Lección 4

¿Machʼa-a te Pukuje?

¿Bin utʼil chiknaj te Pukuje? (1, 2)

¿Bin ya stuuntes te Pukuj yuʼun ya sloʼlay te ants winiketike? (3-7)

¿Bin yuʼun ya skʼan te maʼ x-awakʼ aba ta tsalel yuʼun te Pukuje? (7)

1. Te Pukuje jaʼ smukʼul kontra te Diose. Te Pukuje ya spas lot sok ya xleawan bayal ta kʼop. Jaʼnix jich te Bibliae ya yalbey yan sbiil «Satanás» te ya skʼan yal j-kontroinwanej. Jaʼ yuʼun te cheb biilil ini snujpʼ kʼoem te jich sbiilinej te skontro te Diose. Ta xjajchʼibal lekil chʼul abat-a te kʼalal ay ta chʼulchan sok-a te Diose, ta patil la stoy sba, sok la skʼan ichʼel ta mukʼ, te jaʼnax ay ta swenta Jehová te ichʼel ta mukʼe (Mateo 4:8-10).

2. Te Pukuje la stuuntes jkojtʼ chan yuʼun jich kʼopoj sok-a te Evae. Te Pukuje la sloʼlay te Evae, jich la xkʼaxuntaybey smantal te Diose. Jich te Satanás la skontroin te bitʼil jaʼnax stukel te Jehová ya xpasawan ta mantal ta swenta spisil te bintik spasoje. Jaʼnix jich la yakʼ ta naʼel te maʼ la ayuk jtuluk ants winik te jun yotʼan ya yakʼ sba ta stojol te Jehovae. Kʼatpʼuj ta jkontroinwanej yuʼun Dios te kʼalal jich la spase. Jaʼ yuʼun la sbiilin Pukuj (Génesis 3:1-5; Job 1:8-11; Apocalipsis 12:9).

3. Te Pukuje baem ta yotʼan sloʼlayel te ants winiketike, jaʼ ya skʼan te ya x-ichʼot ta mukʼe (2 Corintios 11:3, 14). Ay bayal bintik ya stuuntes te Pukuj ta loʼlaywanej, jich bitʼil te lotil religión. Teme jun religión maʼba ya xpʼijubteswan ta smelelil ta swenta te Diose, jaʼme yak ta spasel te skʼanojel yotʼan te Pukuj abi (Juan 8:44). Te ants winiketik te ochemik ta lotil religión, ya skuyik te jaʼ ya yichʼik ta mukʼ te smelelil Diose, jaʼukmeto, jaʼ yakʼoj sbaik ta abatinel yuʼun te Pukuje, te jaʼ dios yuʼun te balumilale (2 Corintios 4:4).

4. Te bin utʼil ya xloʼlaywanxan te Pukuje, jaʼ te ya stijbey yotʼan te ants winiketik yuʼun ya skʼoponik te chopol espirituetike. ¿Bin yuʼun te jich ya spasike? Yuʼun ya skʼanik kanantayel o koltayel yuʼun ya yutsʼinik yantik o snaʼel te bin yato xkʼot ta pasel o yuʼun ya spasik milagroetik. Ta spisil te chopol atʼelil ini, jaʼ ta yuʼel Pukuj te jich ya spasike. Jaʼukmeto, teme ya jkʼantik te lek ya yilotik te Diose ya skʼan te maʼba ya jpastik spisil ini (Deuteronomio 18:10-12; Hechos 19:18, 19).

5. Jaʼnix jich te Pukuje ya sloʼlay te ants winiketik yuʼun te stoybail yotʼanik yuʼun te stsʼumbalike soknix te kʼalal ya yakʼbey smukʼulin yotʼan te politicae. Ay machʼatik ya skuyik te jaʼ kʼax lekxan te stsʼumbalik o te slumalike, jaʼukmeto, maʼ meleluk (Hechos 10:34, 35). Ay yantik te ya skuyik te politicae ya xjuʼ yuʼun xchajpanel te kʼopetike. Te machʼatik jich ya snop ta yotʼanike, jaʼ ya spʼajik te Ajwalil tsabil yuʼun te Diose, melel jaʼnax stukel te ya xjuʼ yuʼun xchajpanel te kʼopetik ay ta Balumilale (Daniel 2:44).

6. Te bin utʼil ya xloʼlaywanxan te Pukuje, jaʼ te ya smon kotʼantik ta yalel ta mulile. Te Jehová ya yalbotik te manchuk ya jpastik te bin chopole, yuʼun ya snaʼ te ya yakʼbotik jwokoltik ta patile (Gálatas 6:7, 8). Ayniwan chaʼoxtul ants winiketik te ya skʼanik te ya apas euk te bintik chopol ya spasike. Jaʼukmeto, ayukme ta awotʼan te jaʼ te Pukuj te ya smonotik ta spasel te bintik chopole (1 Corintios 6:9, 10; 15:33).

7. Te bin yanxan ya stuuntes te Pukuje, jaʼ te utsʼinel sok te kontroinele, yuʼun jaʼ ya skʼan te ya awijkʼitay ta snopbeyel Skʼop te Jehovae. Ayniwan chaʼoxtul te machʼatik jayeb ay awuʼun ta ana te maʼ smulan te ya anop te bin ya yal te Bibliae, sok yaniwan awichʼ labanel yuʼun. Jaʼukmeto, ¿machʼa yakʼojbat te akuxlejale? Te Pukuje, ya xiwtesat yuʼun ya skʼan te ya awijkʼitay snopbeyel Skʼop de Jehovae. Jaʼ yuʼun maʼme x-awakʼ aba ta komel (Mateo 10:34-39; 1 Pedro 5:8, 9). Teme tsʼijkʼ awuʼun te utsʼinel te ya xtal ta atojol yuʼun te Pukuje, jichme ya awakʼbey sbujtsʼ yotʼan te Jehovae sok jich ya awakʼ ta ilel te jaʼnax stukel ya xjuʼ xmantalaj ta stojol spisil te bintik spasoje (Proverbios 27:11, XCD).

[Fotoetik yuʼun te página 9]

Te lotil religión, skʼoponel chopol espirituetik sok te toybail yuʼun te lumalil ya xloʼlaywan

[Foto yuʼun te página 9]

Maʼ x-akom aba ta snopel te Skʼop te Jehovae yuʼun jich maʼ stsalat-a te Pukuje