Números

25 Kʼalal te israeletik yakik ta nainel ta Sitim, jajch spasik mulwej sok te yantsil nichʼnab te moabitaetik. 2 Te antsetik-abi ya yikʼik bael te israeletik ta yakʼel milbil majtanil ta stojol te diosetik yuʼunike. Te israeletik ochik ta weʼel sok jajch skejan sbaik ta stojol te diosetik yuʼun te moab-antsetike. 3 Jich te lum yuʼun Israel la sjokinik ta yichʼel ta mukʼ te Baal te ichʼbil ta mukʼ yuʼun te ants winiketik ta Peor, te Jehová ilin ta stojol te lum yuʼun Israel. 4 Te Jehová jich la yalbey te Moisés: «Tsoba spisil te jolaletik yuʼun te ants winiketik ini sok jojkʼanlana ta teʼ ta kʼajkʼaleltik* ta stojol te Jehová, yuʼun jich ya xlamaj-a te yilinba te Jehová ta stojol te lum Israel». 5 Tey-abi, te Moisés jich la yalbey te juecetik yuʼun te lum Israel: «Ta jujuntulex yame skʼan ya amilik te winiketik te pajal atsʼumbalik sok, te jokinwanik ta yichʼel ta mukʼ te Baal te ichʼbil ta mukʼ yuʼun te ants winiketik ta Peor».

6 Pero, te kʼalal jich yak ta kʼoel ta pasel-ae, tal jtul israel-winik te yikʼoj tal jtul madianita-ants, yak ta yikʼel bael te banti ay te yermanotak, ta sit te Moisés sok ta stojol spisil te lum yuʼun Israel te yakik ta okʼel ta yochibal te nailpakʼ ta swenta tsoblej. 7 Kʼalal la yil te Finehás snichʼan Eleazar, te snichʼan te sacerdote Aarón, ta oranax lokʼ bael ta yolil te lume sok la stsak jun lanza. 8 Ta patil och ta nailpakʼ ta spat te israel-winik sok la slowbey kʼaxel ta skʼunil sbakʼetal ta schebalik. Ta yorailnix-abi kejchaj te tulan lajinel ta stojol te israeletik. 9 Te jayeb ta tul te lajik yuʼun te tulan lajinel jaʼ 24 mil.

10 Jaʼ yuʼun, te Jehová jich la yalbey te Moisés: 11 «Te Finehás snichʼan Eleazar, te snichʼan te sacerdote Aarón, la yakʼ kejchajuk te kilinba ta stojol te lum yuʼun Israel, melel maba la yakʼ te ay bin ma stojil ya yichʼ pasel ta jtojol. Jaʼ yuʼun maba ya jlajin ta jkʼaxel te israeletik ta swenta te joʼon-nax ya jkʼan ya kichʼ ichʼel ta mukʼ. 12 Jich yuʼun albeya te Finehás te ya jchap jkʼop sok ta swenta lamalkʼinal. 13 Jaʼme jun chapbilkʼop te ya xkʼot ta stojol te Finehás sok te stsʼumbal ta swenta te yaʼtel ta sacerdoteil te ma xlaj skʼoplal, melel maba la yakʼ te ay bin ma stojil ya yichʼ pasel ta jtojol te bitʼil jaʼ Dioson yuʼun sok la yakʼ te ya staik perdón yuʼun smulik te lum yuʼun Israel».

14 Te israel-winik te pajal la yichʼ milel sok te madianita-ants Zimrí sbiil snichʼan Salu, te jaʼ jtul jolal yuʼun te jchajp stsʼumbal te antiguo smeʼ stat te simeonitaetik. 15 Te madianita-ants te la yichʼ milel Cozbí sbiil jaʼ yantsil nichʼan te Zur; jaʼ jtul jwolwanej yuʼun te jchajp stsʼumbal te antiguo smeʼ stat ta Madián.

16 Ta patil, te Jehová jich la yalbey te Moisés: 17 «Akʼbeyaik guerra te madianitaetik sok lajinlanaik, 18 melel la yakʼbeyex awokolik te kʼalal sok spʼijilik la sloʼlayex ta yichʼel ta mukʼ te Baal te ichʼbil ta mukʼ yuʼun te ants winiketik ta Peor sok te bin kʼax ta stojol te Cozbí, te yantsil nichʼan jtul jwolwanej yuʼun Madián, te la yichʼ milel te kʼalal kʼot ta pasel te tulan lajinel ta swenta te Baal te ichʼbil ta mukʼ yuʼun te ants winiketik ta Peor».