Proverbios
6 Jnichʼan, teme ay atejkʼanoj aba ta stojel sbet te apatxujk,
teme ay awakʼoj akʼab yuʼun ya apas trato sok te machʼa ma xa anaʼbey sba,
2 teme ay la achuk aba yuʼun te bin jamal la awal te ya akʼotes ta pasel
—teme chukulat yuʼun te akʼop—,
3 jich yuʼun, jnichʼan, pasa ini yuʼun libre ya xjilat,
melel ayatix ta skʼab te apatxujk:
baan, pejkʼana aba ta stojol te apatxujk sok kʼanbeya wokol te yakuk yakʼat ta libre.
4 Mame xa amutsʼ asit,
mame xa awakʼ smak sba.
5 Koltaya aba lokʼel ta skʼab te jnutsojel jich te bin-utʼil ya spas te gacela-chij
sok jichnix te bin-utʼil ya spas te jaʼmal mut ta skʼab te machʼa ya xpasbot spejtsʼul yuʼune.
6 Jaʼat te chʼajate, baan, ilawil te xanichʼ,
ilawil ta lek te bin ya spas, jichme ya ata spʼijil awoʼtan.
7 Manchukme maʼyuk scomandante, maʼyuk machʼa ya xwentainot yuʼun sok maʼyuk ajwalil yuʼun,
8 ya schajpan sweʼel ta yorail skʼepelal kʼinal
sok ya stsob sweʼel ta yorail kʼajoj.
9 Jaʼat te chʼajate, ¿binto-ora ya anop xjajchat?
¿Binto-ora ya awikʼ asit?
10 Teme yato xwayat jtsʼinuk,* teme yato amutsʼxan asit jtsʼinuk,
teme yato apetxan akʼab ta wayel...,
11 jichme ya xjul ta atojol te pobreil te bin-utʼil j-elekʼ
sok te bin-utʼil jtul winik te ay yaʼtejib yuʼun milaw.
12 Te machʼa ma lek yoʼtan sok te kʼax chopol* jaʼnax baem yoʼtan ta loʼlaywanej;
13 ya xmutsʼsitaywan, ya spasulan seña ta yok, jaʼnix jich ya stijulan skʼab.
14 Ta skaj te kʼax chopol yoʼtan,*
spisil-ora yak ta schapel te bitʼil ya x-utsʼinwan* sok te bitʼil ya yakʼ xat sbaik te yantike.
15 Jich yuʼun, oranax ya xtal te lajinel ta stojol;
jtsʼin-nax* ya yichʼ lajinel te maʼyukix schajpajibal.
16 Ay wakchajp te bin ya yilay te Jehová;
jich, ay jukchajp te bin kʼaxto ya yilay:
17 te machʼa ya stoy sba, te machʼa ya spas lot,
te machʼa ya smil te machʼa maʼyuk smul,
18 te machʼa ya schap ta yoʼtan te bintik kʼax chopol*
sok te machʼa ya x-animaj yok ta spasel te bintik chopol,
19 te lotil testigo te ya spas lot ta jujun buelta te ya xkʼopoje
sok spisil te machʼatik ya yakʼ xat sba te yermanotak.
20 Jnichʼan, chʼuuna te mantaliletik yuʼun te atate
21 Akʼa nainuk spisil-ora ta awoʼtan,
sok chukame ta anukʼ.
22 Te kʼalal ya xbeenat, jaʼme ya stojobtesat;
te kʼalal ya xwayat, jaʼme ya skanantayat;
sok te kʼalal ya xjajchat, jaʼme ya skʼoponat.*
23 Melel te mantaliletik jaʼ tsumbil kʼajkʼ
sok te ley jaʼ sakal kʼinal;
te tsitsel* sok te tojobtesel jaʼ sbelal kuxlejalil.
24 Yame skanantayat ta stojol te chopol ants*
yame skoltayat lokʼel ta stojol te j-antsinel ants* te ya xmonawan ta tʼujbil kʼopetik.
25 Mame xbikʼtaj awoʼtan yuʼun te stʼujbilal,
mame xa awakʼ smonbat awoʼtan te stʼujbilal sit;
26 ta skaj te j-antsinel* ants, te winik jaʼxanix jpejch pan ya xjil yuʼun;
yan te ants te yakʼoj sba ta antsinel snutsoj jun kuxlejalil te kʼax mukʼ skʼoplal yuʼun ya slajin.
27 ¿Aybal machʼa ya xjuʼ ya yakʼ ta stan* te akʼal te tsajnax te maba ya xchikʼbot skʼuʼ yuʼune?
28 O ¿aybal machʼa ya xjuʼ ya xbeen ta sba akʼal te tsajnax te maba ya xchikʼbot te yoke?
29 Jaʼme jich ya xkʼot ta stojol te machʼa ya sjokinbey ta wayel te yinam te spatxujk:
spisil te machʼa ya spik te antse yananix yichʼ castigo-a.
30 Te ants winiketik ma spʼajik te machʼa ya x-elkʼaj
teme jaʼ ya spas ta skaj te ay swiʼnale.
31 Pero, teme la yichʼ tsakel, jukebxan buelta ya sujtes-a te bin la yelkʼane;
yame yakʼ spisil te bintik toyol stojol ay yuʼun ta sna.
32 Te machʼa ya yaʼiy antsiwej yuʼunme maʼyuk spʼijil yoʼtan;
teme jich ya spas, jaʼnix ya sle bayal swokol.
33 Jaʼnax ya sta yejchen sok maba ya yichʼ ichʼel ta mukʼ,
sok maʼyuk bin-ora ya xchʼay te skʼexlale.
34 Ta skaj te loʼlaybil ya yaʼiy sba te smamalal te ants yame x-ilin yuʼun,
jich yuʼun maba ya snaʼbey yoʼbolil sba te winik te kʼalal ya yakʼbey spakol te bin pasbot yuʼune.
35 Maba ya stsak ni junuk majtanil;
manchukme kʼax mukʼ te majtanil ya yichʼ akʼbeyel, ma jaʼuk ya xlamaj yilinba yuʼun.