Lamentaciones
א [álef]
3 Joʼon la kil te wokolil la yakʼ te xul o wajchʼ yuʼun te yilinba te Diose.
2 La stenon lokʼel sok ya yakʼ xbeenon ta ijkʼal kʼinal, ma jaʼuk ta sakal kʼinal.
3 Ta jujun kʼajkʼal sjachoj skʼab ta skontrainbelon, jich ya spas sjunal kʼajkʼal.
ב [bet]
4 La slajinbonix yip te jbakʼetal sok te jnujkulel;
la swakʼtiklanbon* te jbakele.
5 La smakon; la sjoytayon ta chʼaal veneno sok ta wokolil.
6 La sujon yuʼun ya xjilon ta ijkʼal kʼinal jich te bin-utʼil te machʼatik ayix bayal jaʼbil lajemike.
ג [guímel]
7 La sjoytayon ta pajkʼetik swenta ma xjuʼ ya xlokʼon ta anel.
La schukon ta cadena te pasbil ta cobre te kʼax ale.
8 Te kʼalal ya x-awunon ta skʼanel koltayel, ma skʼan ya yaʼiy te oración kuʼune.
9 La smakbon jbe ta juxbil tonetik;
la yakʼ chujkulajuk te beetik kuʼune.
ד [dálet]
10 Yak smaliybelon jich te bin-utʼil jkojt oso yuʼun ya yochintayon
sok jich te bin-utʼil jkojt león-choj te snakʼoj sba.
11 La sujon ta yijkitayel te be jtʼunoje sok la sjinon jilel.*
Jtukel la yijkitayon.
12 La skox* ta lek te stʼimalteʼ, la stojlinon sok te sflecha.
ה [he]
13 La slowbon te jriñon sok te flechaetik te ay ta yawil yuʼune.
14 La yakʼ te ya stseʼlayonik spisil te lumetik, ta sjunal kʼajkʼal ya skʼayojtaybonik jkʼoplal.
15 La snojesbon jchʼujt ta bintik chʼa sok la yakʼbon kuchʼ bayal chʼaal jaʼmal.*
ו [waw]
16 Ya swuybon sbakel ke sok te grava;*
ya jkʼolan jba yuʼun xiwel te banti ay te tane.
17 La apojbon te lamalkʼinal ya kaʼiy; chʼayix ta koʼtan te bintik lek ay kuʼun-ae.
18 Jaʼ yuʼun, jich ya kal: «Chʼayemix te kutsilal sok te smukʼul koʼtan ta stojol te Jehová».
ז [zayin]
19 Juluk ta awoʼtan te ayon ta mel-oʼtan sok te maʼyuk jnae, juluk ta awoʼtan te chʼaal jaʼmal* sok te chʼaal veneno te la jweʼe.
20 Ya jnaʼ te ya xjulon ta awoʼtan sok te ya anijan aba yuʼun ya akoltayon.
21 Yame jultes ta koʼtan ini; jaʼ yuʼun yame jmaliy sok slamalil koʼtan.
ח [jet]
22 Ta swenta te skʼuxul yoʼtan te ma x-ijkitaywan te Jehová maba la slajinotik,
melel spisil-ora ya yakʼ ta ilel te ya snaʼ yoʼbolil jbatik.
23 Ya x-achʼub ta jujun sab; mero jun awoʼtan atukel.
24 Jich la kal: «Te Jehová jaʼ te bin ay ta jwenta yichʼel, jaʼ yuʼun yame jmaliy sok slamalil koʼtan».
ט [tet]
25 Te Jehová lek yoʼtan ta stojol te machʼa ay bin ya smaliy ta stojol, te machʼa spisil-ora ya xleot yuʼune.
26 Jaʼ lek te sokuk slamalil koʼtantik* ya jmaliytik te kolel yuʼun te Jehová.
27 Jaʼ lek te kʼalalto ta skeremil ya skuch te syugo-teʼ te winike.
י [yod]
28 Stukeluk nakal ya xjil sok mame ayuk bin ya yal te kʼalal ya xkajanbot yuʼun Dios te yugo-teʼ.
29 Akʼa spajkan sba kʼalal ta lum; repenta ayto bin ya xjuʼ ya smaliy.
30 Akʼa yakʼbey te scho te machʼa ya xmajot yuʼune; akʼa yichʼ bolkʼoptayel jaʼto te ban kʼalal ya xjuʼ yuʼune.
כ [kaf]
31 Melel maba ya spʼajotik ta sbajtelkʼinal te Jehová.
32 Manchukme la yakʼ tulan wokolil, jaʼnix jich ya snaʼ yoʼbolil jbatik ta swenta te kʼax mukʼ te skʼuxul yoʼtan te ma x-ijkitaywan.
