Lección 9
Te j-abatetik yuʼun te Diose ya skʼan te lekuk spisil te bintik ya spas ta xkuxlejalike
¿Bin yuʼun ya skʼan te lek spisil te bintik ya jpastike? (1)
¿Bin ya skʼan jpastik yuʼun maʼ jkaptik ta bin chopol te yichʼel ta mukʼ te Diose? (2)
¿Bin maʼ skʼan jpastik yuʼun jich lek ta ilel te jtaleltike? (3)
¿Bin yuʼun ya skʼan te lekuk spisil te bin ya jnop ta kotʼantike? (4)
¿Bin yuʼun te jaʼ lek te sakuk o pokbiluk te jbakʼetaltik sok te bintik ay kuʼuntike? (5)
¿Bin kʼopetik te maʼba lek ta alel sok te maʼba lek te ya jchʼam kaʼiytike? (6)
1. Te Jehová jaʼ chʼul Dios stukel. Jich bitʼil te j-abatotik yuʼune, ya skʼan te lekuk spisil te bitʼil ya kichʼtik ta mukʼe, te lekuk te jtaleltike, te lekuk te bin ya jnop ta kotʼantike, te manchuk ayuk yabakul te jbakʼetaltik sok te jbiluktike (1 Pedro 1:16). Ya skʼan jpastik tulan ta spasel te bintik lek ta sit te Dios, melel te balumilale nojel ta chopolil, soknix te mulile jaʼ ya smakotik ta spasel te bin leke. Jaʼukmeto, maʼme kakʼ jbatik ta tsalel yuʼun.
2. Maʼme jkaptik ta bin chopol te bin utʼil ya kichʼtik ta mukʼ te Diose: Teme ya jkʼan kakʼ jbatik ta abatinel ta stojol te Jehovae, yame skʼan te ya kijkʼitaytik te lotil pʼijubtesel sok te costumbreetik yuʼun te lotil religione, ya skʼan xlokʼotiktal sok ya skʼan kijkʼitaytik ta jkʼaxelnax (2 Corintios 6:14-18; Apocalipsis 18:4). Teme la jnoptikix te bin smelelil ta swenta te Diose, ya skʼan te ya jkanantay jbatik yuʼun maʼ kichʼtik loʼlayel yuʼun te machʼatik maʼ xpʼijubteswanik ta smelelile (2 Juan 10, 11).
3. Lekukme te jtaleltike: Te Jehová ya skʼan te spisil ora lekuk stalel te j-abatetik yuʼune (1 Pedro 2:12). Jaʼ ya yil stukel spisil te bintik ya jpastik soknix te bin muken ya jpastike (Hebreos 4:13). Jaʼ yuʼun maʼme skʼan te ya xwayotik sok te machʼa maʼjaʼuk nujpunemotik soke soknix maʼ skʼan te ya jpastik te bintik chopol te ya spasik te ants winiketik yuʼun balumilale (1 Corintios 6:9-11).
4. Lekukme te bin ya jnop ta kotʼantike: Teme spisil lek te bin ya jnop ta kotʼantike, jaʼnixme jich lek te jtaleltike sok te katʼeltike (Filipenses 4:8). Yan teme jaʼ baem kotʼantik snopilayel te bintik chopole, jichme ya xchiknaj ta ilel ta katʼeltik (Mateo 15:18-20). Ya skʼan jtsatik te bin ya jkʼopontike, te bin ya kiltike soknix te bin ya kaʼiytik stojol yuʼun jich maʼ xyutsʼin te kotʼantike. Teme ya jnoptik te Skʼop Diose, jich spisil lek te bin ya x-och ta kotʼantike.
5. Sakukme, o pokbilukme, te jbakʼetaltik sok te bintik ay kuʼuntike: Jich bitʼil te yabatotik te Diose, jaʼ lek te sakuk te jkʼuʼ jpakʼtik soknix pokbiluk te jbakʼetaltike. Kʼalal ya sujtʼotiktal ta tsaʼanjibal, kʼalal maʼto xweʼotik sok te kʼalal ya jpastik te jweʼeltik yame skʼan jpoktik te jkʼabtike. Teme maʼyuk tsaʼanjibal ta ana jaʼ lek te ya amuk jilele (Deuteronomio 23:12, 13). Teme jich ya jpastike, maʼme stsakotik chamel. Te j-abatetik yuʼun te Diose ya skʼan te lek kʼojanbil, o chajpanbil, te sbilukike. Sok yame skʼan te mesbiluk te yutil sok te spat snaike. Jichme ya yakʼik ta ilel ta stojol te spat xujkik te maʼyuk yabakul te sbilukike.
6. Lekukme te jkʼoptike: Te j-abatetik yuʼun te Diose, ya spasik tulan yuʼun maʼ spasik lot. Melel te jpas lotetike maʼ xkuxinik ta nichimal kʼinal leʼ ta Balumilal (Efesios 4:25; Apocalipsis 21:8). Te j-abatetik yuʼun te Diose, maʼ xlokʼ bolkʼop ta yeik. Maʼ xchʼam yaʼiyik sok maʼba ya xcholik ta alel bolkʼopetik sok maʼ stseʼlayik te bintik yichʼoj bolkʼopetike. Maʼba ya yalik bolkʼop ta banti ya x-atʼejik, ta banti ya snopik jun sok ta stojol te spat xujkike, jich ya xchiknaj ta ilel te maʼba pajal stalelik sok te yantike (Efesios 4:29, 31; 5:3).
[Fotoetik yuʼun te página 18 sok 19]
Te j-abatetik yuʼun te Diose ya skʼan te lekuk spisil te bin ya spas ta xkuxlejalike