Génesis

13 Te Abrán la yijkitay jilel te Egipto, mo bael ta Négueb. Jokinbil bael yuʼun te yinam sok te Lot soknix yichʼoj bael spisil te bintik ay yuʼune. 2 Te Abrán bayal chambalametik yuʼun, jaʼnix jich plata sok oro. 3 Kʼalal ay ta Négueb, jajch spas ta bayuk te snailpakʼ jaʼto kʼalal kʼot ta Betel. Kʼot ta olil yuʼun Betel sok Hai te banti nail yakʼojix-a te snailpakʼ 4 sok te banti ay spasojix skajtajib chikʼbil majtanil-ae. Tey la yalbey sbiil-a te Jehová.

5 Te Lot la sjokin bael te Abrán, jaʼnix jich ay tuminchijetik, wakaxetik sok nailpakʼetik yuʼun. 6 Pero, ta skaj te bayal bintik ay yuʼunik ta schebalik, ma xjuʼ ya x-ochikix ta kʼinal-a sok ma xjuʼix te jun-nax ya xnainik ta jun lugar ta spisilik. 7 Jaʼ yuʼun jajch yut sbaik te jkananchambalametik yuʼun te Abrán sok te jkananchambalametik yuʼun te Lot. (Ta yorail-abi, te cananeoetik sok te perizitaetik yakik ta nainel ta lum-abi). 8 Jaʼ yuʼun, te Abrán jich la yalbey te Lot: «Ilawil, kermano jbatik. Ma skʼan te ya jkontrain jbatik ni jaʼuk te ya skontrain sbaik te jkananchambalametik kuʼuntike. 9 ¿Mabal jichuk te ay ta atojol spisil te kʼinale? Jich yuʼun, awokoluk, akʼa jxat jbatik. Teme ya xbaat ta kʼexam,* joʼon ya xboon ta waʼel. Teme ya xbaat ta waʼel, joʼon ya xboon ta kʼexam». 10 Tey-abi, te Lot la stoy sit, la yil spisil te spamlej yuʼun Jordán jaʼto kʼalal ta lum Zóar. La yil te bayal jaʼ tey-a, te pajal yilel sok te tsumbil kʼinal yuʼun Jehová sok te skʼinal te Egipto. Jich ay-a te Sodoma sok te Gomorra te kʼalal mato slajinoj-a te Jehová. 11 Jich yuʼun, te Lot jaʼ la stsa spisil te spamlej yuʼun Jordán, la stsob bael te scampamento sok bajt te banti ya xlokʼ tal te kʼajkʼale. Jich la yijkitay sbaik. 12 Te Abrán bajt ta nainel ta skʼinal Canaán, yan stukel te Lot bajt ta nainel nopol* te banti ay te mukʼul lumetik ta spamlej, ta patil la spas snailpakʼ ta nopol Sodoma. 13 Pero, te yajwalul te lum Sodoma kʼax chopolik* sok ya spasik tulan muliletik ta sit te Jehová.

14 Kʼalal xatojix sba lokʼel te Lot, te Jehová jich la yalbey te Abrán: «Toya moel asit, awokoluk. Teyto te banti ayate, ilawil te kʼinal te ay ta norte, ta sur, te banti ya xlokʼ tal te kʼajkʼal sok te banti ya xmal te kʼajkʼale. 15 Spamal te kʼinal te yakat ta yilele, yame kakʼbat sok yame kakʼbey te atsʼumbale, jaʼme awuʼunik ya xkʼot spisil-ora. 16 Ya kakʼ te kʼax bayal ya xkʼot te atsʼumbal jich te bin-utʼil te tsʼubil lum. Teme ay machʼa ya xjuʼ ya yajtay te tsʼubil lum, jaʼnix jich ya xjuʼ ya yajtay-euk te atsʼumbale. 17 Baan, baan okliya te snajtil sok te sjamalul te kʼinale, melel jaʼme ya kakʼbat». 18 Jich bajt te Abrán, nainxan ta nailpakʼetik. Ta patil bael kʼot te banti ay te mukʼul teʼetik yuʼun Mamré, ta Hebrón. Tey jil ta nainel sok la spasbey skajtajib chikʼbil majtanil te Jehová.