʼtiklanbey sweʼ stiʼbalul snichʼnab te yak ta sweʼel stukele, melel maʼyukix bin ay yuʼun ta skaj te la awichʼik joytayel yuʼun ya awichʼik akʼbeyel guerra sok te wokolil ya yakʼbeyex te akontratakik ta mukʼul lumetik awuʼunik. 56 Te ants te ay ta awolilik te leknax skuxlejal ta kʼinal sok te kʼun yoʼtan te la skuy te maʼyuk bin-ora ya stekʼ te lum ta skaj te leknax ay ta kʼinal-ae maba ya snaʼbey yoʼbolil sba te smamalal te kʼux ta yoʼtan ni te skerem-al ni te achʼix yuʼun, 57 ni maba ya snaʼbey yoʼbolil sba te smeʼ alal* te ya xlokʼ tal ta yolil yaʼ ni jaʼuk te yalatak te ya xtal ta patil, melel muken ya sweʼ ta skaj te la awichʼik joytayel yuʼun ya awichʼik akʼbeyel guerra sok te wokolil ya yakʼbeyex te akontratakik ta mukʼul lumetik awuʼunik.

58 »Teme maba ya achʼuunik spasel ta tsʼakal spisil te bin ya yal te Ley te tsʼibaybil jilel ta libro ini, sok teme maba ya axiʼik te sbiil te Jehová te Dios awuʼunik te ay yutsilal sok te yan-nax-ae, 59 te Jehová yame stikun tal ta atojolik sok ta stojol atsʼumbalik wokoliletik te xiweltik sba, tulan wokoliletik te ya xjalaj sok chameletik te ya yakʼbeyex awokolik te ya xjalaj ta atojolik. 60 Yame yakʼ tal ta atojolik spisil te chameletik te kʼax awuʼunik ta Egipto te la yakʼbeyex bayal xiwel, jkʼaxel maba ya yijkitayex. 61 Ma jaʼuknax-abi, te Jehová yame yakʼ kʼaxuk awokolik ta swenta te chameletik o tulan wokoliletik te ya stikun tal ta atojolik te maba tsʼibaybil jilel ta libro yuʼun te Ley ini jaʼto te kʼalal ya awichʼik lajinel. 62 Ta skaj te maba la awaʼiybeyik te skʼop te Jehová te Dios awuʼunik maba bayal ya xjilex, manchukme kʼax bayalex ta tul jich te bin-utʼil te ekʼetik ta chʼulchan.

63 »Jich te bitʼil lek la yil te Jehová te ya yakʼ xpʼol te bintik ay awuʼunik sok ya yakʼ te kʼax bayal ya xkʼot te atsʼumbalik, jaʼnix jich te Jehová lek ya yil te ya slajinex sok te ya stupʼbeyex akʼoplalik ta jkʼaxel, yame awichʼik bulel lokʼel ta kʼinal te nopol* ya awichʼik akʼbeyel.

64 »Te Jehová ya spukex bael ta spisil te nacionetik, ta jejch stiʼil te balumilal jaʼto ta yan jejch stiʼil, tey ya x-abatinex ta stojol diosetik te pasbilik ta teʼ sok ta ton te maba anaʼojbeyik sba ni jaʼuk te antiguo ameʼ atatik la snaʼbeyik sba. 65 Ta yolil te nacionetik-abi maba ya ataik lamalkʼinal ni maba ya ataik jun lugar te banti ya xjuʼ ya skux yoʼtan te awokik. Te bin ya spas tey-a te Jehová jaʼ te ya yakʼbeyex amel awoʼtanik, te ya xlaj yip asitik sok te ma xa anaʼik te bin ya apasike. 66 Jich ya awaʼiyik spisil-ora te ay machʼa ya skʼan ya smilex. Kʼajkʼal ajkʼabal yame xiwex sok ma xa anaʼik teme kuxul ya xjilexe. 67 Ta skaj te xiwel ya awaʼiyik sok te bin ya awilik, jich ya awalik ta sakubel kʼinal ‹¡Koʼtanukix te jaʼuk te xmal kʼajkʼale!›; jich ya awalik ta xmal kʼajkʼal ‹¡Koʼtanukix te jaʼuk te sakubel kʼinale!›. 68 Yananixme yakʼ te Jehová te ya sujtex bael ta barcoetik ta Egipto, tey ta be te jich la kalbey skʼoplal ‹Maʼyuk bin-ora ya awilikix›. Tey ya awakʼ abaik ta chonel ta stojol te akontratakik jich bitʼil mosoetik sok criadaetik, pero maʼyuk machʼa ya smanex».