KAKʼTIK TA ILEL TE JCHʼUUNEJTIK DIOSE

Akʼa jtsatik ta lek te bin ya jkʼasestik kʼajkʼal-ae

¿Bin yuʼun te ya skʼan ya jtsatik ta lek te bin ya jkʼasestik kʼajkʼal-ae? Jaʼ yuʼun te jaʼ ya x-och jilel ta jpensartik te bin ya kiltik ta pajina yuʼun Internet, pelikula, libro, kʼayojil o bideojuego. Te bintik ya kiltik, jchʼam kaʼiytik o jkʼopontik, yame xchiknaj ta jtaleltik o ta swenta te bin ya jpastike. Mel-oʼtantik sba te jteb ma spisiluk te bin ya xjuʼ ya jkʼasestik kʼajkʼal ta ora ini, bayal bin yichʼoj te maba lek ya yil te Jehovae (Sl 11:5; Gál 5:19-21). Ta swenta-abi, te Biblia ya stij koʼtantik yuʼun jaʼuk ya jnoptik te bintik ya yakʼ ta ichʼel ta mukʼ te Jehovae (Flp 4:8).

KʼALAL LA AWILIX-A TE BIDEO ¿LEKBAL TE BIN YA JKʼASES KʼAJKʼAL-AE?, AKʼBEYA SUJTIB TE JOJKʼOYELETIKE:

Te bitʼil ya smil sbaik te gladiadoretik ta namey kʼinal Roma, ¿bin-utʼil pajal sok te bin ya skʼasesik kʼajkʼal te ants winiketik ta ora ini?
¿Bin-utʼil te ermanoetik ta kongregasion ya xjuʼ ya skoltayik te jchʼieletik ta stsael ta lek te bin-utʼil ya xjuʼ ya skʼasesik te kʼajkʼale?
¿Bin-utʼil ya xjuʼ ya skoltayotik te Romanos 12:9 yuʼun ya jnaʼtik stsael ta lek te bin ya jkʼasestik kʼajkʼal-ae?
Te banti nainemotike, ¿bintik ya xjuʼ ya jkʼasestik kʼajkʼal-a te lek ya yil te Jehovae?

¿JAʼBAL YA AMULAN SKʼASESEL KʼAJKʼAL-A TE BANTI MAʼYUK BIN YA APAS O JAʼBAL TE BANTI AY BINTIK YA APASE?

Ta kʼajkʼal ini, jteb ma spisiluk te bintik ya yichʼ kʼasesel kʼajkʼal-ae, jaʼ te banti maʼyuk bin ya apase. Te skʼoponel libroetik, yilel pelikulaetik sok programaetik yuʼun telebision, jaʼnax ya yakʼ kiltik te bin yakik ta spasel te yantike, yan te joʼotike maʼyuk bin ya jpastik. Manchukme maba chopoluk-abi, bayal machʼatik ya yalik te jaʼ lekxan te jaʼ ya jkʼasestik kʼajkʼal-a te banti ay bin ya xjuʼ ya jpastike, melel ay bayal bintik lek ta xlokʼ kuʼuntik-a. Ay machʼatik jaʼ ya smulanik stijel aʼtejibaletik yuʼun spasel kʼin o jaʼ te ay bintik ya sbonike. Soknix ay yantik te jaʼ ya smulanik te tajimal, nuxel o ajkʼot. Chikan te bin ya jmulantik spasel yuʼun ya jkʼasestik-a te kʼajkʼale, jaʼuk ya jpastik «spisil ta scuenta yichʼel ta mucʼ te Diose» (1Co 10:31).