Génesis

39 Te ismaelitaetik la yikʼik bael ta Egipto te José. Tey la schonbeyik-a te Potifar te egipcio-winik, te jaʼ jwolwanej yuʼun te jkananetik yuʼun te faraón sok te yichʼoj mukʼ yaʼtel ta stojol te ajwalile. 2 Pero jokinbil yuʼun Jehová te José. Jaʼ yuʼun lek kʼot ta lokʼel te bin la spas, te yajwal te José, te egipcio-winik, akʼbot swentain yuʼun spisil te snae. 3 Te yajwal la yil te jokinbil yuʼun te Jehová sok te jaʼ Jehová ya yakʼ te lek ya xkʼot ta lokʼel spisil te bin ya spase.

4 Te José lek ilotxan yuʼun te Potifar, jaʼ kʼot ta mero jkoltaywanej yuʼun. Jaʼ yuʼun, te Potifar la yakʼbey swentain te sna sok spisil te bintik ay yuʼune. 5 Jaʼto te kʼalal te Potifar la yakʼbey swentain te José te sna sok spisil te bintik ay yuʼune, te Jehová jajch yakʼbey bendición te sna te egipcio-winik ta swenta te José. Te Jehová la yakʼbey bendición spisil te bintik ay yuʼun ta sna sok ta skʼinal. 6 Jich te Potifar la yakʼbey ta skʼab te José spisil te bintik ay yuʼune. Maʼyuk bin ya smel yoʼtan yuʼun, jaʼnax ya yil te bin ya skʼan ya sweʼe. Te José la sta yip sbakʼetal, leknax sok tʼujbil kerem kʼot.

7 Te yinam te Potifar jajch smulan te José, jaʼ yuʼun jich la yalbey: «Jokinawon ta wayel». 8 Pero maba la skʼan te José sok jich ya yalbey-a te yinam te yajwale: «Ilawil, te kajwal maʼyuk bin ya smel yoʼtan yuʼun te bintik ay ta snae, melel joʼon ya jkoltay, sok yakʼojbon jwentain spisil te bintik ay yuʼune. 9 Maʼyuk machʼa toyolxan yaʼtel ta na ini te bitʼil te joʼone. Sok yakʼojbon ta jkʼab spisil te bintik ay yuʼune, jaʼxanix maba yakʼojat ta jkʼab, melel jaʼ yinamat. Jich yuʼun, ¿bin-utʼil kʼan jpas te bin kʼax chopol* sok te jich ya jta jmul ta stojol te Diose?».

10 Te ants jujun kʼajkʼal maba ya skom sba ta swulwultayel, pero te José maʼyuk bin-ora la skʼan te ya sjokin ta wayel ni jaʼuk te stukel ya xjil soke. 11 Pero, ta jun buelta te kʼalal och ta na ta spasel yaʼtel maʼyuk ni jtuluk j-abat tey-a. 12 Jaʼ yuʼun, te ants la stsakbey skʼuʼ te José, jich la yalbey: «¡Jokinawon ta wayel!». Pero lokʼ bael ta anel, jil te skʼuʼ ta skʼab te antse. 13 Kʼalal la yil te lokʼ bael ta anel te José sok te stsakojbey jilel te skʼuʼe, 14 och yawtay tal te winiketik te ayik ta na sok jich la yaltiklanbey: «¡Ilawilik! Te hebreo-winik te la yikʼ tal te jmamalal ya skʼan ya yakʼotik ta tseʼlayel. Kʼan sjokinon ta wayel, pero kʼax tulan awunon. 15 Jaʼnax te kʼalal la yaʼiy te tulan awunone, lokʼ bael ta anel, la yijkitay jilel te skʼuʼe». 16 Ta patil la yakʼ ta xujk te skʼuʼ te José, jaʼto la smaliy te ya xjul tal ta sna te smamalale.

17 Jich yuʼun, te antse jaʼnix jich la scholbey yaʼiy te Potifare. Jich la yalbey: «Te j-abat hebreo-winik te la awikʼ tale la skʼan yakʼon ta tseʼlayel. 18 Pero, te kʼalal tulan awunone, lokʼ bael ta anel, la yijkitay jilel te skʼuʼe». 19 Kʼax bayal ilin te yajwal te José kʼalal la yaʼiy stojol te jich albot yuʼun te yinam «Te awabat jich la spasbon ini». 20 Jich te Potifar la stsak te José la yotses ta chukojibal te banti ay te yantik jchukeletik yuʼun te ajwalil. Tey jil ta chukel-a te José.

21 Pero jokinbilxan yuʼun Jehová te José. La yakʼbey yil skʼuxul yoʼtan te ma x-ijkitaywan sok la yakʼ te lek ya x-ilot yuʼun te jwolwanej yuʼun te chukojibal. 22 Jaʼ yuʼun, te jwolwanej yuʼun te chukojibal la yakʼbey swentain te José spisil te jchukeletik te tey ayik-ae. Te José jaʼ ay ta swenta yilel te yakuk spasik te jchukeletik spisil te bin ay ta swentaik spasele. 23 Te jwolwanej yuʼun te chukojibal jkʼaxel maʼyuk bin ya smel yoʼtan yuʼun te bintik la yakʼbey swentain te José, melel jokinbil yuʼun Jehová te José sok jaʼnix la yakʼ te Jehová te lek ya xkʼot ta lokʼel spisil te bin ya spase.