Deuteronomio
4 »Ta ora ini, lum yuʼun Israel, chʼama awaʼiyik te mantaliletik sok te bintik jchapoj te yak jnojptesbelex yuʼun ya achʼuunik swenta maba ya xlajex sok ya akʼinalinik te kʼinal te ya yakʼbeyex te Jehová te Dios yuʼun te antiguo ameʼ atatik. 2 Mame xa awakʼbeyik sjoy te bin ya kalbeyex ta mantal sok mame skʼan ya alokʼesbeyik jpʼaluk swenta ya achʼuunik spasel te mantaliletik yuʼun te Jehová te Dios awuʼunik te yakon ta yalel ta atojolik.
3 »Jaʼexnix la awilik te bin la spas te Jehová ta swenta te bin kʼot ta pasel ta stojol te Baal te ichʼbil ta mukʼ yuʼun te ants winiketik ta Peor: te Jehová la slajin ta awolilik spisil te winiketik te la stʼunik te Baal te ichʼbil ta mukʼ yuʼun te ants winiketik ta Peor. 4 Pero, spisil te jaʼex te jun awoʼtanik ta stʼunel te Jehová te Dios awuʼunik, kuxulexto ta ora ini. 5 Ilawilik, la kakʼbeyex anopik mantaliletik sok te bintik jchapoj jich te bin-utʼil la spason ta mantal te Jehová te Dios kuʼune swenta ya achʼuunik spasel ta kʼinal te ya awochintayike. 6 Yame skʼan te tsʼakal ya achʼuunik spasel, melel jich ya snaʼik te mukʼul lumetik te kʼalal ya yaʼiy stojol te mantaliletik te jaʼex ay spʼijil awoʼtanik sok te ya awichʼbeyik swentail. Jichme ya yalik: ‹Schʼuunoj koʼtantik ta lek te ay spʼijil yoʼtanik sok te ya yichʼbeyik swentail ta lek te mukʼul nación ini›. 7 Melel, ¿aybal yan mukʼul nación te nopol* ayik ta stojol te diosetik yuʼun jich te bin-utʼil nopol ay ta jtojoltik te Jehová te Dios kuʼuntik te kʼalal spisil-ora ya jkʼopontik? 8 ¿Aybal yan mukʼul nación te ay mantaliletik yuʼun sok te toj te bintik schapoj jich bitʼil spisil te Ley ini te ya kakʼbeyex ta atojolik ta ora ini?
9 »Jaʼnax tsajtaya abaik* sok kanantaya abaik ta lek yuʼun maba ya xchʼay ta awoʼtanik te bintik awilojik sok yuʼun ma xchʼay ta ajolik te jayeb kʼajkʼal kuxulexe. Jaʼnix jich ya skʼan ya anojpteslan te awal anichʼnabik sok te amamatakik.* 10 Te bin-ora la atejkʼan abaik ta stojol te Jehová te Dios awuʼunik ta Horeb, te Jehová jich la yalbon: ‹Tsoba tal te lum swenta ya yaʼiybonik te jkʼop yuʼun ya snopik te bitʼil ya skʼan ya xiʼonik* te jayeb kʼajkʼal kuxulik ta kʼinal sok ya yakʼbeyik snop te yal snichʼnabik›.
11 »Jich noptsajex* tal, la atejkʼan abaik ta yeʼtal te wits te yak ta lokʼel kʼajkʼ tey-a te ya xkʼot kʼalalto ta chʼulchan. Ay ijkʼal kʼinal, ay tokal sok ay pimil ijkʼal tokal. 12 Te Jehová jajch skʼoponex ta yolil te kʼajkʼ. Ya awaʼiyik te kʼop, pero maba ya awilik te machʼa yak ta kʼop... Jaʼnax ya xchiknaj te kʼope. 13 La yakʼbeyex anaʼik te chapbilkʼop yuʼun te ya skʼan te ya achʼuunik spasel: jaʼ te Lajuneb Mantaliletik.* Ta patil la stsʼibay ta chaʼpejch tonetik. 14 Ta yorail-abi, te Jehová la spason ta mantal yuʼun ya kakʼbeyex anopik te mantaliletik sok te bintik schapoj te ya skʼan ya achʼuunik spasel ta kʼinal te ya awochintayike.
