Te lek yachʼil kʼop ya yal te Marcos

9 Jaʼnix jich albotik yuʼun te Jesús: «Jamal ya kalbeyex te ay machʼatik liʼ ayik ini te maba ya xlajik jaʼto teme ya yilik te ayix ta mantalteswanej te Wentainel* yuʼun te Diose». 2 Wakeb kʼajkʼal ta patil, te Jesús la yikʼ bael ta toyol wits te Pedro, Santiago sok te Juane, stukeliknax ayinik tey-a. Kʼatpʼuj ta stojolik tey-a te Jesuse. 3 Xlemetnax jajchel te skʼuʼe; saknax bajt te maʼyuk machʼa jich ya xjuʼ yuʼun sakubtesel pakʼ ta balumilal. 4 Jaʼnix jich chiknaj ta stojolik te Elías sok te Moisés te yakik ta kʼop sok te Jesuse. 5 Jich yuʼun, te Pedro jich la yalbey te Jesús: «Rabí,* ¡kʼax lek te liʼ ayotike! Akʼa jpastik oxwol axibal na: jun awuʼun, jun yuʼun te Moisés sok jun yuʼun-euk te Eliase». 6 Ta melel, ma la snaʼ te bin la spas te Pedroe, melel kʼaxto xiwenik-a. 7 Ta patil tal tokal ta stojolik te potsotik yuʼune sok ay machʼa jich chiknaj skʼop ta tokal: «Jaʼ jNichʼan ini te mero kʼux ta koʼtane. Aʼiybeyaik te skʼope». 8 Te k’alal la yilik ta sjoyobalike, maʼyukix machʼa ay tey-a, jaʼxanix te Jesuse.

9 Te kʼalal yakikix ta koel tal ta wits-ae, te Jesús la yalbey ta mantal te jnopojeletik te manchuk ayuk machʼa ya yalbeyik yaʼiy te bin la yilike, jaʼto te kʼalal yichʼojix chaʼkuxajtesel-a te sNichʼan te Winike.* 10 La schʼuunik te bin albotik* yuʼun te Jesuse, pero talel kʼaxel jajch yalbey sbaik te bin-utʼil ay-a te ya xchaʼkuxaj tal ta yolil te machʼatik lajemike. 11 Jaʼ yuʼun, jich la sjojkʼoybeyik te Jesús: «¿Bin yuʼun ya yalikix-a te escribaetik te jaʼ nail ya xtal te Eliase?». 12 Jich albotik yuʼun te Jesús: «Melelnix-a, jaʼ nail ya xtal te Elías yuʼun ya xtal stojobtes spisil te bintik ya skʼan chajpanele. Pero, ¿bin yuʼun-nix-a te jich tsʼibaybil te ya xkʼax swokol sok te ya yichʼ pʼajel te sNichʼan te Winike?* 13 Pero, joʼon ya kalbeyex te xtalukix te Eliase sok te la spasbeyik te bin la skʼan yoʼtanike, jich te bitʼil tsʼibaybil te ya xkʼot ta stojole».

