Te lek yachʼil kʼop ya yal te Mateo

9 Jaʼ yuʼun och ta barco te Jesuse, kʼax bael ta jejch mar, bajt ta slumal. 2 Ay machʼatik skʼechojik tal jtul winik ta swayib te chamen schial yok skʼab. Kʼalal te Jesús la yil te ay schʼuunel yoʼtanike, jich la yalbey te winik te chamen schial yok skʼabe: «¡Ma xa amel awoʼtan, jnichʼan! Pasbilatix perdón yuʼun te amule». 3 Ay chaʼoxtul escribaetik te jich la yal ta yoʼtanike: «Yak ta sbolkʼoptayel Dios te winik ini». 4 Te Jesús la snaʼ stojol te bin yak ta yalel ta yoʼtanike, jaʼ yuʼun jich la yaltiklanbey: «¿Bin yuʼun te ma lekuk te bin yakex ta yalel ta awoʼtanike? 5 Albonik kaʼiy, ¿bin-a te ma wokol ta alele? ¿Jaʼbal te ‹pasbilatix perdón yuʼun te amule›, o jaʼbal te ‹jajchan, beenan› te ya kute? 6 Swenta ya awilik te yichʼoj mukʼ yaʼtel ta balumilal te sNichʼan te Winik* ta spasel perdón yuʼun te mulile...». Jich la yalbey te winik te chamen schial yok skʼab: «Jajchan, kʼecha bael te awayibe, baan ta ana». 7 Jich jajch te winike, bajt ta sna. 8 Chamnax yoʼtanik* yuʼun te ants winiketik te kʼalal la yilik te bin kʼot ta pasele, jich yuʼun la yalbeyik yutsil skʼoplal te Dios te jaʼ yakʼojbey tulan yaʼtel te ants winiketike.

9 Te kʼalal lokʼemix bael tey-a te Jesuse, la yil jtul winik te Mateo sbiil te nakal te banti ya yichʼ tojel patanile, sok jich la yalbey: «Laʼ, tʼunawon». Jich oranax jajch te Mateo, la stʼun bael te Jesuse. 10 Ta patil, te kʼalal yak ta weʼel-a te Jesús ta sna te Mateo, kʼotik bayal ta tul jkʼanpatanetik sok jmulawiletik te jun-nax ochik ta weʼel sok te Jesús soknix te jnopojeletik yuʼune. 11 Kʼalal la yilik te fariseoetik te jich yak ta spasel te Jesuse, jich la sjojkʼoybeyik te jnopojeletik yuʼune: «¿Bin yuʼun te ya xweʼ sok te jkʼanpatanetik sok te jmulawiletik te maestro awuʼunike?». 12 Te kʼalal la yaʼiy stojol te Jesuse, jich la yalbey te fariseoetike: «Te machʼatik lek ayike ma xtuun yuʼunik jpoxtaywanej, jaʼnax te machʼatik ayik ta chamele. 13 Jich yuʼun baanik sok nopaik te bin swentail te kʼopetik ini: ‹Te bin ya jkʼane jaʼ te ya anaʼbeyik yoʼbolil sba te yantike, ma jaʼuk te chikʼbil majtanil›, te xchie. Melel maba tal jle te machʼatik tojike, jaʼ tal jle te jmulawiletike».

14 Jich yuʼun, te jnopojeletik yuʼun te Juane noptsajik* tal ta stojol Jesús, jich la sjojkʼoybeyik: «Te joʼonkotik sok te fariseoetike kʼayemotik ta skomel jweʼelkotik, ¿bin yuʼun te ma jichuk ya spasik te jnopojeletik awuʼune?». 15 Jich albotik yuʼun te Jesús: «Te kʼalal ay machʼa ya xnujpune, ¿mabal jichuk te ma smel yoʼtan te yamigotak te kerem te ya xnujpun te bitʼil sjokinojiktoe? Pero yame sta yorail te ya yichʼik pojbeyel te kereme, jaʼtome ya skom sweʼelik-abi. 16 Maʼyuk machʼa ya spakʼantay ta achʼ pakʼ te pokoʼ kʼuʼule, melel te achʼ pakʼe ya schaʼchʼiʼ* tal te pokoʼ kʼuʼule, jich mukʼxan ya schʼi’ bael. 17 Maʼyuk machʼa ya spul yachʼil vino ta pokoʼ nujkul. Teme jich ya yichʼ pasele, ya xtʼom te nujkule sok ya xmal te vinoe, jich jkʼaxel ma xtuunix-a te nujkule. Te bin ya spas te ants winiketike jaʼ te ya spul te yachʼil vino ta yachʼil nujkul, jich ya xtuun ta schebal».

