Lección 7

¿Bin utʼil ya skʼan snoptsajat ta skʼoponel te Diose?

¿Bin yuʼun te tulan skʼoplal te ya akʼopon spisil ora te Diose? (1)

¿Machʼanax ya skʼan jkʼopontik sok bin utʼil ya skʼan jpastik? (2, 3)

¿Bin ya xjuʼ kalbeytik te kʼalal ya jkʼopontik te Diose? (4)

¿Bin ora ya skʼan jkʼopontik te Diose? (5, 6)

¿Yabal yaʼiybey skʼop spisil te machʼatik ya xkʼoponot yuʼun te Jehovae? (7)

1. Te kʼalal ya akʼopon te Diose, ya skʼan akʼopon sok spekʼelil awotʼan sok yame skʼan akʼopon spisil ora. Teme jich ya apase, nopol ya awaʼiy aba ta stojol te Diose, jich bitʼil jtul awamigo te kʼux ta awotʼane. Manchukme kʼax mukʼ skʼoplal sok bayal yuʼel te Jehová ya yaʼiy te kʼalal ya akʼopone. ¿Spisilbal ora ya akʼopon te Diose? (Salmo 65:2; 1 Tesalonicenses 5:17.)

2. Ta skʼoponel te Diose, jich ya kakʼtik ta ilel te jaʼ ya kichʼtik ta mukʼe. Jaʼ yuʼun jaʼnax ya skʼan jkʼopontik te Jehová Diose. Kʼalal kʼax ta Balumilal te Jesuse spisil ora la skʼopon te State, maʼyuk machʼa yan la skʼopon jaʼnax te Jehovae. Jaʼ yuʼun te joʼotike ya skʼan jich ya jpastik euk (Mateo 4:10; 6:9). Jaʼukmeto, kʼalal ya jkʼopontik te Jehovae ya skʼan jkʼopontik ta swentanax sbiil te Jesuse. Jich ya kakʼtik ta ilel te ya kichʼtik ta mukʼ te yatʼel yichʼoje, sok te ay xchʼuunel kotʼantik yuʼun te la yakʼ sba ta lajel ta jwentatike (Juan 14:6; 1 Juan 2:1, 2).

3. Te kʼalal ya jkʼopontik te Diose, ya skʼan xlokʼ ta kotʼantik te bin ya kalbeytike, melel maʼba ya yaʼiy stojol teme tsʼibaybil ta jun te bin ya kalbeytike sok maʼ skʼan te jaʼnax ya jsutilaytik te bin ya kalbeytike (Mateo 6:7, 8). Ya xjuʼ akʼopon te Dios manchukme nakalat, tekʼelat, chikan banti ayat sok biluk ora, jaʼnax teme sok spekʼelil awotʼane. Te Diose ya yaʼiy stojol te kʼalal ya jkʼopontik ta kotʼantike (1 Samuel 1:12, 13). Lek te ya akʼopon atukelnax te Diose, manchukme maʼyuk ajoʼtak sok manchukme kʼubul ayate (Marcos 1:35).

4. ¿Bin ya xjuʼ awalbey te Dios kʼalal te ya akʼopone? Chikan te bin ya skʼan awotʼan awalbeye, swenta yuʼun ya xjuʼ skoltayat ta spasel te skʼanojel yotʼane (Filipenses 4:6, 7). Te kʼalal pʼijubteswan ta skʼoponel Dios te Jesuse, la yal te jaʼ ya jkʼantik te ya yichʼ ichʼel ta mukʼ sbiil te Jehová sok te akʼa kʼotuk ta pasel te skʼanojel yotʼane. Soknix ya xjuʼ jkʼanbeytik te bin ya xtuun kuʼuntik ta jujun kʼajkʼale, sok akʼa spasbotik perdón yuʼun te jmultike, soknix te akʼa skoltayotik te manchuk ya xyalotik ta mulile (Mateo 6:9-13). Te kʼalal ya jkʼopontik te Diose, maʼme jaʼuknax ya jkʼantik te bin ya xtuun kuʼuntik ta jtukeltike. Jaʼnaxme ya jkʼantik te bin stsakoj sba skʼoplal sok te skʼanojel yotʼan te Diose (1 Juan 5:14).

5. Ya xjuʼ akʼopon te Jehová biluk ora teme jich ya skʼan awotʼan yuʼun ya awalbey wokol o ya awalbey yutsilal (1 Crónicas 29:10-13). Jaʼnix jich maʼme x-awijkʼitay ta skʼoponel te Jehová te kʼalal ay kʼopetik ta atojol sok te kʼalal maʼ xjuʼix awaʼiy xchʼuunbeyel te smantale (Salmo 55:22; 120:1). Sok nailme ya skʼan akʼopon te Jehová te kʼalal maʼto x-ochat ta weʼele (Mateo 14:19). Te Jehová ya yalbotik te akʼa jkʼopontik «ta spisil ora» (Efesios 6:18).

6. Teme yalotik ta mulile, ya skʼan te oranax ya jkʼopontik te Jehovae, yuʼun akʼa snaʼbotik yoʼbolil jbatik sok te yakuk spasbotik perdone. Te Diose «jpas perdón» stukel, jaʼnax teme ya kalbeytik ta jamal te jmultike sok ya skʼan jpastik tulan te maʼba ya jchaʼpastik te mulile (Salmo 86:5; Proverbios 28:13).

7. Te Jehová jaʼnax ya yaʼiybey skʼop te machʼatik ya xchʼuunbot te smantale. Teme ya akʼan yaʼiybat stojol akʼop te Dios ya skʼan te ya apas tulan ta spasel ta akuxlejal te mantaliletik yuʼune (Proverbios 15:29; 28:9). Te kʼalal ya akʼopon te Diose, yame skʼan pekʼeluk awotʼan (Lucas 18:9-14). Te bin ya akʼanbey te Diose, ya skʼan awakʼ ta ilel ta awatʼel. Jich ya awakʼ ta ilel te ay xchʼuunel awotʼan sok te bitʼil lokʼem ta awotʼan te bin ya awalbey te Diose. Teme jich ya apase jichme ya yaʼiybat akʼop te Jehovae (Hebreos 11:6).