Números

6 Te Jehová kʼopojxan sok te Moisés, jich la yalbey: 2 «Kʼopona te israeletik sok jich xa awaltiklanbey: ‹Teme jtul winik o jtul ants ya yalbey ta jamal te Jehová te ya yakʼ sba ta nazareo* ta stojol, 3 mame skʼan ya yuchʼ vino sok yantikxan uchʼbalil te ya xyakubteswan. Mame skʼan ya yuchʼ vinagre te pasbil ta vino ni yantikxan uchʼbalil te pajubtesbil. Jaʼnix jich mame skʼan ya yuchʼ uchʼbalil te pasbil ta yaʼlel tsʼusub sok mame sloʼbey sit tsʼusub ni jaʼuk te takintesbile. 4 Te jayeb kʼajkʼal ay ta nazareoe mame skʼan ya sweʼ te bintik pasbil ta tsʼusub ni jaʼuk te tsʼusub te uninto o te spat.

5 »›Te jayeb kʼajkʼal yaloj ta jamal te ya yakʼ sba ta nazareoe, mame skʼan ya yichʼ setʼbeyel lokʼel te stsotsel sjole. Chʼultesbil ya xkʼot te kʼalal ya yakʼ chʼiuk te stsotsel sjol jaʼto te kʼalal ya stsʼakaj te jayeb kʼajkʼal parte yakʼoj sba ta stojol te Jehová. 6 Mame skʼan ya xnoptsaj* ta stojol te machʼa lajem te jayeb kʼajkʼal parte yakʼoj sba ta stojol te Jehová. 7 Manchukme jaʼ ya xlaj te stat, snan,* sbankil, swix o yijtsʼin, mame skʼan te ya sbolobtesbey sba skʼoplal, melel yichʼoj señail ta sjol te bitʼil yakʼoj sba ta nazareo ta stojol te Dios yuʼune.

8 »›Te jayeb kʼajkʼal ay ta nazareoe chʼultesbil ya xkʼot ta stojol te Jehová. 9 Pero, teme ay machʼa laj ta oranax ta stsʼeel te jich ya xbolobtesbot skʼoplal te stsotsel sjol te jaʼ señail te parte yakʼoj sba ta stojol te Dios, yame skʼan ya setʼ lokʼel te stsotsel sjol te kʼalal ya yichʼ albeyel te lek skʼoplale. Jichme ya skʼan ya spas ta sjukebal kʼajkʼal. 10 Ta swaxakebal kʼajkʼal yame skʼan ya yichʼ bael ta stojol te sacerdote chaʼkojt xpuliwok* o chaʼkojt jkolel stsumut* ta yochibal te nailpakʼ ta swenta tsoblej. 11 Te sacerdote ya yakʼ jkojt ta swenta te majtanil ta swenta mulil, te yane jaʼ ta swenta chikʼbil majtanil. Yame yakʼ te ya sta perdón yuʼun te smul te snitojbey sba skʼoplal sok te machʼa laje. Ta kʼajkʼalnix-abi, te nazareo yame skʼan ya schʼultes te sjole. 12 Jichme ya skʼan te parte ya schaʼyakʼ sba ta stojol te Jehová yuʼun jich ya schaʼjajch te jayeb kʼajkʼal ya x-ayin ta nazareo sok yame yichʼ bael jkojt jkolel* tat tuminchij te juntonax yaʼbilal jich bitʼil majtanil ta swenta chʼayel ta stojol Dios. Pero, te jayebix kʼajkʼal kʼaxeme maba ya yichʼ ichʼel ta wenta, melel la sbolobtesbey skʼoplal te nazareo yuʼune.