33 Melel maba ya x-akʼbot stseʼelil yoʼtan ta yakʼbeyel swokol ni jaʼuk te bintik kʼux te yal snichʼnab te ants winiketik.
ל [lámed]
34 Te stsʼoʼel* ta tekʼel te jchukeletik ta balumilal,
35 te kʼalal ma xyichʼ chajpanbeyel te kʼop yuʼun te winik ta stojol te Machʼa toyol ay
36 sok te kʼalal ma stojiluk ya yichʼ chajpanbeyel te kʼop yuʼun te winik,
jaʼ te bintik kʼax ma lek ya yil te Jehová.
מ [mem]
37 Jich yuʼun, ¿machʼa ay bin ya xjuʼ ya yal sok te ya skʼotes ta pasel teme ma jaʼuk yaloj ta mantal te Jehová?
38 Te Machʼa toyol aye ma xjuʼ te jun-nax ya xlokʼ ta ye te bintik lek
sok te bintik ma lek.
39 ¿Aybal machʼa ya xjuʼ ya xjajch ta wulwulkʼop te kʼalal ya sta swokol yuʼun te smule?
נ [nun]
40 Akʼa kiltik ta lek sok akʼa jtsajtaytik* te bin yilel te jtaleltik, sok akʼa sujtukotik ta stojol te Jehová.
41 Sokuk spisil koʼtantik akʼa jtoy moel jkʼabtik ta skʼoponel te Dios te ay ta chʼulchan, sok jichuk ya kaltik:
42 «Jtaoj jmulkotik ta atojol sok jtoyoj jbakotik ta atojol, pero maba apasojbotik perdón.
ס [sámekh]
43 Ta swenta te awilinba la amak jbetik yuʼun ma xnoptsajotik* ta atojol;
maba la anaʼ yoʼbolil jbatik te kʼalal la anutsotik sok te la amilotike.
44 Ta swenta tokal la amak jbetik yuʼun jich ma xkʼot ta atojol te oración kuʼuntik.
45 La akʼatpʼunotik ta kʼaʼpal sok ta bintik ma xtuun ta yolil te lumetik».
פ [pe]
46 Spisil te jkontrataktik ya sjam yeik yuʼun ya skontrainonkotik.
47 Te bin staojotik jaʼ te xiwel, pejtsʼetik, lajinel sok te jtukel jilotike.
48 Ta jsit ya xtʼom lokʼel be jaʼetik ta skaj te la yichʼ lajinel te achʼix yuʼun te lum kuʼune.
ע [ayin]
49 Maba ya xkejchaj ta okʼel te jsite, maba ya xlujb ta okʼel,
50 jaʼto te kʼalal ya yil te Jehová sok ya yakʼ tal sit kʼalalto ta chʼulchan.
51 Ya yakʼon ta wokol te jsit ta skaj te achʼixetik yuʼun te mukʼul lum kuʼune.
צ [sadé]
52 Maʼyuk swentail te bin yuʼun te jkontratak la stsakonik jich te bin-utʼil jaʼmal mut.
53 La schʼojonik ochel ta yutil pozo yuʼun ya smilonik;
ma la skom sbaik ta schʼojbelonik ta ton.
54 La smukbonix jol te jaʼe, sok jich la kal: «¡Lajemonix ya kaʼiy!».
ק [qof]
55 Kʼalalto ta skʼubulil te pozo la kalbat te abiil, Kajwal Jehová.
56 Aʼiybon awaʼiy te jkʼope. Ma xa amak achikin te kʼalal ya kawtayat ta skʼanel koltayel.
57 Noptsajat* tal ta jtojol te bin kʼajkʼalil la jkʼoponate. Jich la awalbon: «Mame xiwat».
ר [resh]
58 La achajpanbon te kʼop kuʼun, Kajwal, Jehová, la akoltaybon te jkuxlejale.
59 Kajwal, Jehová, awiloj te bin chopol* la spasbonik. Chajpanawon ta stojil.
60 Awiloj spisil te spakol yakʼojbonik, spisil te bintik chopol* ya schapik ta jtojol.
ש [sin o shin]
61 Kajwal, Jehová, awaʼiyoj te ya sbolkʼoptayonik, spisil te bintik chopol* ya schapik ta jtojol,
62 te bintik ya yalik te jkontratak sok te bintik muken ya yalik ta jtojol ta sjunal kʼajkʼal.
63 ¡Ilawil! ¡Manchukme nakalik o tekʼelik, ya slabanonik ta skʼayojik!
ת [taw]
64 Kajwal, Jehová, jaʼatme ya awakʼbey stoj ta swenta te bintik ya spasike.
65 Jaʼat ya awakʼ te ya xtulanaj te yoʼtanik; jichme ya abolkʼoptaylan.
66 Jehová, ta swenta awilinba yame anutstiklan sok yame alajinlan ta balumilal.