La sut sit ta spat te yinam Lot

TE Lot sok te jayeb machʼatik ay yuʼune junax yakalik ta kuxinel sok-a te Abraham ta banti skʼinal Canaán. La sta yorail te Abraham te jich la yalbey te Lote: Liʼ ini maʼyuk lek kʼinal ta swenta spisil te jchambalamtike. Awokoluk akʼa jxat jbatik. Teme ya xbaat ta kʼexen, joʼon ya xboon ta waʼel.

Te Lot la yil te kʼinale. La yil jxejtʼ lekil kʼinal te banti ay bayal jaʼ tey-a sok bayal akiltik yuʼun te schambalame. Jaʼ te skʼinal Jordán. Jich yuʼun te Lot la yikʼ bael tey-a te jayeb machʼatik ay yuʼune soknix te schambalame. Ta patil la spas snaik ta lum Sodoma.

Te ants winiketik ta Sodoma kʼax chopolik-a. Jaʼ ini ma la smulan te Lote, melel lekil winik stukel. Jaʼnix jich te Dios ma la smulan euk. La sta yorail te bitʼil te Diose la stikun bael cheb chʼul abatetik ta stojol te Lot swenta yuʼun bajtʼ yalbeyik te ya yichʼ lajinel te lum Sodoma sok te Gomorra te nopol ay tey-ae te jaʼnix jich kʼax chopolik euke.

Te chʼul abatetik ini jich la yalbeyik te Lote: ¡Sujame aba! ¡Ikʼa bael te awinam sok te cheb awantsil nichʼnab sok lokʼanik bael liʼ ini! Te Lot sok te jayeb machʼatik ay yuʼune ma la suj sbaik ta oranax, jich yuʼun te chʼul abatetik ini la snitiklan lokʼel sok la slokʼesik bael ta banti te lume. Jich yuʼun jtul te chʼul abat ini jich la yal: ¡Lokʼanik bael ta anel yuʼun te akuxlejalike! Mame xasut asitik. Ananik bael ta banti te witstikil yuʼun jich ma xlajex.

Te Lot sok te cheb yantsil nichʼnabe la schʼuunik te mantale sok lokʼik bael ta anel ta Sodoma. Maba la stejkʼan sbaik ajkʼuk, sok maba la sut sitik ta spatik. Yan te yinam te Lote la skʼaxuntay mantal stukel. Te kʼalal mato najtʼuk slokʼelik bael ta Sodoma-ae, la stejkʼan sba sok la sut sit ta spat. Jich yuʼun te yinam te Lote kʼatpʼuj ta tekʼel balal atsʼam. ¿Yabal awil ta banti te lokʼombae?

Ta swenta ini ay bin lek ya xjuʼ jnoptik yuʼun: Jaʼ te bitʼil ya xjuʼ skoltay Dios te machʼatik ya schʼuumbot te smantale, jaʼukmeto te machʼatik ma schʼuumbeyik te smantale ya xlajik yuʼun.