Eclesiastés
7 Jaʼ lekxan te machʼa lek skʼoplal te bin-utʼil lekil aceite, sok jaʼ lekxan te bin kʼajkʼalil ay machʼa ya xlaj te bin-utʼil te bin kʼajkʼalil ya x-ayine.* 2 Jaʼ lekxan te ya xbootik ta sna te machʼatik ya yokʼetayik te machʼa laj yuʼunik te bin-utʼil ta na te banti ay kʼine, melel te lajele jaʼ slajibal spisil te ants winiketike, sok te machʼatik kuxulike yame skʼan ya snopbeyik skʼoplal-abi. 3 Jaʼ lekxan te mel-oʼtan te bin-utʼil te tseʼeje, melel te machʼa ay ta mel-oʼtan te sit yelaw ya xlekub yoʼtan yuʼun. 4 Te yoʼtan te machʼa ay spʼijile ay ta na te banti yakik ta yokʼetayel te machʼa laj yuʼunik, pero te yoʼtan te machʼa maʼyuk spʼijil yoʼtan ay ta na te banti ay kʼin.
5 Jaʼ lekxan te ya kichʼtik tsitsel* yuʼun te machʼa pʼij yoʼtan te bin-utʼil te ya yutsilkʼoptayotik te machʼa ma snaʼ kʼinal. 6 Te stseʼej te machʼa ma snaʼ kʼinal jaʼ jich te bin-utʼil te skʼop te chʼixetik te yak ta kʼajkʼel ta yeʼtal oxom,* jaʼ-abi tojolnax-euk. 7 Pero, te kʼalal tenbil ya yaʼiy sba te machʼa pʼije jaʼ ya xjuʼ ya xjinbot sjol yuʼun, sok stsakel jun majtanil te ma stojiluk ya sbolobtes oʼtanil.
8 Jaʼ lekxan te slajibal te bin ya yichʼ chapbeyel skʼoplal te bin-utʼil te sjajchibale. Jaʼ lekxan te lamal oʼtanil te bin-utʼil te toybaile. 9 Mame orauk ya x-ilinat, melel te ilinba jaʼ ay ta yoʼtan te machʼatik ma snaʼik kʼinale.
10 Mame jichuk xa awal: «¿Bin yuʼun jaʼ lekxan te kʼajkʼaletik te kʼaxikix te bin-utʼil ta ora ini?». Te machʼa jich ya sjojkʼoye maʼyuk spʼijil yoʼtan.
11 Te pʼijil oʼtanil sok te ay bin ya yichʼ akʼbeyel jilel, lek sok ay slekilal ta stojol te machʼatik kuxulike. 12 Melel te pʼijil oʼtanil jaʼ anibal jich te bin-utʼil jaʼ anibal te takʼine. Pero te bin lekxan ta swenta te pʼijil oʼtanil: jaʼ te ya yakʼbey skuxlejal te yajwale.
13 Nopilana ta awoʼtan te aʼtelil spasoj te smelelil Diose: ¿machʼa ya xjuʼ ya stojobtes te bin tsʼotol pasbil yuʼune? 14 Ta jun lekil kʼajkʼal lekukme awoʼtan-euk, pero ta yorail wokoliletik julukme ta awoʼtan te jaʼ Dios te ya yakʼ lekil kʼajkʼaleltik sok yorail wokoliletik, yuʼun jich te ants winiketik ma snaʼik te bin ya xkʼot ta pasel ta pajel chaʼbej.
15 Te jayeb kʼajkʼal tojolnax kuxulone bayal bin kiloj: manchukme ya spas te bin stojil ta pasel te machʼa toj yoʼtan, ora ya xlaj, yan stukel te machʼa chopol yoʼtan* manchukme ya spas te bin chopol bayal jaʼbil ya xkuxin.
16 Mame kʼax tojuk xa akuy aba sok mame jichuk xa awakʼ ta ilel te kʼax pʼijate. ¿Bin yuʼun atukel ya ajin aba? 17 Mame jkʼaxeluk chopol awoʼtan* ya akuy aba sok mame jkʼaxeluk ya akuy aba te ma xa anaʼ kʼinal. ¿Bin yuʼun te oranax ya ale alajele? 18 Jaʼ lekxan teme ya atsak junuk pʼijubtesel, pero mame xa akoltay bael te yane; melel te machʼa ya xiʼ* te Dios ya yichʼ ta wenta te schebale.
19 Te pʼijil oʼtanil ya yakʼbeyxan yip te machʼa ay spʼijil yoʼtan, ma jaʼuk ayxan yipik lajuntul winiketik ta jpam mukʼul lum. 20 Maʼyuk ta balumilal ni jtuluk te machʼa toj yoʼtan te spisil-ora ya spas te bin lek sok te maʼyuk bin-ora ya sta smul.
21 Jaʼnix jich mame xa akʼej ta awoʼtan spisil te bin ya yal te ants winiketik, teme jich ya apase, yaniwan ya awaʼiy stojol te ay bin maba lek ya yal ta atojol te j-abat awuʼune. 22 Melel anaʼoj ta lek te bayal buelta ay bin chopol* akʼanoj ta stojol te yantik.
23 Spisil ini la kilbey skʼoplal sok spʼijil koʼtan, jich la kal: «Ya xpʼijubon». Pero, maʼyuk bin-ora juʼ kuʼun stael. 24 Te bintik aye ma xjuʼ ta tael sok kʼax kʼubul. ¿Machʼa ya xjuʼ ya xkʼot ta yoʼtan? 25 La kakʼ ta koʼtan ta swenta snaʼbeyel skʼoplal, ta yilbeyel skʼoplal sok ta sleel te pʼijil oʼtanil sok te bin swentail te bintik ay, sok kʼot ta koʼtan te mero ma lek te bin ya spasik te machʼatik jkʼaxel maʼyuk spʼijil yoʼtanik sok te stalelik te machʼatik ma snaʼik kʼinal. 26 Jaʼnix jich la jta ta ilel ini: te ants jich kʼoem te bin-utʼil yakʼul pejtsʼ yuʼun nutsojel; te yoʼtan jich kʼoem te bin-utʼil stsakojibal chay sok te skʼabe jaʼ jich bin-utʼil cadenaetik, jaʼ mero kʼax chʼa-a te bin-utʼil te lajele. Te machʼa ya yakʼbey stseʼelil yoʼtan te smelelil Dios ya xkol ta stojol te antse, yan stukel te jmulawil ya yichʼ tsakel yuʼun.
27 Jich ya yal te jtsobaw: «¡Ilawilik! Jaʼ te bin la jta ta ilel ini, bayal te bin la kilbey skʼoplal yuʼun ya xkʼot ta koʼtan. 28 Pero te bin yakon ta sleel, maba jtaoj. Ta jmil ta tul ants winiketik la jta jtul tojil winik, pero maʼyuk la jta ni jtuluk ants. 29 Jaʼnax jtaoj ini: te toj la spas te smelelil Dios te ants winiketik, pero jaʼ stʼunojik spasel te bin snopoj ta yoʼtanik».