14 Te kʼalal kʼotik tey-a te banti ayik te yantik jnopojeletike, la yilik te joytaybilik yuʼun bayal ta tul ants winiketik sok te ay chaʼoxtul escribaetik te yakik ta stsakel sbaik ta kʼop soke. 15 Kʼalal te ants winiketik la yilik te tal te Jesuse, chamnax yoʼtanik* yuʼun sok animalnax bajtik ta spatbeyel yoʼtan. 16 Jich jojkʼoybotik yuʼun te Jesús: «¿Bin-a te yak atsakbel abaik ta kʼop yuʼune?». 17 Ay jtul ta yolilik te jich la sjakʼe: «Maestro, la kikʼbat tal te jnichʼan yuʼun ochem pukuj ta yoʼtan te makbil skʼop yuʼune. 18 Ta jujun buelta te ya x-utsʼinot yuʼun te pukuje, ya xjipot ta lum, ya xlokʼ sbul ye, ya skʼuxuxan ye sok maʼyuk yip ya x-ijkitayot yuʼun. La jkʼanbey te jnopojeletik awuʼun te yakuk slokʼesik te pukuj te ay ta yoʼtane, pero maba juʼ yuʼunik». 19 Jich la yal te Jesús: «¡Jaʼ jkaj tsʼumbalilex te maʼyuk schʼuunel awoʼtanike! ¿Jayebtoxan kʼajkʼal ya skʼan ya jokinex? ¿Jayebtoxan kʼajkʼal ya skʼan ya xkujch kuʼun te bitʼil ayexe? Ikʼbonik tal te kereme». 20 Jich yuʼun la yikʼbeyik tal. Kʼalal te pukuj la yil te Jesuse, tulan la syukʼilan te kereme sok la yakʼ tupʼuk yikʼ. Te kʼalal tʼuxaj ta lume, tey la sbalulan sba-a sok lokʼ sbul te yee. 21 Tey-abi, te Jesús jich la sjojkʼoybey te stat te kereme: «¿Jayebix kʼajkʼal te jich yak ta pasbeyele?». Jich la yal: «Ta yalalilto. 22 Bayal buelta ya xchʼojot ochel ta kʼajkʼ o ta jaʼ yuʼun te pukuje, melel ya skʼan ya xmilot. Pero, teme ay bin ya xjuʼ awuʼun spasele, naʼa yoʼbolil jbakotik sok koltayawonkotik». 23 Te Jesús jich la yal: «¿Bin yuʼun te ya awal ‹teme ay bin ya xjuʼ awuʼun›? Te machʼa ay schʼuunel yoʼtane spisil ya xjuʼ yuʼun spasel». 24 Te stat te kereme oranax jich tulan kʼopoj: «¡Ay schʼuunel koʼtan! Pero ¡koltayawon te ayukxan te schʼuunel koʼtane!».

25 Te kʼalal la yil te Jesús te animalnax yak ta talel bayal ta tul ants winiketik ta stojolike, jich tulan la skʼopon te pukuje: «Jaʼat, pukuj, te akʼatpʼunoj ta umaʼ sok ta kojkchikin te kereme, ¡ya jpasat ta mantal te ya xlokʼat ta yoʼtan sok te maba ya x-ochatix yan buelta!». 26 Awun te pukuje sok bayal buelta la sjipulan ta lum te kereme, jich lokʼ ta yoʼtan. Lajem jil yilel te kereme. Jteb ma spisil jich la yalik te ants winiketik: «¡Laj te kereme!». 27 Pero, te Jesús la snit jajchel ta skʼab, jich tejkʼaj te kereme. 28 Te Jesús och bael ta na sok te jnopojeletik yuʼune. Tey-abi, jich la sjojkʼoybeyik ta stukelnax te Jesuse: «¿Bin yuʼun te ma juʼ kuʼunkotik slokʼesel te pukuje?». 29 Jich albotik yuʼun te Jesús: «Te pukuj jich bitʼil ini jaʼnax ya xjuʼ ya xlokʼ ta swenta skʼoponel Dios».

30 Lokʼik bael tey-a, kʼaxik ta skʼinal Galilea, pero te Jesús ma la skʼan te ay machʼa ya snaʼ stojole, 31 melel yak ta snojptesel-a te jnopojeletik yuʼune. Jich yak ta yaltiklanbeyel: «Te sNichʼan te Winik* yame yichʼ akʼel ta skʼab te ants winiketike sok ya smilik. Manchukme ya smilik, ta yoxebal kʼajkʼal ya xchaʼkuxaj». 32 Maba kʼot ta yoʼtanik te bin albotike sok xiwik ta sjojkʼoybeyel.

