2 Crónicas

36 Jich yuʼun, te ants winiketik yuʼun te lume la yotsesik ta ajwalil ta Jerusalén te Jehoacaz snichʼan Josías, jaʼ la sjelolin jilel te state. 2 Ay 23 yaʼbilal-a te Jehoacaz te kʼalal och ta ajwalil sok wentainwan oxeb u ta Jerusalén. 3 Pero, te ajwalil yuʼun Egipto la slokʼes ta ajwalil ta Jerusalén sok la skʼanbey 100 talento* yuʼun plata te lume sok jun talento* yuʼun oro. 4 Jaʼnix jich, te ajwalil yuʼun Egipto la yotses ta ajwalil ta Judá sok ta Jerusalén te Eliaquim te jaʼ yijtsʼin te Jehoacaz, soknix la sjelbey te sbiil, Jehoiaquim la yakʼbey sbiilin. Pero, te Nekó la yikʼ bael ta Egipto te Jehoacaz.

5 Ay 25 yaʼbilal-a te Jehoiaquim te kʼalal och ta ajwalil sok wentainwan 11 jaʼbil ta Jerusalén. Jaʼ la spas te bintik ma lek ya yil te Jehová te Dios yuʼune. 6 Tal ta akʼbeyel guerra yuʼun te Nabucodonosor te ajwalil yuʼun Babilonia, te Jehoiaquim chukot ta chaʼlijkʼ cadena te pasbil ta cobre sok ikʼot bael ta Babilonia. 7 Te Nabucodonosor la yichʼ bael ta Babilonia cheʼoxeb aʼtejibaletik te ya xtuun ta sna te Jehová sok la yakʼ ta sna te ay ta Babilonia. 8 Te bintik la spas ta skuxlejal te Jehoiaquim, te bintikxan ilobtik sba la spas sok spisil te bintik chopol* tabot ta stojole, tsʼibaybil jilel ta Libro yuʼun te Ajwaliletik yuʼun Israel sok yuʼun Judá. Tey-abi, jaʼ och jilel ta ajwalil te Joaquín, te snichʼane.

9 Ay 18 yaʼbilal-a te Joaquín te kʼalal och ta ajwalil sok wentainwan oxeb u sok lajuneb kʼajkʼal ta Jerusalén. Te Joaquín jaʼ la spas te bintik ma lek ya yil te Jehová. 10 Ta sjajchibal jaʼbil,* te ajwalil Nabucodonosor la yal mantal te yakuk yikʼik bael ta Babilonia sok te yakuk yichʼik bael te bintik bayal stojol te ay ta sna te Jehová. Jaʼnix jich la yotses ta ajwalil ta Judá sok ta Jerusalén te Sedequías, te stajun* te Joaquín.

11 Ay 21 yaʼbilal-a te Sedequías te kʼalal och ta ajwalil sok wentainwan 11 jaʼbil ta Jerusalén. 12 Te Sedequías jaʼ la spas te bintik ma lek ya yil te Jehová te Dios yuʼune. Maba la spejkʼan sba ta stojol te j-alwanej Jeremías, jaʼ te machʼa kʼopoj ta swenta smantal te Jehová. 13 Jaʼnix jich, te Sedequías la stoy sba ta stojol te ajwalil Nabucodonosor, jaʼ te machʼa albot yuʼun te ay bin jamal ya yal ta stojol te Diose. Mero tulan la yakʼ te yoʼtane, ma la skʼan sujt ta stojol te Jehová te Dios yuʼun Israel. 14 Spisil te jolaletik yuʼun te sacerdoteetik sok te lume jkʼaxel maba jun yoʼtan la yakʼ sbaik ta stojol te Dios, jaʼ la spasik spisil te bintik ilobtik sba ya spasik te nacionetik. Jaʼnix jich la sbolobtesbeyik skʼoplal te sna te Jehová te ay ta Jerusalén te jaʼnix schʼultesoje.

15 Te Jehová te Dios yuʼun te antiguo smeʼ statik maba la skom sba ta yakʼel jultesel oʼtanil, jaʼ yuʼun la stikun winiketik ta stojolik. Ta swenta te la snaʼbey yoʼbolil sba te lum yuʼun sok te snae, bayal buelta la yakʼ jultesel oʼtanil. 16 Pero la slabanik te winiketik yuʼun te smelelil Dios. La spʼajik te bintik la yal te Dios sok la slabanik te j-alwanejetik yuʼun, jaʼto te kʼalal jajch yilinba te Jehová ta stojol te lum yuʼun, maʼyuk bin juʼix ta pasel ta stojolik.

17 Jaʼ yuʼun, te Diose la stikun ta stojolik te ajwalil yuʼun te caldeoetik, jaʼ te machʼa la smiltiklan ta espada te keremetik tey ta chʼul awilal. Maba la snaʼbey yoʼbolil sba te keremetik, te achʼixetik, te mamaletik sok te machʼatik ayik ta chamele. Te Diose la yakʼbey ta skʼab spisil. 18 Spisil te aʼtejibaletik te ay ta sna te smelelil Dios —chikan teme chʼinik o mukʼik—, soknix-euk te kʼulejalil te ay ta sna te Jehová, te kʼulejalil te ay ta sna te ajwalil sok te kʼulejalil te ay ta sna te machʼatik yichʼoj mukʼ yaʼtelik yuʼune, spisil la yichʼ bael ta Babilonia. 19 La schikʼbey te sna te smelelil Dios, la sjinbey te stsʼajkʼul te Jerusalén, la stsumbey kʼajkʼ te toyol tsʼajkʼetik te yichʼoj lek yip sok la slajin spisil te biluketik te toyol stojole. 20 Te ajwalil la schuktiklan bael ta Babilonia te machʼatik maba la smiltiklan ta espada, jaʼ j-abatetik kʼot yuʼun sok jaʼ j-abatetik kʼot yuʼun-euk te snichʼnab te ajwalil jaʼto te kʼalal och ta wentainwanej te ajwalil yuʼun Persia, 21 yuʼun jich ya xkʼot ta pasel te bin la yal te Jehová ta swenta te Jeremías. Jochol jil te lumkʼinal jaʼto te kʼalal tsʼakaj te jayeb sabadoetik te maba la skux yoʼtane. Te jayeb tiempo jochol jil te lumkʼinale, la skux yoʼtan jaʼto te kʼalal tsʼakaj 70 jaʼbil.

22 Ta sbabial jaʼbil yochel ta ajwalil-a te Ciro te ajwalil yuʼun Persia, te Jehová la stijbey yoʼtan te Ciro te ajwalil yuʼun Persia yuʼun ya stikun ta alel jun mantalil ta spamal te kʼinal te banti swentainoj yuʼun jich ya xkʼot ta pasel te bin la yal te Jehová ta swenta te Jeremías. Te mantalil te la yal sok te la yakʼ ta tsʼibayel jich ya yal: 23 «Jich ya yal te Ciro te ajwalil yuʼun Persia: ‹Te Jehová te Dios yuʼun te chʼulchan la yakʼbonix ta jkʼab spisil te ajwaliletik ta balumilal sok la yakʼbonix ta jwenta yuʼun ya jpasbey sna ta Jerusalén te ay ta skʼinal Judá. Jaʼex te lumex yuʼune, akʼa sjokinex te Jehová te Dios awuʼunik sok moanik bael tey-a›».