¿Bin yuʼun te lokʼ bael ta anel te Moisés?

ILAWIL te Moisese, yak ta lokʼel bael ta anel ta Egipto. ¿Yabal awil te machʼatik yakal ta nutsel yuʼune? ¿Yabal anaʼ te bin yuʼun ya skʼan smilik te Moisese? Ya jnoptik bael te bin yuʼune.

Te Moisés chʼi ta sna te Faraón te ajwalil yuʼun Egiptoe. La sta bayal spʼijil sok mukʼ skʼoplal kʼot. Te Moisés snaʼoj te maba egipcio winikuke sok te israeletiknix-a te smeʼ state soknix te mosoinbilike.

Ta jun buelta te kʼalal ayix 40 yaʼbilal-a la skʼan bajtʼ yil te bin utʼil ay te slumale. Yakalik ta utsʼinel-a. La yil jtul egipcio winik te yak ta smajel jtul israel winik te mosoinbile. Te Moisés la yil ta sjoyobal te maʼyuk machʼa yak ta ilel yuʼune, la yejchʼentes te egipcio winik te laj yuʼune. Jich te Moisés la smuk jilel ta jiʼileltik te winike.

Ta yan kʼajkʼal bajtʼ yil yan buelta te slumale. La skuy te ya xjuʼ yuʼun skoltayel te israeletik yuʼun ma xyichʼik mosoinel-a. Jaʼukmeto la yil chaʼtul israeletik te yakal ta smajbel sbaike, te Moisés jich la yalbey te machʼa yak ta spasel te bin chopole: ¿Bin yuʼun te ya amaj aba sok te machʼa pajal alumal soke?

Te winik jich la yal: ¿Machʼa la yakʼbat awaʼtel ta ajwalil sok ta juez ta jtojoltik? ¿Yuʼunbal ya akʼan amilon jich bitʼil la amil te egipcio winike?

Xiw yuʼun te Moisese. La snaʼ stojol te chiknajemix skʼoplal te bin la spasbey te egipcio winike. Te kʼalal la yaʼiy stojol te Faraone, la stikun bael winiketik yuʼun akʼa smilik te Moisese. Jich yuʼun lokʼ bael ta anel ta Egipto te Moisese.

Te kʼalal lokʼ bael ta anel ta Egipto te Moisese, bajtʼ kʼalal ta skʼinal Madián. Tey la snaʼbey sba-a te jayeb machʼatik ay yuʼun te Jetro, nujpun sok jtul yantsil nichʼan te Séfora (Ziporá) sbiile. Te Moisés och ta jkanan tuminchij sok la skanantaybey te stuminchij te Jetro. Te Moisés nain 40 jaʼbil ta skʼinal Madián. Ayix 80 yaʼbilal-a te Moisese. Ta jun kʼajkʼal, te kʼalal yak ta skanantaybeyel stuminchij-a te Jetro, ay bin chajpnax kʼot ta pasel te jelon skuxlejal yuʼun te Moisese. Ya xkʼaxotik ta yan página ya kiltik bin-a te chajpnax kʼot ta pasele.