Proverbios
10 Pʼijil kʼopetik yuʼun te Salomón.
Te nichʼanil te ay spʼijil yoʼtan ya yakʼbey stseʼelil yoʼtan te stat,
pero te nichʼanil te maʼyuk spʼijil yoʼtan ya yakʼbey smel yoʼtan te snan.*
2 Te kʼulejalil te chopol* te bitʼil tabil maʼyuk skʼoplal ya xkʼot,
pero te bin stojil ta pasel ya xkoltaywan lokʼel ta lajel.
3 Te Jehová maba ya yakʼ xkʼax ta wiʼnal te machʼa toj yoʼtan,
pero te machʼatik chopolik* ma xyakʼbey te bin kʼaxto ya skʼan te yoʼtanike.
4 Te machʼa chʼaj skʼab ya x-akʼot ta pobreil,
pero te skʼab te machʼa tulan ya x-aʼtej ya sta skʼulejal.
5 Te nichʼanil te ya stsobey sit te yawal tsʼunub ta yorail skʼepelal kʼinal yuʼunme pʼij yoʼtan,
pero te nichʼanil te kʼuben swayel ta yorail te stsobeyel sit te awal tsʼunubil ya sta kʼexlal.
6 Ay bendición ta stojol te machʼa toj yoʼtan,
pero te machʼa chopol* skʼejoj ta yoʼtan te utsʼinwanej,* manchukme tʼujbilnax yaʼiyel te skʼope.
7 Leknax ya yichʼ albeyel skʼoplal te kʼalal ya yichʼ naʼel te machʼa toj yoʼtane,
pero te sbiil te machʼa chopol* maba lek skʼoplal stukel.
8 Te machʼa ay spʼijil yoʼtan yame schʼuun te mantaliletik,
pero te machʼa ya yal jowilkʼopetik yame sta swokol yuʼun.
9 Te machʼa ya spas te bin toj jun yoʼtan ya xkuxin,
pero te machʼa ma tojuk te sbe yananix yichʼ naʼel-a.
10 Te machʼa ya xmutsʼsitaywan sok sbolil yoʼtan ya yutsʼinbey* yoʼtan te yantik
sok te machʼa ya yal jowilkʼopetik yame sta swokol yuʼun.
11 Te bin ya xlokʼ ta ye te machʼa toj yoʼtan ya yakʼ kuxlejalil,
pero te machʼa chopol* skʼejoj ta yoʼtan te utsʼinwanej,* manchukme tʼujbilnax yaʼiyel te skʼope.
12 Te pʼajaw ya sjach kʼop,
pero te kʼuxul oʼtanil ya schʼaybey skʼoplal spisil mulil.
13 Te pʼijil oʼtanil jaʼ ay ta ye te machʼa ay bintik ya snaʼ stsajtayel,*
pero te xul o wajchʼ jaʼ yuʼun te spat te machʼa maʼyuk spʼijil yoʼtan.
14 Te machʼatik ay spʼijil yoʼtanik ya skʼejik jich te bin-utʼil kʼulejalil te bin ya snopik,
pero te bin ya yalik te machʼatik ma snaʼik kʼinal jaʼnix ya sta swokolik yuʼun.
15 Te skʼulejal* te jkʼulej jich ya yil te bin-utʼil te mukʼul lum te joytaybil ta tsʼajkʼetik te yichʼoj lek yip,
te pobre jaʼ ya xmilot yuʼun te spobreil.
16 Te bintik ya spas te machʼa toj yoʼtan yame x-akʼbot skuxlejal yuʼun,
pero te bintik ya spas te machʼa chopol* jaʼme ya x-akʼot ta spasel mulil yuʼun.
17 Te machʼa ya schʼuun te tojobtesel jich ya xkʼot te bin-utʼil be te ya x-ikʼawan bael ta kuxlejalil,*
pero te machʼa ma xyichʼ ta wenta te tsitsel* ya yakʼ ta chʼayel te yantike.
18 Te machʼa muken ay slab yoʼtan ta stojol te yane yame spas lot,
te machʼa ay bin ya spuk ta alel sok sbolil yoʼtan yuʼun maʼyuk spʼijil yoʼtan.
19 Te machʼa bayal ya xkʼopoj yananix sta smul-a,
pero te machʼa ya yakʼbey sfrenoil kʼoem te yee ya yakʼ ta ilel spʼijil yoʼtan.
20 Te bin ya yal te machʼa toj yoʼtan jich kʼoem te bin-utʼil lekil plata,
pero te yoʼtan te machʼa chopol* maʼyuk bayal stojol stukel.
21 Te bin ya yal te machʼa toj yoʼtan bayal machʼatik ya smakʼlin* kʼoem,
pero te machʼatik ma snaʼik kʼinal ya xlajik ta skaj te maʼyuk spʼijil yoʼtanik.
22 Te bendición yuʼun te Jehová ya yakʼ kʼulejalil,
sok maba ya yichʼ tal wokolil* te bendición ya yakʼe.
23 Te machʼa maʼyuk spʼijil yoʼtan tajimalnax ya yil te bin kʼexlaltik sba ya spase,
pero te pʼijil oʼtanil jaʼ yuʼun te machʼa ay bintik ya snaʼ stsajtayel.*
24 Te machʼa chopol* yananix xtal ta stojol-a te bin xiʼoj,
pero te machʼa toj yoʼtan yananix yichʼ akʼbeyel-a te bin ya skʼan te yoʼtane.
25 Te kʼalal kʼaxemix-a te tulan yikʼal jaʼal, maʼyukix-a te machʼa chopol,*
pero te machʼa toj yoʼtan ay banti yichʼoj yiptajib te ya xjalaj ta sbajtelkʼinal.
26 Jich bitʼil te vinagre ya slajin te sbakel ketik sok te ya yutsʼin* jsitik te chʼail,
jaʼ jich ya xkʼot te chʼajil ants winik ta stojol te yajwale.
27 Te xiʼel te Jehová ya snajtubtes kuxlejalil,
pero te machʼa chopol* ya xkomob skuxlejal.
28 Te bin ya smaliy te machʼa toj yoʼtan ya x-akʼbot stseʼelil yoʼtan yuʼun,
pero te bin ya smaliy te machʼa chopol* maʼyuk skʼoplal ya xkʼot.
29 Te be yuʼun te Jehová jaʼ jun mukʼul tsʼajkʼ yuʼun te machʼa maʼyuk smul,
pero jaʼ lajinel ya xkʼot ta stojol te machʼatik ya spasik te bin chopol.*
30 Te machʼatik toj yoʼtanik maʼyuk bin-ora ya xyalik,
pero te machʼatik chopolik* maʼyuk bin-ora ya xkuxinikix ta balumilal.
31 Te machʼa toj yoʼtan ya xlokʼ tal pʼijil kʼopetik ta ye,
pero yame yichʼ makbeyel skʼop ta sbajtelkʼinal te machʼa chopol.*
32 Te ye te machʼa toj yoʼtan ya snaʼ te bintik lek ta alel,
pero te ye te machʼa chopol* kʼax ma lek te bintik ya yale.