18 Te kʼalal jich yak ta yalel-a te Jesuse, tal jtul winik te yichʼoj mukʼ yaʼtel, la snijan sba ta stojol te Jesús sok jich la yalbey: «Lajixniwan te kantsil nichʼane, konik, kajanbon akʼab ta stojol, jich ya xchaʼkuxaj».

19 Jajch te Jesuse, la sjokin bael te winike, sok tʼunotik bael yuʼun te jnopojeletike. 20 Ta repentenax tal jtul ants te ayix 12 jaʼbil te ma xkejchaj ta yilel te schamele, noptsaj* bael ta spat te Jesús sok la spikbey te stiʼil snajtil kʼuʼe, 21 melel jich la yal ta yoʼtan: «Teme jaʼnax ya jpikbey te snajtil kʼuʼe, ya xlekubon». 22 La sut sba te Jesús, kʼalal la yil te antse, jich la yalbey: «¡Ayukme smukʼul awoʼtan, kantsil nichʼan! Lekubatix ta swenta te schʼuunel awoʼtane». Jich ora lekub te antse.

23 Kʼalal te Jesús och ta sna te winik te yichʼoj mukʼ yaʼtele, la yil te ay machʼatik yakik ta yokʼesinel amay* sok te yakik ta tulan okʼel te ants winiketike, 24 jich la yal te Jesuse: «Lokʼanik bael, maba lajem te achʼixe, wayalnax». Te kʼalal jich la yaʼiyik stojole, jajch stseʼlayik yuʼun ya slabanik te Jesuse. 25 Te kʼalal la yichʼik tikunel lokʼel te ants winiketike, och bael te Jesús te banti ay te achʼixe, la stsakbey te skʼabe, jich jajch te achʼixe. 26 Tey-abi pujk ta alel ta spamal kʼinal te bin la spas te Jesuse.

27 Te kʼalal lokʼemix bael tey-a te Jesuse, tʼunotik yuʼun chaʼtul winiketik te ma xyilik kʼinal, jich yakik ta aw: «¡Naʼa yoʼbolil jbakotik, sNichʼan David!». 28 Kʼalal och ta na te Jesús, noptsajik* tal ta stojol te winiketik te ma xyilik kʼinale. Jich jojkʼoybotik yuʼun te Jesús: «¿Aybal schʼuunel awoʼtanik te ya xjuʼ ya jlekubtesexe?». «Ay schʼuunel koʼtankotik, Kajwal», xchiik. 29 Jich te Jesús la spikbey te sitike sok jich la yalbey: «Ta swenta te schʼuunel awoʼtanike, jich akʼa kʼotuk ta pasel te bin la akʼanike». 30 Jich jam te sitike. Pero, jich albotik ta mantal yuʼun te Jesús: «Tsajtayame* abaik, mame ayuk machʼa xa awalbeyik yaʼiy te bin kʼot ta pasel ta atojolike». 31 Pero, te kʼalal lokʼik baele, jajch spukik ta alel ta spamal kʼinal te bin la spas te Jesús ta stojolike.

32 Te kʼalal bajtik te chaʼtul winiketike, la yikʼik tal ta stojol te Jesús jtul umaʼ te ochem pukuj ta yoʼtane. 33 Te kʼalal lokʼesbot te pukuj ta yoʼtane, jajch ta kʼop te winike. Chamnax yoʼtanik* yuʼun te ants winiketik sok jich la yalik: «Maʼyuk jich kilojtik ta Israel te bin kʼot ta pasele». 34 Pero, jich la yalik te fariseoetik: «Ta swenta yuʼel te jolal yuʼun te pukujetik ya slokʼes pukujetik».

35 Jich te Jesús jajch sbeentay te mukʼul lumetik sok te chʼin lumetik. Te banti kʼaxe, la yaʼiy pʼijubteswanej ta sinagogaetik sok yak ta scholel te lek yachʼil kʼop yuʼun te Wentainele.* La slekubteslan spisil te machʼatik ayik ta chamel sok te machʼatik ay bintik kʼux ya yaʼiyike. 36 Kʼalal la yil te kʼax bayal ta tul te ants winiketike, kʼaxto la snaʼbey yoʼbolil sbaik, melel utsʼinbilik sok maba kanantaybilik* jich bin-utʼil tuminchijetik te maʼyuk jkanan yuʼunike. 37 Jaʼ yuʼun, te Jesús jich la yalbey te jnopojeletik yuʼune: «Bayal sit te awal tsʼunubile, jaʼ maʼyuk bayal te j-aʼteletike. 38 Jich yuʼun kʼanbeyaik te Yajwal te awal tsʼunubil te yakuk stikunxan j-aʼteletik ta stsobeyel sit te awal tsʼunubil yuʼune».