«¿Banti ay-a te Diose?»
«TE JOJKʼOYEL TE YANANIX YICHʼ PASEL-AE: ¿BANTI AY-A TE DIOSE?» (Te kʼalal la yulaʼtay te antiguo campo de concentración ta Auschwitz [Polonia] te papa Benedicto XVI).
¿JAXAN TE JAʼATE? ¿AYBAL JICH AJOJKʼOYBEYOJ ABA TE KʼALAL AY YA XKʼAX TULAN WOKOLILE? ¿AYBAL KʼAXEM TULAN WOKOLIL TA ATOJOL TE MA XCHʼAY TA AWOʼTAN TE YAKʼOJBAT ANOP TE MAʼYUK AKʼOPLAL TA YOʼTAN TE DIOSE?
Te Sheila, te nainem ta Estados Unidos sok te mero schʼuunej Dios te sfamiliae, jich la yal: «Ta kalalilto jchʼuunej te ay Diose, jnaʼoj te jaʼ Jpaswanej kuʼuntike, pero maʼyuk bin-ora nopol la kaʼiy jba ta stojol. Jnaʼoj-a te ya yilone, pero la jkuy te ma xyichʼon ta wentae. Maʼyuk la jnop te ya spʼajone, pero ma la schʼuun koʼtan te ay jkʼoplal ta yoʼtane». ¿Bin yuʼun te jich snopjibal yuʼun-a te Sheila? Jich ya yal: «Tal bayal wokolil ta stojol te jfamilia sok jich yilel te ma skoltayotik-a te Diose».
Jich bitʼil te Sheila, ayniwan schʼuunel awoʼtan ta stojol te Dios te spisil ya xjuʼ yuʼune, manchukme jich-abi yaniwan ajojkʼoybey aba teme ay akʼoplal ta yoʼtane. Te Job te toj ta winikil sok te smukʼulinej yoʼtan te yuʼel sok te spʼijil te Jpaswaneje, jich la sjojkʼoybey sba-euk (Job 2:3; 9:4). Te kʼalal tal chaʼoxchajp wokolil ta stojole sok te chʼay te smukʼul yoʼtane, jich la yalbey te Diose: «¿Bin yuʼun yac anacʼ asit ta jtojol soc te ha acontra yac acuyon?» (Job 13:24).
Pero, ¿bin ya yal te Bibliae? ¿Jaʼbal smul Dios te ay jwokoltike? ¿Aybal skʼoplal ta yoʼtan te ants winiketike? ¿Aybal jkʼoplaltik ta yoʼtan ta jujuntul? ¿Aybal bin-utʼil ta naʼel te ya snaʼbotik jbatik ta leke? ¿Yabal xkʼot ta yoʼtan te bin yaʼiyel ya kaʼiy jbatike? ¿Yabal skoltayotik te kʼalal ay jwokoltike?
Ta yantik articuloetik, yame kiltik bael bin-utʼil te Biblia sok te bintik pastiklanbile ya yakʼ kiltik te ay jkʼoplaltik ta yoʼtan te Diose (Romanos 1:20). Te kʼalal ya anaʼbeyxan sba ta lek te Jpaswaneje yame schʼuunxan awoʼtan te kʼuxat ta yoʼtane (1 Juan 2:3; 1 Pedro 5:7).