Carta ta stojol te Romanoetik
15 Te joʼotik te ay yip schʼuunel koʼtantik ya skʼan te ya xkujch kuʼuntik te banti ya xchʼayik te machʼatik maʼyuk yip schʼuunel yoʼtanik, mame jaʼuk ya jpastik te bin lek ya kaʼiy jbatik yuʼune. 2 Ta jujuntulotik, akʼame jpastik te bin lek yoʼtan yuʼun te jpatxujktik yuʼun jich ya sta slekilal sok yip yoʼtan. 3 Melel te Cristo ma jaʼuk la sle te bin leknax ya yaʼiy sba yuʼune, jaʼ jich kʼot ta pasel te bin-utʼil tsʼibaybile: «Te sbolkʼopik te machʼatik ya sbolkʼoptayat, joʼon kʼot ta jtojol», te xchie. 4 Melel spisil te bin la yichʼ tsʼibayel jilel ta namey kʼinal, la yichʼ tsʼibayel swenta ay bin ya yakʼ jnoptik, ay bin ya jmaliytik ta skaj te ya xkujch kuʼuntik sok te smukʼul koʼtantik te ya yakʼbotik te sJun Diose. 5 Te Dios te ya yakʼ te ya xkujch kuʼuntik sok te ya yakʼ smukʼul koʼtantik akʼame yakʼbeyex ta apisilik te jichuk snopojibal awuʼunik te bin-utʼil la yakʼ ta ilel te Cristo Jesús, 6 yuʼun jich jun-nax akʼopik ta yalbeyel yutsil skʼoplal te Dios te sTat te Kajwaltik Jesucristo.
7 Jich yuʼun, talel kʼaxel lekme xa awil abaik ta jujuntul, jich te bin-utʼil sok slekil yoʼtan la yikʼex te Cristo, jichme ya yichʼ albeyel yutsil skʼoplal te Diose. 8 Melel ya kalbeyex te la yakʼ sba ta abatinel te Cristo ta stojol te machʼatik yichʼojik circuncisión* yuʼun jich ya yakʼ ta ilel te smelelil te bin ya yal te Diose sok ya yakʼ ta ilel te ya xkʼot ta pasel te bin jamal la yalbey Dios te antiguo smeʼ statike, 9 jich te nacionetik ya yalbeyik yutsil skʼoplal te Dios ta swenta te naʼbotik yoʼbolil sbaik. Jich te bin-utʼil tsʼibaybile: «Jaʼ yuʼun ya kalbat yutsil akʼoplal ta yolil te nacionetik sok ya jkʼayojtaybat te abiile». 10 Jaʼnix jich ya yal te sJun Dios: «Nacionetik, tseʼelukme awoʼtanik sok te lum yuʼune». 11 Jich tsʼibaybilxan jilel: «Spisil nacionetik, albeyaik yutsil skʼoplal te Jehová.* Akʼa yalbeyik yutsil skʼoplal spisil te lumetik». 12 Jich la yal-euk te Isaías: «Ayme machʼa ya xchiknaj ta stsʼumbal* te Jesé, jaʼ te machʼa ya xtal swentain te nacionetike; te nacionetik yame yakʼ smukʼul yoʼtanik ta stojol». 13 Te Dios te ya yakʼ smukʼul oʼtanil akʼa yakʼbeyex bayal stseʼelil awoʼtanik sok lamalkʼinal ta swenta te ay smukʼul awoʼtanik ta stojole, yuʼun jich ya x-ayin awuʼunik bayal smukʼul awoʼtanik ta swenta te yuʼel te chʼul espiritue.*
14 Kermanotak, schʼuunoj koʼtan ta lek te bayal slekil awoʼtanik sok te bayal bin anaʼojikixe soknix te talel kʼaxel ya xjuʼ ya anojptes abaike. 15 Pero, ay chaʼoxchajp te bin jamal la jtsʼibaybeyex yuʼun ya jultesbeyex ta awoʼtanik yan buelta. Jich ya jpas ta swenta te la yakʼbon kil te Dios te slekil yoʼtan te ma snujpʼuk ya kichʼtik 16 yuʼun jich ya xkʼoon te bitʼil j-abat yuʼun Cristo Jesús ta stojol te nacionetik. Yakon ta spasel te chʼul aʼtelil, jaʼ te spukel te lek yachʼil kʼop yuʼun Dios swenta jich te nacionetik ini ya xkʼot jich bitʼil majtanil yuʼun Dios te lek ilbil yuʼune sok te chʼultesbil yuʼun te chʼul espiritue.*