13 »›Jaʼ ini jaʼ te ley yuʼun te nazareo. Te kʼalal ya stsʼakaj te jayeb kʼajkʼal yakʼoj sba ta nazareo, yame yichʼ ikʼel bael ta yochibal te nailpakʼ ta swenta tsoblej. 14 Teyme ya skʼan ya yakʼ te majtanil yuʼun ta stojol te Jehová: jkojt jkolel* tat tuminchij te maʼyuk schamel sok te juntonax yaʼbilal jich bitʼil chikʼbil majtanil, jkojt jkolel meʼ tuminchij te juntonax yaʼbilal jich bitʼil majtanil ta swenta mulil, jkojt tat tuminchij te maʼyuk schamel jich bitʼil majtanil ta swenta lamalkʼinal, 15 jun moch yuʼun rosca-pan te pasbil ta lekil harina te wotsʼbil ta aceite te maba yichʼoj levadura sok jayal galletaetik te jaxbil ta aceite sok te maba yichʼoj levadura, jaʼnix jich te majtanil yuʼun sit awal tsʼunubil sok te malbil majtaniletik yuʼune. 16 Te sacerdote yame yakʼ spisil ini ta stojol te Jehová, sok yame yakʼ te majtanil yuʼun ta swenta mulil sok te chikʼbil majtanil. 17 Te sacerdote yame yakʼbey te Jehová te tat tuminchij jich bitʼil majtanil ta swenta lamalkʼinal sok yame yakʼ te moch yuʼun te rosca-pan te maba yichʼoj levadura sok yame yakʼ te majtanil yuʼun sit awal tsʼunubil sok te malbil majtanil yuʼune.

18 »›Tey-abi, te nazareo yame skʼan ya setʼ lokʼel te stsotsel sjol ta yochibal te nailpakʼ ta swenta tsoblej, yame stsob te stsotsel sjol te la yakʼ chʼiuk te jayeb kʼajkʼal yakʼoj sba ta nazareo sok yame schʼik ochel ta kʼajkʼ te ay ta yeʼtal te milbil majtanil ta swenta lamalkʼinal. 19 Te sacerdote yame stsak jchʼix snejkʼel te tat tuminchij te paybilix, jpejch rosca-pan te maba yichʼoj levadura te ay ta moch sok jpejch jayal galleta te maba yichʼoj levadura, yame yakʼbey spisil-abi ta skʼab te nazareo te kʼalal yichʼojix setʼbeyel lokʼel te stsotsel sjol te jaʼ señail te yakʼoj sba ta nazareo. 20 Te sacerdote yame skʼan ya sjimulan jich te bitʼil majtanil te ya yichʼ jimulanel ta stojol te Jehová. Chʼultesbilme ya xkʼot ta stojol te sacerdote, jaʼnix jich te stan* te majtanil te ya yichʼ jimulanel sok te yok te la yichʼ akʼel ta majtanile. Tey-abi, te nazareo ya xjuʼ ya yuchʼix vino.

21 »›Jaʼ ini jaʼ te ley ta swenta te nazareo te ay bin jamal yaloje: teme jamal ya yal te ya skʼan ya yakʼbey jun mukʼxan majtanil te Jehová te ya xjuʼ yuʼun yakʼel te ma jichuk ya yichʼ kʼanbeyel te bitʼil nazareoe, yame skʼan ya skʼotes ta pasel te bin jamal la yal te bitʼil nazareoe›».

22 Jaʼ yuʼun, te Jehová jich la yalbey te Moisés: 23 «Albeya te Aarón sok te snichʼnab: ‹Jichme ya skʼan ya awakʼbeyik bendición te lum Israel. Jich ya awalik:

24 «Akʼa yakʼbat te bendición te Jehová sok akʼa skanantayat.

25 Akʼa xojobuk sit yelaw te Jehová ta atojol sok te lekuk ya yilat.

26 Akʼa stoy sit yelaw te Jehová ta atojol sok akʼa yakʼbat lamalkʼinal»›.

27 Yame skʼan ya yalbonik te jbiil ta stojol te lum Israel yuʼun jich ya kakʼtiklanbey bendición».