33 Kʼotik ta Capernaúm. Te kʼalal ayikix ta nae, jich la sjojkʼoybey te jnopojeletike: «¿Bin-a te la atij abaik ta kʼop yuʼun ta bee?». 34 Maʼyuk bin la yalik yuʼun, melel ta be la stsak sbaik ta kʼop yuʼun te machʼa mukʼ skʼoplal ta yolilike. 35 Jaʼ yuʼun, te Jesús la snajkan sba, la yikʼ tal te 12 ta tul jnopojeletike sok jich la yaltiklanbey: «Teme ay machʼa nail ya skʼan ya xkʼote, ya skʼan te pekʼel ya yakʼ sba ta stojol te yantik, sok te ya x-abatin ta stojol te yantike». 36 Tey-abi la yikʼ tal jtul chʼin kerem, la stejkʼan ta yolilik, la spet sok jich la yalbey te jnopojeletike: 37 «Te machʼa ya yikʼ ta sna ta swenta jbiil jtul chʼin kerem jich bitʼil ini, jaʼnix jich ya yikʼon ta sna-euk; te machʼa ya yikʼon ta snae ma jaʼuknax ya yikʼon te joʼone, jaʼnix jich ya yikʼ-euk te machʼa la stikunon tale».

38 Te Juan jich la yalbey te Jesús: «Maestro, la kilkotik jtul winik te yak ta slokʼesel pukujetik ta swenta abiil; pero te bitʼil maba sjokinojotik, la jkomtik ta spasel». 39 Pero, te Jesús jich la yal: «Mame xa akomik, melel ma xjuʼ te ay machʼa ya spas milagro ta swenta jbiil te jaʼnix jich ma lek jkʼoplal ya yalbone. 40 Melel te machʼa maba ya skontrainotike jun yoʼtan ta jtojoltik. 41 Jamal ya kalbeyex, te machʼa ya yakʼbeyex junuk vaso jaʼ ta skaj te jaʼ yuʼunex te Cristoe, yananix yichʼ majtantesel-a. 42 Pero, te machʼa ya yakʼ xyal jtuluk te machʼatik pekʼel yakʼoj sbaik te ay schʼuunel yoʼtanik ta jtojole, jaʼ lek te ya yichʼ chukbeyel ta snukʼ te jsejp ton yuʼun molino te ya sjoyoyin jkojt burro sok te akʼa yichʼ chʼojel ochel ta mar.

43 »Teme ay bin-ora ya yakʼbat ale amul te jchʼix ak’abe, boja lokʼel. Jaʼ lekxan te ya ata te akuxlejal manchukme jchʼixnax akʼab, jaʼ wokol teme schebal akʼab ya awichʼ chʼojel bael ta Gehena,* ta kʼajkʼ te ma xjuʼ ta tupʼel. 44 * 45 Teme ya yakʼbat ale amul te jchʼix awoke, boja lokʼel. Jaʼ lekxan te ya ata te akuxlejal manchukme jchʼixnax awok, jaʼ wokol teme schebal awok ya awichʼ chʼojel bael ta Gehena.* 46 * 47 Jaʼnix jich, teme ya yakʼbat ale amul te jpʼij asite, chʼoja bael ta namal.* Jaʼ lekxan te ya x-ochat ta Wentainel* yuʼun Dios manchukme jpʼijnax asit, jaʼ wokol teme schebal asit ya awichʼ chʼojel bael ta Gehena,* 48 te banti ma xlaj te yal jae* sok ma xtupʼ te kʼajkʼe.

49 »Melel spisil te ants winiketik yame yichʼik chiʼubtesel sok kʼajkʼ, jich bin-utʼil ya yichʼ akʼbeyel atsʼam te weʼelile. 50 Kʼax lek te atsʼame. Pero, teme ya xchʼay te schiʼile, ¿bin-utʼil kʼan chiʼubukxan? Ayukme achiʼilik jich bin-utʼil atsʼam sok talel kʼaxel lamalukme awoʼtanik».