17 Kʼax tseʼel koʼtan yuʼun te jnopojelon yuʼun te Cristo Jesús sok te ya jpasbey te yaʼtel te Diose. 18 Maʼyuk yan bin ya kalbeyex, jaʼnax te bin spasoj ta jtojol te Cristo yuʼun jich ya schʼuunik mantal te nacionetike, jich la spas ini ta swenta te jkʼop, te kaʼtel, 19 ta swenta te milagroetik* sok te mukʼul aʼteliletik te la yichʼ pasel ta swenta yuʼel te chʼul espíritu* yuʼun te Diose. Jich yuʼun la jcholix ta lek te lek yachʼil kʼop ta swenta te Cristo, kʼalalto ta Jerusalén sok ta bayuk jaʼto ta skʼinal Ilírico. 20 Jich yuʼun la kakʼ ta koʼtan te maba ya jcholix te lek yachʼil kʼop te banti albilix skʼoplal te Cristoe, yuʼun jich maba ya x-aʼtejon te banti jajchemix yaʼtel yan. 21 Jich te bin-utʼil tsʼibaybile: «Yame yilik te machʼatik maba la yichʼik albeyel skʼoplale, yame xkʼot ta yoʼtanik te machʼatik maʼyuk yaʼiyojbeyik skʼoplale».
22 Jaʼ swentail te bayal buelta wokol la kaʼiy te ya xtal kilexe. 23 Pero, ta ora ini tsʼakajix ta cholel kuʼun te skʼop Dios ta lumetik ini sok ayix tal bayal jaʼbil* te koʼtanuk ya xbajt kilexe. 24 Jaʼ yuʼun, te kʼalal ya xboon ta España, ya xkʼax kilex sok ya jkʼan ya jokinex cheʼoxebuk kʼajkʼal. Ta patil ya jkʼan te yakuk ajokinonik bael jmajkʼuk ta be te kʼalal ya xboon ta España. 25 Pero, ta ora ini ya xboon ta Jerusalén ta skoltayel te machʼatik chʼultesbilike. 26 Melel te hermanoetik ta Macedonia sok ta Acaya sok slekil yoʼtanik la stsobik majtanil yuʼun ya yakʼbeyik te machʼatik chʼultesbilik te ayik ta Jerusalén te pobreike. 27 Melelnix-a te sok slekil yoʼtanik te la stsobik te majtanile; pero ta smelelil, ay sbetik ta stojol te machʼatik chʼultesbilike, melel teme la sta slekilalik te nacionetik ta swenta te skʼop Dios la yalik te machʼatik chʼultesbilike, jaʼnix jich ya skʼan ya skoltayik te machʼatik chʼultesbilik ta swenta te bintik ay yuʼunike. 28 Jich yuʼun, te kʼalal ya xlaj koʼtan ta spasel te aʼtelil ini sok te kʼalal la kakʼbeyix jilel ta skʼabik-a te majtanile, ya xkʼax kilex te kʼalal ya xboon ta España. 29 Jaʼnix jich jnaʼoj te ya kichʼbeyex bael bayal bendición yuʼun te Cristo te kʼalal ya xbajt kilexe.
30 Kermanotak, ya jkʼanbeyex wokol ta swenta te Kajwaltik Jesucristo sok ta swenta te kʼuxul oʼtanil te ya xtal ta swenta te chʼul espíritu* te yakuk akoltayonik ta skʼoponel Dios ta jtojol jich te bin-utʼil yakon ta skʼoponel Dios ta jtojol-euke, 31 yuʼun jich ya xkolon ta skʼabik te machʼatik maba jchʼuunjeletik te ayik ta Judea sok te lekuk ya stsakik te majtanil te ya kakʼbey te machʼatik chʼultesbilik te ayik ta Jerusalén. 32 Teme jich ya skʼan yoʼtan te Diose, tseʼel koʼtan ya xbajt kilex sok jichme talel kʼaxel ya kakʼbey jba smukʼul koʼtantik. 33 Akʼame sjokinex ta apisilik te Dios te ya yakʼ lamalkʼinal. Jichuk.