Ya yikʼat te Dios yuʼun ya yamikoinat

Ya skʼan yamikoinat te Diose. ¿Yaʼbal anaʼ te ya xjuʼ awamikoin te machʼa kʼax mukʼ yatʼel ta chʼulchan sok ta Balumilale? Ta nameykʼinal kʼalal kuxin te Abrane, la sbiilin amiko yuʼun Dios (Santiago 2:23). Te Bibliae ya yal te ay yantik winiketik sok antsetik te la yamikoinik te Diose; jaʼ yuʼun la yichʼik bayal utsilal. Ta yoʼtik ini, ay bayal kristianoetik ta spamal Balumilal te yakʼo sbaik ta yamikoinel te Diose. Jaʼnix jich te jaʼat ya xjuʼ awuʼun euk.

Te amikoinel yuʼun te Diose jaʼ kʼax lek, ma spaj ta amikoinel te machʼauknax kristianoetike. Te Diose ma yijkʼitay te machʼatik ma x-ijkʼitayot yuʼune (Salmo 18:25). Jaʼ kʼax lek ta amikoinel te Diose, ma spaj te kʼulejalile. Kʼalal ya xlajik te kʼulejetike, te stakʼinike ya yichʼik jilel yantik kristianoetik. Yan te machʼatik yamikoinejik te Diose, te skʼulejalike, maʼyuk machʼa ya xjuʼ xpojbot yuʼun (Mateo 6:19).

Aywan machʼatik ma skʼanik te jaʼat ya anopileyxan te bina pʼijuʼbtesel ya yakʼ te Diose. Yaniwan skontrainat chaʼoxtul awamikotak sok atijinaʼbal (Mateo 10:36, 37). Teme ay machʼa ya stseʼlayat o ya yal te ay bina ya spasbat, jojkʼoʼbey aba: “¿Machʼa ya jkʼan lek ya xjilon sok, jaʼbal sok te Diose, o jaʼbal sok te kristianoetike?”. Nopa awaʼiy: teme ay machʼa ya yalbat te ya awijkʼitay te weʼele, ¿yaʼbal achʼuumbey? Maʼba ya achʼuun. Melel ya skʼan ya xweʼat yuʼun ya xkuxinat. Ta melel, ya xjuʼ yakʼbat kuxinel ta sbajtʼelkʼinal te Diose. Jaʼ yuʼun nopileyaxan bin utʼil ya xjuʼ ta amikoinel te Diose sok ma x-awakʼ aba teme ay machʼa ya skomate (Juan 17:3).