¿Yabal xjuʼ skoltayon te Bibliae?

Te Bibliae ma pajaluk sok yantik libroetik. Melel tey ya jtatik-a te tojobteseletik yuʼun te Jpaswanej kuʼuntike (2 Timoteo 3:16). Te bin ya yale ya xjuʼ skoltayat. Jaʼnix te Biblia ya yal: «Cuxul te scʼop Dios soc ay yuʼel ya xʼaʼtej» (Hebreos 4:12). Ay cheb te banti ya xjuʼ ya skoltayat te libro ini ta slekubtesel te akuxlejale: jaʼ te ya yakʼbat tojobtesel ta akuxlejal sok te ya skoltayat yuʼun ya anaʼbey sba te Dios sok te bintik jamal yaloj ya spase (1 Timoteo 4:8; Santiago 4:8).

Ya yakʼ tojobtesel ta jkuxlejaltik. Te Biblia ya yakʼbotik tojobtesel ta jkuxlejaltik ta jujuntul sok ya yal yantik temaetik.

• Te bitʼil ya kil jbatik sok te yantik (Efesios 4:31, 32; 5:22, 25, 28, 33).

• Te ma stsakotik chamel sok te lek ya kaʼiy jbatik (Salmo 37:8; Proverbios 17:22).

• Te lekuk jtaleltik (1 Corintios 6:9, 10).

• Ta swenta takʼin (Proverbios 10:4; 28:19; Efesios 4:28).a

Ay jun nujpunel ta Asia te la yilik te kʼax lek te tojobtesel ya yakʼ te Bibliae. Ta swenta te nujpuneliktoe, wokol kʼayik ta kuxinel. Pero jajchik ta spasel ta skuxlejalik te bin la skʼoponik ta Bibliae. ¿Bin lek alokʼ yuʼunik-a? Te Vicent, te jaʼ mamalalil, jich ya schol: «Te bin la jkʼopon ta Biblia la skoltayon yuʼun ya jtsal sok skʼuxul oʼtanil te wokoliletik ta nujpunel. Kʼalal la jpas ta jkuxlejaltik te tojobteseletik la yakʼ stseʼelil koʼtantik». Te yinam, te Annalou sbiil, ya yal: «Kʼalal la jkʼopontik te ejemploetik ta Biblia bayal la skoltayotik. Ta ora ini tseʼelix koʼtan sok ya jmulan te jun-nax te bin jnopoj ya jpastike».

Ya skoltayotik ta snaʼbeyel sba te Dios. Te Vicent te la kalbeytikix skʼoplale, la yalxan: «Te kʼalal ya jkʼopon te Bibliae, nopol ya kaʼiy jba ta stojol te Jehová». Mukʼ skʼoplal te bin la yale: te Biblia ya xjuʼ ya skoltayat yuʼun ya anaʼbey sba ta lek te Diose. Teme jich ya apase, maba jaʼnax te ya ata alekilal, jaʼnix jich ya awamigoin te Diose. Yame awil te ta skʼop Diose ay bin lek ya jmaliytik ta pajel chaʼbej, jaʼ te ya jmulantik ta sbajtelkʼinal te kuxlejalil ta smelelile (1 Timoteo 6:19). Maʼyuk yan libro te jich ya yalbotike.

Teme jajch akʼopon te Biblia sok teme kʼayat ta skʼoponele, yame xjuʼ ya alekubtes te akuxlejal ta ora ini sok te ya anaʼbeyxan sba ta lek te Diose. Pero, bayalniwan jojkʼoyel awuʼun ta swenta te bin ya akʼopone. Teme jiche, juluk ta awoʼtan te ejemplo yuʼun te etíope winik te kʼaxemix ta dos mil jaʼbil te kuxine. Te winik ini bayal jojkʼoyeletik la spas ta swenta te sKʼop Diose. Te Felipe, te jaʼ jnopojel yuʼun te Jesús, la sjojkʼoybey teme ya xkʼot ta yoʼtan te bin yak ta skʼoponele, jich la sujt: «¿Bin utʼil cʼan jnaʼbe scuentahil, ha to te ayuc machʼa ya yaʼbon jnop?».b Ta patil, la skʼan koltayel ta stojol te Felipe (Hechos 8:30, 31, 34). Jaʼnix jich, teme ya akʼan ya xkʼot ta awoʼtan te bin ya yal te Biblia, yame xjuʼ ya anojes te formulario te ay ta Internet ta jw.org o tsʼibaya bael ta dirección te nopol ya xjil awuʼun te ya yal liʼ ta revista. Jaʼnix jich ya xjuʼ ya akʼopon jtul testigo yuʼun Jehová te banti kuxulate o ya xjuʼ ya xbaat ta sNail Tsoblej yuʼunik. Pasa tulan yuʼun ya ale aBiblia sok akʼa slekubtesbat te akuxlejale.