Lección 5

¿Bin-a te skʼanojel yoʼtan Dios ta swenta te Balumilale?

¿Bin yuʼun la spas Balumilal te Jehovae? (1, 2)

¿Bin yuʼun te maʼ jaʼuk jun nichimal kʼinal te Balumilal ta ora ini? (3)

¿Bin ya xkʼot ta pasel ta swenta te machʼatik chopolike? (4)

¿Bin ya spas ta pajel chaʼbej te Jesús ta swenta te machʼatik ayik ta chamel sok te meʼel mamaletike? (5)

¿Bin ya spas ta pajel chaʼbej te Jesús ta swenta te machʼatik lajemikixe? (6)

¿Bin ya skʼan apas yuʼun ya xjuʼ ata te utsilaletik ta pajel chaʼbeje? (7)

1. Te Jehová la spas te Balumilal yuʼun tey ya xkuxinik te ants winiketike. Te skʼanojel yoʼtan te Diose jaʼ te yakuk xkuxinik ta sbajtʼel kʼinal tojil ants winiketik te tseʼel yoʼtanik ta spisilik (Salmo 115:16; Isaías 45:18). Maʼyuk bin ora ya yichʼ jinel te Balumilale, stalelme ay ta sbajtʼel kʼinal (Salmo 104:5; Eclesiastés 1:4).

2. Te kʼalal maʼto yichʼoj pasel-a te winike, te Diose la spas ta tʼujbil nichimal kʼinal jsejp lum te la sbiilin «Tsʼumbil kʼinal Edén». Tey la yakʼ kuxinukik-a te Adán sok te Evae. Te skʼanojel yoʼtan te Diose jaʼ te ya x-alnichʼnajik yuʼun jich kʼunkʼun la spasik ta nichimal kʼinal te Baumilal te jichuke (Génesis 1:28; 2:8, 15).

3. Te Adán sok te Evae yoloj, o spasemal yotʼan, la xkʼaxuntaybeyik smantal te Diose. Ta swenta te bin la spasike, la yichʼik tenel lokʼel ta banti tsʼumbil kʼinal Edén jich chʼay te nichimal kʼinale (Génesis 3: 1-6, 23). Jaʼukmeto, te Jehovae maʼba chʼayem ta yotʼan te bin snopoj ta swenta te Balumilal, yuʼun leʼ ya xkuxinik te ants winiketik ta sbajtʼel kʼinal. ¿Bin utʼil ya xkʼot ta pasel yuʼun? (Salmo 37:29.)

4. Te Diose nailme ya slajin te machʼatik chopolike, ta patil ya yichʼ pasel ta nichimal kʼinal te Balumilale (Salmo 37:38). Te machʼatik chopolike yame yichʼik lajinel ta Armagedón te jaʼ guerra yuʼun te Diose. Ta patil te Pukuje yame yichʼ makel jmil jaʼbil. Jich maʼyuk machʼa chopol ya xjil ta sjinel te Balumilale. Jaʼnaxme ya staik skolel te machʼatik lum yuʼun te Diose (Apocalipsis 16:14, 16; 20:1-3).

5. Te Jesús yame xmantalaj jmil jaʼbil ta swolol Balumilal (Apocalipsis 20:6). Kʼunkʼunme ya xchʼaybael te mulil te ay ta kotʼantik sok te ay ta jbakʼetaltike. Yame xkʼootik ta tojil ants winik jich bitʼil te Adán sok Eva kʼalal maʼto xyalik ta mulil-ae. Maʼme ayukix te chamele, te meʼel mamalubele sok te lajele. Te machʼatik ayik ta chamele yame xlekubik sok te meʼel mamaletike yame xchaʼsujtʼik ta jchʼieletik (Job 33:25; Isaías 33:24; Apocalipsis 21:3, 4).

6. Te kʼalal yak ta mantal ta jmil jaʼbil-a te Jesuse, te machʼatik toj yotʼanik ta stojol te Diose, yame x-atʼejik ta spasel ta nichimal kʼinal ta swolol te Balumilale (Lucas 23:43). Jaʼnix jich, millonetik ta jtul te machʼatik lajemikixe ya xchaʼkuxajiktal ta Balumilal (Hechos 24:15). Teme ya spasik te bin ya skʼan te Diose, yame xkuxinik ta sbajtʼel kʼinal. Yan teme maʼuke, yame yichʼik lajinel ta sbajtʼel kʼinal (Juan 5:28, 29; Apocalipsis 20:11-15).

7. Jichme ya xkʼot ta pasel te skʼanojel yotʼan Dios ta swenta te Balumilal jich bitʼil ay ta xjajchʼibale. Jaʼ yuʼun, ¿yabal amulan te ya xkuxinat tey-ae? Teme jiche, nopilayamexan te Skʼop te Jehová sok chʼuunbeyame te mantaliletik yuʼune. Te bin ya xjuʼ skoltayatxan ta spasele, jaʼ te ya xbaat ta Snail Tsoblej yuʼun Stestigotak te Jehová te ay ta alumale (Isaías 11:9; Hebreos 10:24, 25).

[Foto yuʼun te página 10]

Chʼay te nichimal kʼinale

[Fotoetik yuʼun te página 11]

Te kʼalal kʼaxix-a te Armagedone yame yichʼ pasel ta nichimal kʼinal ta swolol te Balumilale