15 »Ta skaj te maʼyuk bin la awilik ta yolil te kʼajkʼ te kʼalal la skʼoponex te Jehová ta Horeb, yame skʼan ya akanantay abaik ta lek 16 swenta maba ya abolobtes abaik te ya apasik biluk lokʼombail chikan teme slokʼombail winik o ants, 17 slokʼombail chambalametik ta kʼinal, slokʼombail jaʼmal mutetik te ya xwilik ta sjamalul chʼulchan, 18 slokʼombail te bintik staslajan ya xbeenik ta lum o slokʼombail chayetik. 19 Te kʼalal ya atoy asitik ta chʼulchan sok ya awilik te kʼajkʼal, te u sok te ekʼetik —spisil te bintik ayik ta chʼulchan—, mame xa awakʼ sloʼlaybeyex awoʼtanik te jich ya akejan abaik ta stojolik sok te ya awichʼik ta mukʼ. Te Jehová te Dios awuʼunik yakʼojbey spisil ini te lumetik te ayik ta yeʼtal te chʼulchan. 20 Pero, te jaʼexe te Jehová la yikʼex sok la slokʼesex tal ta Egipto, ta horno te banti ya yichʼ ultesel takʼinetik, yuʼun jaʼ lum ya xkʼoex yuʼun jich te bitʼil ayex ta ora ini.
21 »Te Jehová ilin ta jtojol ta skaj amulik sok la yal ta jamal te maba ya xkʼaxon bael ta yan jejch yuʼun te mukʼul jaʼ Jordán ni jaʼuk ya x-ochon ta lekil kʼinal te ya yakʼbeyex akʼinalinik te Jehová te Dios awuʼunike. 22 Te joʼone liʼ ya xlajon ta kʼinal ini, maba ya xkʼaxon bael ta mukʼul jaʼ Jordán, yan te jaʼexe ya xkʼaxex bael sok ya awochintayik te lekil kʼinal-abi. 23 Kanantayame abaik yuʼun ma xchʼay ta awoʼtanik te chapbilkʼop te la spas ta atojolik te Jehová te Dios awuʼunik. Mame xa apasik biluk lokʼombail te ma skʼan ya apasik te Jehová te Dios awuʼunike. 24 Melel te Jehová te Dios awuʼunik jaʼ jich te bin-utʼil kʼajkʼ te ya xlajinwan, jaʼ jun Dios te jaʼnax ya skʼan te ya yichʼ ichʼel ta mukʼe.
25 »Te kʼalal ya x-ayin* awal anichʼnabik sok amamatakik* sok te bayalix tiempo ya xkuxinex ta balumilal, pero ya xjajch apasik te bin ma lek sok biluk lokʼomba ya apasik te jich ya apasik te bintik ma lek ya yil te Jehová yuʼun ya ajachbeyik te yilinba, 26 ta ora ini ya kakʼ ta testigo te chʼulchan sok te balumilal te ya xchʼayex ta oranax ta kʼinal te ya awochintayik te kʼalal ya xkʼaxex bael ta yan jejch yuʼun te mukʼul jaʼ Jordán. Maba ya xjalajex bayal tey-a, melel ya awichʼik lajinel ta jkʼaxel. 27 Te Jehová ya spukex bael ta yantik lum. Maba bayalex ta tul te ya xkuxinex jilel ta nacionetik te banti ya spukex bael te Jehová. 28 Teyme ya x-abatinex ta stojol te diosetik te pasbilik ta teʼ sok ta ton yuʼun te winiketik, jaʼik diosetik te ma xyilik kʼinal, te ma xyaʼiyik kʼop, te ma xweʼik sok te maʼyuk bin ya yaʼiybeyik yikʼ.
29 »Teme teyto ya aleik te Jehová te Dios awuʼunik, yame ataik, pero ya skʼan ya aleik ta spisil awoʼtanik sok ta spisil akuxlejalik. 30 Kʼalal ya awil awokolik ta pajel chaʼbej sok te kʼalal ya xkʼax ta atojolik spisil ini, ya sujtex tal ta stojol te Jehová te Dios awuʼunik jich ya awaʼiybeyik te skʼope. 31 Melel te Jehová te Dios awuʼunik, jaʼ jun Dios te ya snaʼ yoʼbolil jbatik. Maba ya spijtesex, maba ya slajinex sok ma xchʼay ta yoʼtan te bin jamal la schapbey skʼoplal sok te antiguo ameʼ atatike.
