Lección 2

¿Machʼa-a te Diose?

¿Machʼa-a te smelelil Diose, sok bin sbiil?  (1, 2)

¿Bin yilel sbakʼetal te Diose? (3)

¿Bintik talelil yuʼun Dios te chikanik ta ilel ta leke? (4)

¿Yabal xjuʼ jtuuntestik lokʼombaetik te kʼalal ya kichʼtik ta mukʼ te Diose? (5)

¿Bintik-a te ya skoltayotik ta snaʼbeyel sba ta lek te Diose? (6)

1. Te ants winiketike bayal bintik ya yichʼik ta mukʼ. Jaʼukmeto, te Biblia ya yalbotik te jtulnax te SMELELIL Diose. Jaʼ te machʼa la spas spisil te bintik ay ta chʼulchan sok ta Balumilal sok jaʼ yakʼojbotik te jkuxlejaltike, jich yuʼun jaʼnax ya skʼan kichʼtik ta mukʼ stukel (1 Corintios 8:5, 6; Apocalipsis 4:11).

2. Manchukme ay bayal machʼatik ya yalbeyik Kajwal o Dios, jaʼukmeto, junax te sbiile jaʼ JEHOVÁ. Ay Bibliaetik te maʼba yichʼojbey sbiil te Diose, yuʼun te machʼatik la slokʼtayike la sjelik ta Kajwal o Dios. Jaʼukmeto, kʼalal la yichʼ stsʼibayel te Bibliae, te biilil Jehová jteb maʼ sta juk jmil buelta tsʼibaybil tey-a (Éxodo 3:15; Salmo 83:18).

3. Te Jehovae maʼba chʼichʼbakʼet jich bitʼil te joʼotike. Te Biblia ya yal te «Ha Espíritu te Diose» (Juan 4:24). Te espíritu jaʼ jun kuxlejalil te kʼax bayal yuʼel, maʼba pajalotik sok. Te Diose maʼyuk machʼa yilojbey sit. Manchukme ay ta chʼulchan te Jehovae, ya yil spisil te bintik ya jpastike (Salmo 11:4, 5; Juan 1:18). Jaʼukmeto, ¿bin-a te chʼul espiritue? Maʼ Diosuk, jaʼ yip te Jehová te ya stuuntes kʼalal ya spas te skʼanojel yotʼane (Salmo 104:30).

4. Te Biblia ya yalbotik bin yilel stalel te Jehovae. Te talelil yuʼun Dios te kʼax chikanik ta ilele, jaʼ kʼuxul otʼanil, toj yotʼan, ay spʼijil sok ay yuʼel. (Deuteronomio 32:4; Job 12:13; Isaías 40:26; 1 Juan 4:8). Jaʼnix jich ya yalbotik te ay yantik stalel: ya snaʼ yoʼbolil jbatik, ay slekil yotʼan, ya spas perdón, ya snaʼ yakʼel te bin ya xtuun kuʼuntike sok maʼ x-ilin ta ora. Jich bitʼil te jaʼ yal xnichʼanotik te Diose, ya skʼan jnopbeytik te yotʼane (Efesios 5:1, 2).

5. ¿Lekbal te ya jkejan jbatik ta skʼoponel te lokʼombaetike? Maʼuk (Éxodo 20:4, 5). Te Jehová ya yalbotik te jaʼnax stukel ya skʼan ichʼel ta mukʼ, maʼ jaʼuk te lokʼombaetike sok te machʼatik ya skuy sbaik ta diose, melel maʼyuk yuʼel yuʼun ya skoltayotik (Salmo 115:4-8; Isaías 42:8).

6. Te bin ya xjuʼ skoltayotik ta snaʼbeyel sba ta lek te Diose, jaʼ te kʼalal ya kiltik spisil te bintik spasoje, jich ya yakʼ jnaʼtik te bayal spʼijil, bayal yuʼel soknix te kʼuxotik ta yotʼane (Salmo 19:1-6; Romanos 1:20, XCD). Sok te kʼalal ya jkʼopontik ta lek te Bibliae, tey ya yalbotikxan te bin stalel te Diose sok te skʼanjel yotʼan soknix te bin ya skʼan jpastike (Amós 3:7; 2 Timoteo 3:16, 17).

[Foto yuʼun te página 5]

Ta swenta Biblia sok te bintik spasoje, ya jnaʼbeytik sba ta lek te Diose