Schebal carta ta stojol te Timoteo

4 Ta stojol Dios sok te Cristo Jesús, te ya yichʼ ta kʼop te machʼatik kuxulik sok te machʼatik lajemik soknix te kʼalal ya xchiknaj tal sok te Wentainel* yuʼune, jich ya kalbat ta tulan mantal: 2 chola te skʼop Diose; pasame ta oranax chikan teme maʼyuk wokolil o ta yorail wokol; aʼiyame komaw, ala mantal sok tulan tojobtesel, sokukme slamalil awoʼtan ya apas sok lekil jnojpteswanejukatme. 3 Melel yame sta yorail te maba ya skʼan ya yaʼiyik stojol te lekil nojptesele, jaʼme ya spasik te bin ya skʼan te yoʼtanike, jaʼ yuʼun yame sleik maestroetik te jaʼnax ya x-albotik yaʼiyik yuʼun te bin ya smulanik yaʼiyel stojole. 4 Ya yijkitayik yaʼiyel stojol te smelelil kʼope, jaʼme ya smulanik yaʼiyel te lotil kʼopetike. 5 Pero, te jaʼate ayukme spʼijil awoʼtan ta spisil te bintik ya apas, kujchukme awuʼun te wokoliletik, aʼteliname scholel te lek yachʼil kʼop sok tsʼakalukme xa apas te awaʼtele.

6 Melel yakonix ta yichʼel malel jich te bin-utʼil malbil majtanil, sok nopol* ya staix yorail te ya xlajone. 7 La kaʼiyix te lekil tsalaw, juʼix kuʼun te animale, maba kijkitayoj te schʼuunel koʼtane. 8 Ta ora ini kʼejbilix ta jtojol te corona yuʼun te bin stojil ta pasel te ya yakʼbon te Kajwaltik ta Skʼajkʼalel ichʼel ta kʼop,* te tojil jchajpanwanej, pero ma jaʼuknax ya yakʼbon te joʼone, jaʼnix jich ta stojol spisil te machʼatik sok spisil yoʼtanik yakik ta smaliyel te kʼalal ya xchiknaj tale.

9 Pasa tulan te yakuk xtal awilon ta oranaxe. 10 Melel te Demas, te la yijkitayon ta skaj te kʼux la yaʼiy ta yoʼtan te bintik swenta balumilale, bajt ta Tesalónica; te Crescente bajt ta Galacia, te Tito bajt ta Dalmacia. 11 Jaʼnax sjokinojon te Lucas. Ikʼa tal te Marcos, melel ya skoltayon ta spasel te yaʼtel te Diose. 12 La jtikun bael ta Éfeso te Tíquico. 13 Te kʼalal ya xtalate, ichʼa tal te najtil kʼuʼul te la kijkitay ta Troas ta sna te Carpo sok ichʼa tal te balbil junetik, kʼaxtoxan-a te tsʼibaylanbil ta nujkule.

14 Te Alejandro, te ya x-aʼtej sok cobre, bayal la yutsʼinon. Jaʼme ya x-akʼbot stoj yuʼun te Jehovae.* 15 Jaʼnix jich tsajtayame* aba ta stojol-euk, melel kʼaxto la skontrainotik ta swenta te bin la kaltike.

16 Te kʼalal la kichʼ chajpanel ta sbabial bueltae, maʼyuk machʼa la skoltayon ta kʼop, ta spisilik la yijkitayonik. Koʼtanuk te manchuk ya x-akʼbot smulinik yuʼun te Diose. 17 Pero la sjokinon stukel te Kajwaltik sok la yakʼbon yip koʼtan, yuʼun jich tsʼakal ya yichʼ cholel te skʼop Dios ta jwenta sok te ya yaʼiyik stojol spisil te nacionetike, jaʼnix jich la skoltayon lokʼel ta ye te león-choje. 18 Jaʼme ya skoltayon lokʼel te Kajwaltik ta spisil te bin chopole* sok ya yakʼbon jkolel yuʼun ya yikʼon ta Wentainel* yuʼun te ay ta chʼulchane. Akʼa yichʼ albeyel yutsil skʼoplal ta sbajtelkʼinal. Jichuk.

19 Akʼbon spatjibal yoʼtan te Prisca* sok te Áquila sok te machʼatik ayik ta sna te Onesíforo.

20 Te Erasto jil ta Corinto, te Trófimo la kijkitay ta Mileto, melel ay ta chamel. 21 Pasa tulan te yakuk xjulat te kʼalal mato yorailuk-a te sike.

Ya stikunbat spatjibal awoʼtan te Eubulo, jaʼnix jich ya stikunbat spatjibal awoʼtan te Pudente, te Lino, te Claudia sok spisil te hermanoetike.

22 Akʼame sjokinat te Kajwaltik ta swenta te lekil taleliletik awakʼoj ta ilele. Ayukme ta atojolik te slekil yoʼtan Dios te ma snujpʼuk ya kichʼtike.