32 »Ta ora ini, awokolukik, ilbeyaik skʼoplal te bintik kʼoem ta pasel ta namey, jaʼto kʼalal te bin-ora la spas Dios te ants winik ta balumilal. Lebeyaik skʼoplal jaʼto ta jujunjejch stiʼil te chʼulchane. ¿Aybal bin-ora jich kʼoem ta pasel te bin mukʼ skʼoplal jich bitʼil ini? ¿Aybal junuk buelta te aʼiybil skʼoplal te jich pajal kʼoem ta pasele? 33 ¿Aybal yan lum te yaʼiyojbey skʼop te Dios teyto ta yolil te kʼajkʼ te maba laj yuʼun jich te bin-utʼil la awaʼiybeyik skʼop te jaʼexe? 34 ¿Aybal junuk buelta te la skʼan te Dios te ya slokʼes jpam nación ta yolil yan nación? ¿Yakʼojbal ta ilel ta swenta pruebaetik, señailetik, milagroetik, guerraetik, ta swenta te yip skʼab sok te yuʼel o xiweltik sba te bintik la spas yuʼun la slokʼes tal te lum yuʼune? ¿Aybal jich spasojix ta asitik-a te Jehová te Dios awuʼunik te bin la spas ta atojolik ta Egipto? 35 Te jaʼex la awichʼik akʼbeyel awilik spisil ini yuʼun jich ya anaʼik te jaʼ smelelil Dios* te Jehová; maʼyuk yan jich te bin-utʼil te Diose. 36 Kʼalalto ta chʼulchan la yakʼbeyex awaʼiyik skʼop swenta ya stojobtesex. Ta lumkʼinal la yakʼbeyex awilik te mukʼul kʼajkʼ yuʼun sok la awaʼiybeyik skʼop ta yolil te kʼajkʼe.
37 »Te bitʼil kʼux la yaʼiy ta yoʼtan te antiguo ameʼ atatik sok te la stsabey stsʼumbalik, jaʼ la sjokinex te kʼalal la slokʼesex tal ta skʼinal Egipto ta swenta smukʼul yuʼel. 38 La stentiklan lokʼel ta atojolik te nacionetik te mukʼikxan sok te kʼax bayalxan yipik te bin-utʼil te jaʼexe yuʼun ya yakʼ x-ochex ta skʼinalik te jich ya yakʼbeyex akʼinalinik jich te bitʼil ya awilik ta ora ini. 39 Jich yuʼun, ta ora ini yame skʼan ya anaʼik sok yame skʼan ya awakʼ lek ta awoʼtanik te bitʼil jaʼ smelelil Dios te Jehová ta chʼulchan sok ta balumilal. Maʼyuk yan. 40 Yame skʼan ya achʼuunik spasel te leyetik sok te mantaliletik yuʼun te yak kalbelex ta ora ini yuʼun lek ya kʼoex ta lokʼel sok te awal anichʼnabike, swenta jal ya xkuxinex ta lumkʼinal te yak yakʼbelex te Jehová te Dios awuʼunike».
41 Ta yorail-abi, te Moisés la stsa oxeb mukʼul lumetik ta stojol te banti ya xlokʼ tal te kʼajkʼal ta jejch yuʼun te mukʼul jaʼ Jordán. 42 Teme ay machʼa ma yolojuk la smil te spatxujk te maʼyuk bin-ora yilintayoj-ae, yame skʼan ya xbajt ta anel ta junuk te mukʼul lum-abi yuʼun jich maba ya yichʼ milel. 43 Te mukʼul lumetik jaʼik te Bézer te ay ta jochol takin kʼinal ta toyol spamlej jaʼ yuʼun ya xkʼot te rubenitaetik; te Ramot te ay ta Galaad jaʼ yuʼun ya xkʼot te gaditaetik; te Golán te ay ta Basán jaʼ yuʼun ya xkʼot te manasitaetik.
44 Jaʼ ini jaʼ te Ley te la yakʼ te Moisés ta stojol te lum yuʼun Israel. 45 Jaʼik ini te jultesel oʼtanil, mantaliletik, te bintik chapbil te akʼbotik te israeletik yuʼun te Moisés te kʼalal lokʼik tal ta Egipto 46 ta skʼinal Jordán, ta spamlej te ay ta stojol bael te Bet-Peor ta skʼinal Sehón te ajwalil yuʼun te amorreoetik te nain ta Hesbón te la yichʼ tsalel yuʼun te Moisés sok te israeletik te kʼalal lokʼik tal ta Egipto. 47 La yochintaybeyik te skʼinal sok te skʼinal te ajwalil Og yuʼun Basán, jaʼ te chaʼtul ajwaliletik yuʼun te amorreoetik te yakik ta nainel ta slokʼib kʼajkʼal yuʼun Jordán, 48 la yochintayik kʼalalto ta lum Aroer, te ay ta stiʼil skʼinal te spamlej yuʼun Arnón jaʼto kʼalal ta wits Siyón jaʼ te Hermón, 49 sok spisil te Arabá te ay ta stojol slokʼib kʼajkʼal yuʼun Jordán jaʼto kʼalal ta mar yuʼun Arabá* te ay ta yeʼtal te chʼin witsetik yuʼun Pisgá.