Génesis

33 Kʼalal la stoy sit te Jacob, la yil te yak ta talel te Esaú sok 400 ta tul winiketik. Jich la spuktiklan te alaletik ta stojol te Lea, te Raquel sok te chaʼtul j-abat antsetik yuʼune. 2 Ta nail, jaʼ la yakʼ te j-abat antsetik sok te yalatakik, ta patil la yakʼ te Lea sok te yalatak, ta slajibal la yakʼ te Raquel sok te José. 3 Jaʼ nailaj bael te Jacobe. Te kʼalal yak ta noptsajel* bael ta stojol te sbankile, jukeb buelta la spajkan sba kʼalal ta lum.

4 Te Esaú animalnax bajt sta te Jacob, la smey sok la yujtsʼuy,* jajchik ta okʼel ta schebalik. 5 Kʼalal te Esaú la stoy sit, la yil te antsetik sok te alaletik, jich la sjojkʼoy: «¿Machʼatik-a te sjokinojat tale?». Jich la yal te Jacob: «Jaʼ te snichʼnab te awabat te staoj ta swenta te bendición akʼbil yuʼun te Diose». 6 Tey-abi noptsajik* tal te j-abat antsetik sok te yalatakike, la snijan sbaik, 7 jaʼnix jich noptsaj* tal te Lea sok te yalatak, la snijan sbaik. Ta slajibal noptsaj tal te José sok te Raquel, jaʼnix jich la snijan sbaik.

8 Te Esaú jich la sjojkʼoybey te Jacob: «¿Bin yuʼun te la atikun te j-abatetik sok spisil te chambalametik te la jtatiklan ta bee?». Te Jacob jich la yal: «Kajwal, yuʼun ya jkʼan te lek ya awilon». 9 Tey-abi, te Esaú jich la yalbey: «Kijtsʼin, bayalix te bintik ay kuʼun. Jaʼ awuʼun ini. Ichʼa jilel». 10 Pero, te Jacob jich la yalbey: «Maʼuk, teme lek ya awilonixe, awokoluk, tsaka te majtanil ya kakʼbate, melel la kichʼ tal swenta ya xjuʼ ya kilbat te asit awelaw. La kilix te asit awelaw, jich kʼoem te la kilbeyix sit yelaw te Diose, melel lek la awilonix. 11 Awokoluk, tsaka te majtanil te la kichʼbat tale, melel yakʼojbon bendición te Dios sok ay kuʼun spisil te bintik ya xtuun kuʼune». Te bitʼil maba la skom sba ta yalbeyele, jich la stsak te Esaú.

12 Ta patil, te Esaú jich la yalbey: «Konik, jajchukotik ta beel. Joʼon ya jtojobtesat bael». 13 Pero, te Jacob jich la yalbey: «Kajwal, anaʼoj te chʼinikto te alaletike. Jaʼnix jich anaʼoj te ay kikʼoj tal tuminchijetik sok meʼ wakaxetik te ay yalatakik. Teme jun-nax kʼajkʼal ya jtentik ta beel te chambalametik, yame xlaj ta spisilik. 14 Awokoluk, kajwal, nailajan bael ta stojol te awabate. Kʼunkʼun ya xtalon sok te chambalametik sok te alaletik, jaʼto teme ya xkʼoon ta Seír te banti ay te kajwale». 15 Jaʼ yuʼun, te Esaú jich la yalbey: «Ya kijkitaybat chaʼoxtuluk te winiketik te sjokinojon tale». Pero, te Jacob jich la yal: «¿Bin yuʼun te jich ya apase? Tikʼ-a te lek ya yilonix te kajwale». 16 Jich yuʼun, ta kʼajkʼal-abi te Esaú sujt bael ta Seír.

17 Te Jacob bajt ta Sucot. Tey la spas sna sok tey la spasbey sna te chambalametik yuʼune. Jaʼ yuʼun, Sucot* la yakʼbey sbiilin te lugar-abi.

18 Te Jacob lokʼ bael ta Padán-Aram, bajt ta mukʼul lum yuʼun Siquem te ay ta skʼinal Canaán, lek kʼot tey-a sok la spas scampamento ta nopol* te mukʼul lume. 19 Ta patil la stoj 100 ta sejp plata ta swenta te jsejp kʼinal te banti la yakʼ te snailpakʼe. Jaʼ chonbot yuʼun te snichʼnab Hamor, te stat te Siquem. 20 Tey la spas jun skajtajib chikʼbil majtanil sok la yakʼbey sbiilin Dios, te Dios yuʼun Israel.